دخان اسود من الشكمان

[me3oo]

السلام عليكم
انا عندى مشكلة وهى انى لما ادور العربية الصبح بيطلع دخان اسود كثير اوى وبعد كدة بيخف طبعا بس مش بيروح وطبعا فى ريحة بنزين شوية مع انى لما بمشى بتكون محنوقة اوى فى النقلات وفيها نتشة وهى فى السلانسية
المهم كشفت بالكمبيوتر ماطلعش حاجة فالفتى اشتغل دى موبينة حطب موبينة مافيش اى حاجة دا سلك غ حط سلك ما فيش جديد بوجيهات غيرت البوجيهات ولا الهوا قالى بص نمسكها واحدة واحدة التنتشية دى نغير قلب الطرمبة بتاعت البنزين وهتبقى زى الفل هات وفك وركب جرب التنتيشة زى ما هى
فقلت خلاص كفاية كدة مصاريف النهارة عشان ظغط الدم مايذيدش عليا :]
تانى يوم رحت مغير زيت وحطيط زيت شمبر بردة عشان الزيت بينقص و جبت منظف رشاشات ونص التنك ورحت الشغل الاداء ابتدى يتحسن وفى الرجعة الحمد لله اتظبتت تانى يوم بدور الصبح شوية دخان ابيض قلت بخار مياه وقلت خلاص الحمد لله المشكلة انتهت بعد فترةشهر ونص كدة بتاع 5000 كيلو كدة المشكلة رجعت تانى فقلت دى اكيد رشاشات فا انا مش هعمل اللى عملتة انا هغير الرشاشات
جبت رشاشات والمميكانيكى ركب ونظف الايدل وبوجيهات وسلك كمان دور دارت على طول والدنيا زى الفل الحمد لله روحت الشغل وجيت تمام 100 100 تانى يوم بقى ادور اصبح اوم اية بقى ضغطى اترفع لما شوفت كمية دخان اسود بنت تييييت طالعة ومبهدلة الدنيا
روحت للميكانيكى قالى كدة حساس الايدل عايز يتغير
اعمل اية يا جماعة اكشف تانى بالكمبيوتر ولا اغير على طول ولا دا صلا مش ايدل دا حساس شكمان
افيدونى بلييييييييييز

[drmagieed]

ما جايز حساس شكمان

[lanos2004]

بقولك افصل سلك حساس الشكمان والبطاريه وارجع جرب
الدخان الاسود دة بنزين زبادة

[عمرو ابوالعلا]

انا حصلى مرة الموضوع دا و غيرت قلب طرمبة البنزين و حساس الشكمان و البوجيهات وسلك البوجيهات ومفيش حاجة اتغيرت و الأخر رحت لمكانيكى عارف ربنا نضف حساس بوابة المانفو بشويق بنزين تنضيف و الدنيا اتغيرت معايا الفتى كتير الله يسامح المفتيين

[amer_el7op]

طب ماجايز الرشاشات اللى انتا جبتها وحشه وبعدين انتا جربت تغير حساس الشكمان لان ده له عامل كبير برده وغيرت سلوك بوجيهات ولا لا
وبعدين الايدل مايعملش دخنه سوده

[Mohamedmaree91]

عندى نفس المشكله ولسه مغير حساس البتشوميتر بس فى لسه رائحة بنزين نى هى سلوك البوجيهات ليها علاقه بموضوع الدخنه دا على الرغم ان عندى العربيه بتدور بسرعه وما فيش اى تنتيش

[amer_el7op]

عندى نفس المشكله ولسه مغير حساس البتشوميتر بس فى لسه رائحة بنزين نى هى سلوك البوجيهات ليها علاقه بموضوع الدخنه دا على الرغم ان عندى العربيه بتدور بسرعه وما فيش اى تنتيش

طبعا سلوك البوجيهات لها عامل كبير فى عدم اكتمال الحرق وده بيؤدى الى رائحه بنزين نى وممكن برده تعمل الدخنه السوده لعدم اكتمال الحرق فى غرفه الحريق لانها بتبقى رديئه التوصيل من الموبينه للبوجيهات

