كركرة فى الطلعة على الغيار الأول بس

[wadoud_mohamed]

السلام عليكم ورحمة الله
عاملين اية يا شباب
كان عندى استفسار كدة اتمنى لوحد يساعدنى عشان تعبت أوى
معايا شيفرولية لانوس 2010 الفترة الأخيرة لاحظت انها بتعمل صوت فى الطالعة خاصة على الغيار الاول زى ما يكون كدة كركرة بس مش بتحصل لو كبست بنزين شوية .
فى ناس قالتلى ممكن من الرشاشات وعشان كدة خليت الميكانيكى نضفهم ونضف البوابة كويس بس كانوا لحد ما نضاف مع انى عمرى ما استخدمت الا بنزين 92
على فكرة قواعد الموتور كويسة لانى كشفت عليها ولقيت مفيش حاجة
الفكرة انى ملاحظ ان الموضوع دة بيحصل لومشوار مثلا فى وسط البلد وكان الطريق زحمة . هل الدبرياج لية علاقة؟
وعلى فكرة برضو بعد تنضيف الرشاشات العربية كانت كويسة لمدة اسبوع وبعدين رجعت تانى
معلش عارف انى رغيت كتير بس بحاول اوضح المشكلة

[MinaLove_1]

هوالميكانيكي بصلك علي البوجيهات وعلي اسلاكهم بالذات ؟؟؟؟؟؟

[wadoud_mohamed]

بالنسبة للبوجيهات الميكانيكى قالى لسة شوية عليهم وعلى فكرة انا لسة عامل 20.000 كيلو هما البوجيهات المفروض يتغيروا على كام

[truss]

الاعراض اللى ذكرتها دى احتمال كبير اسطوانة دبرياج

[wadoud_mohamed]

معقول اسطوانة ودبرياج وانا لسة عامل 200.000 كيلو متر بس ازاى أتأكد انها اسطوانة دبرياج او ديسك .

[esam_ayad]

علي فكره انا برضو عندي نفس الحركه والعربيه اوتوماتيك.

[wadoud_mohamed]

فى حد قالى ان المشكلة دى ممكن تكون بسبب الكبالن الداخلية أو الشداد اية رأيكم؟ او هل ممكن العفشة تكون ليها علاقة بالموضوع دة!!!

[Mo.Kareem]

انا كمان عندى نفس الصوت و العربية اوتو

[mostafa mahmod]

الاعراض دى عندى و الميكانيكى قالى ديسك

[MITSUKERO]

مشكلة كهرباء

اعمل سكان

والله اعلي و اعلم

[truss]

معقول اسطوانة ودبرياج وانا لسة عامل 200.000 كيلو متر بس ازاى أتأكد انها اسطوانة دبرياج او ديسك .

رجرجة فى الطلعة على الاول + الرجرجة دى بتحصل بعد مشوار فى الزحمة .. احتمال كبير اسطوانة الدبرياج ابتدت تتعب, و انا استبعد الكبالن لأنها لو كبالن الكركرة هتحصل معاك على طول مش فى الزحمة و مع السخونية بس زى ما ذكرت.

اختبر الدبرياج:
دور العربية, شد فرملة اليد, ادى العربية غيار عالى (الرابع مثلاً) و حاول تطلع بالعربية لو الدبرياج سليم العربية هتبطل فوراً, انما لو اتحركت بيك و ما بطلتش على طول , كدة الاسطوانة ابتدت تتعب

و انا فى رأيى الدبرياج مش بيعيش كتير فى اللانوس انا مغيره قبل كدة على 50000 كم (و دة مش كتير) و بيعتمد برضه على رجل اللى سايق

[wadoud_mohamed]

رجرجة فى الطلعة على الاول + الرجرجة دى بتحصل بعد مشوار فى الزحمة .. احتمال كبير اسطوانة الدبرياج ابتدت تتعب, و انا استبعد الكبالن لأنها لو كبالن الكركرة هتحصل معاك على طول مش فى الزحمة و مع السخونية بس زى ما ذكرت.

اختبر الدبرياج:
دور العربية, شد فرملة اليد, ادى العربية غيار عالى (الرابع مثلاً) و حاول تطلع بالعربية لو الدبرياج سليم العربية هتبطل فوراً, انما لو اتحركت بيك و ما بطلتش على طول , كدة الاسطوانة ابتدت تتعب

و انا فى رأيى الدبرياج مش بيعيش كتير فى اللانوس انا مغيره قبل كدة على 50000 كم (و دة مش كتير) و بيعتمد برضه على رجل اللى سايق

هجرب وأبلغ حضرتك

[dr.hazem]

عيب بنزين مغشوش في رأيي...
تحياتي

Sent from my SE Arc S using Forum Runner