البخيل و بنزين 80

[mohamed sharm]

لى واحد صاحبى لسه شارى لانوس 2013 من اسبوعين و بيحط بنزين 80 حاولت اقناعه ان ده حيضر العربيه
عايز من الاساتذه الاسباب المنطقيه و الجوهريه اللى اقدر اقولها علشان اقدر اقنعه

[shaddadfalcon1]

اللانوس بتمشي عادي ب 80 مش بتقول لآ
ولو ظبط فيشة الأوكتين هتمشي زي الحلاوه

ومع ذلك انا معايا لانوس 99 ومش بحطلها غير 92 ومره واحده حطيت 80 ايام الأزمه وبقي ضميري مأنبني بغباء

[midnightman_74]

متحولش... بنزين ٨٠ دة أمان ....ولا المخدرات

[moaaz]

طبعا غلط و غلط كبير ...كل موتور ليه نسبة انضغاط بيحتاج بناءا عليها درجة البنزين او نسبة الاوكتان ...ف طبعا العربية ازلة بفيشة اوكتان 91 تقريبا ...و هو بيحط 80 هتلاقى العربية بتسقف احلى تسقيف ....كل دا قصف عمر للموتور ...لو هو معهوش فلوس ممكن مؤقتا يغير فيشة الاوكتان بواحدة 80 بس برضوا عمر الموتور هيقل ...بس ازاااى يعمل كدا ف عربية زيرو

[mohamed sharm]

ما هو ده اللى عايز افهملو

[fghahkj]

انا ان شاء الله هجيب لانوس زيرو اول شهر 4 ومش هحطلها غير 80
وعلى فكره واحد صاحبى معاه دايو لانوس 2007 ومن ساعه مجبها ومبيحطش غير 80 والعربيه ماشيه معاه ما شاء الله حلاوه
وانا عربيتى الحاليه سوزوكى 2008 وبحطلها 80 من وهى زيرو
موضوع قصف عمر الماتور ده هجس بس احنا نلاقيه ده لو كان مخدرات هنلاقيها بمنتهى السهوله

[shaddadfalcon1]

انا ان شاء الله هجيب لانوس زيرو اول شهر 4 ومش هحطلها غير 80
وعلى فكره واحد صاحبى معاه دايو لانوس 2007 ومن ساعه مجبها ومبيحطش غير 80 والعربيه ماشيه معاه ما شاء الله حلاوه
وانا عربيتى الحاليه سوزوكى 2008 وبحطلها 80 من وهى زيرو
موضوع قصف عمر الماتور ده هجس بس احنا نلاقيه ده لو كان مخدرات هنلاقيها بمنتهى السهوله

هو مش هجس ولا حاجه
انا صاحبي معاه لانوس 99 وجايبها من ستنين وكانت 100 100 ومش بيحطلها غير 80 وجري وشد وكل اللي اقدر اقولهولك انه غير مكنه الأسبوع اللي فات او اللي قبله تقريبا

[CaptaiN-AhmeD]

هجس ازاي يعني ياجدعان والله حراام العربيه زيرو بيحطلها 80 !!!

انا لو منك اضربه بالنار

[mhopa2440]

لا يا كابتن مش حقك تضربه بالنار الظروف المادية فوق اي شئ

بالنسبة لموضوع ال 80 في حساب بسيط جدا خليكوا معايا
لو واحد استهلاكه معقول ومتوازان يعني هيفول تقريبا 40 لتر ف الاسبوع
السنة فيها 52 اسبوع × 40 لتر = 2080 لتر سنويات
البنزين 80 نقول سعره 1ج يعني الاستهلاك 2000 جنية سنوي
طيب 92 سعره 1.75 يعني 3500 جنية يعني ف فرق ف السنة 1500 جنية

الضرر الواقع على الموتور بنسبة كام ..... هسيب ليكم تختاروا اي نسبة ضرر
بس المهم ان موتور اللانوس بلوك تمنه من 1500 إلى 2000 يعني لو عربيتك مشيبت بالبنزين 80 دا ثلاث سنين واتحرق الموتور هتكون انت اشتريت متور جديد ووفرت ثمن موتور تاني

تحيا 80 حتى مع الزيرو (هي اخرها شوية تصقيف وقلة التسارع بضع ثواني مش اكتر هو دا الفرق وبس)

[blazer]

انا اوقات بحط 80 فى النوبيرا
وعادى يعنى بس بتصقف اوقات والتسارع بيقل طبعا

[mirra]

معايا لادا 2107 روسى و مش بحطلها غير 92 من يوم ما جبتها زيرو عشان احافظ على الانجكشن...بنزين 80 لا يصلح الا للسيارات العتيقة و بعدين واحد دافع فى العربية 73 الف و مستخسر فيها بنزين نضيف؟؟؟!!!

[Egyzizo]

أنا كنت متخيل ان كل اللى معاهم لانوس بيحطوا 80 ، بعد تظبيط فيشة الأوكتان.

[golden_web_2007]

من مميزات اللانوس انها تقبل بنزين 80 عادى ..
و انا اعرف ناس كتير بتمشيها 80 من الزيرو عادى جداً ..

[khaled_bibo]

يا ناس انتوا ايه بتلاقوه أل 80 فين ؟ انا بقالي اكتر من شهر بحط 92 لل 128

[truss]

طبعاً بنزين 92 افضل
لكن لو مصمم على ال 80 عدّل فيشة الاوكتان .. دى ميزة فى اللانوس