[Mohamedmaree91]

حتى لو العربيه مش مبرجله

[Mohamedmaree91]

طيب واعمل عليهم اختبار ازاى؟؟؟؟

[misho2008]

طب ماجايز الرشاشات اللى انتا جبتها وحشه وبعدين انتا جربت تغير حساس الشكمان لان ده له عامل كبير برده وغيرت سلوك بوجيهات ولا لا
وبعدين الايدل مايعملش دخنه سوده

كلام حضرتك مضبوط
انا غيرت الرشاشات 6 مرات والله 6 مرات
الميكانيكى قالى هتلاقى علبة الشكمان معبية سواد اصبر عليهامسمعتش الكلام بتاعو ورحت عند واحد تانى بتاع استيراد والمفاجأة انى جبت الرشاشت من على موتور عندو اللى هيا بتاعت لانوس 2001 المكببة واشتغلت تمام من اول ماركبتهم مفيش دخنة

[ABO MALEK]

متابع جدااا

[tarek_2005]

عيب رشاشات او حساس اوكسجين او كنترول

[me3oo]

شكرا للردود بس المشكلة اتحلت الحمد لله
احكيلكو بقى
امبارح الصبح جيت ادور عشان اروح الشغل مارديتش تدور فتحت الكبوت فلقيت فى ملح اخضر طالع خمن الاوتاش الارضى فرحت جبت مياه سخنة ودلقت ونظفت الكلام اجى ادور مش عايزة تدور فقلت اروح موصلات وخلاص المهم جيت من الشغل قلت ادور من غير ما العب فى اى حاجة هبا دااااااارررررييييييييييت والعجيب ان مافيش دخنة سودة كمان فقلت سبحان الله
المهم قلت اروح للباشمهندس الدكتور الميكانيكى بتاعى بقولة على اللى حصل قالى اه ممكن تحصل عادى تهييس كهرباء وقالى ما تحوتش فبالك قلت ماشى هسمع كلامة روحت جبت طلبات للبيت وبطلت ودورت وانا بجيب ووديت الطلبات البيت ونزلت تانى عشان اروح مشوار ادور مش عايزة تدور قلت سبحان الله هزيت الاوتاش الارضى شوية دور دارت فقلت اروح لبتاع البطريات يكشف فقالى البطارية عايزة تتغير فغيرت والحمد لله النهاردة بردة مافيش دخان
معلومة انا البطارية 350 واخد القديمة 55 امبير
السؤال هنا اية علاقة البطارية بالدخان
محتاجين رد من كبير المنتدى مهندس ممدوح

[Mohamedmaree91]

استاذ طارق انا لسه مغير حساس البتشوميتر وفى رائحة دخنه بس من غير اللون الاسود حتى لما بدوس بنزين جامد ياترى ممكن اعرف من حضرتك ايه السبب ؟؟؟؟؟؟؟

[me3oo]

يا جماعة العربية راكبها عفريت
العيب رجع تانى مش عارف من اية بقى انا اتخنقت
قلت يا واد خليك متقدم ومتابع التكنولوجيا روح حطها على الكمبيوتر اعد يقولى حساس tps روحت جبت واحد العيب لسة موجود مع شوية بوظان زيادة قالى idle روحت جبت واحد ركب العربية واطية وبايظة ومرة تعلى وحاجة اخر ارف
اتخنقت وقلت فك وركبلى بتوعى وروحت رجعتهم وكان ثمنهم tps 50 جنية - idle 70 جنية واخدت فلوسى وروحت عامل ايدل ليرن بعد ما حطيت بتوعى القدام والحمد لله العربية ظبتت الموضوع غريب جدا والفتاين عندنا فى الاسماعيلية ما فيش اكتر منهم وفىلا الاخر واحد فتالى الغاز هو اللى مبوظ العربية كنت اقولو حاجة وحشة بس عيب دا راجل كبير بردة ازاتى اكشف على الارضى وازاى اعرف انه بايظ
الحقووووووونننننننننننى قبل ما انط فى البحر بالعربية