جبت نوبيرا بس عندي مشكلة

[joe_techno]

الحمد لله ربنا كرمني و جبت نوبيرا بعد بحث و تدوير لمدة 3 شهور العربية مواصفاتها كالتالي :
موديل 2007
عداد ( 47800 كم)
فابريقة كلها ماعدا اكصدامين و رفرفين
الصالون من جوه لسه بالفرش الاصلي و حالته ممتازة و الكنبة ورا لسه عليها اكياس الفابريقة
كانت ملك راجل كبير علي المعاش و تحركاته بيها قليلة جدا
المهم انا لما كشفت علي العربية ف بنزية كالتكس اللي في شيراتون قالولي اني حالة الموتور 82% مع العلم اني الزيرو بيبقي حالتة 85% (مش عرف لية مش 100% ايه الحكمة في النسب القليلة دي) و قالولي اني حالة الموتور ممتازة بس عايزة طقم سيرفس و فعلا بعد م استلمت العربية حسيت انها مخنوقة شوية علي السرعات القليلة و صوتها عالي و في صوت زنة كدة من 2 -3 RPM المهم عملت طقم سيرفس و طمني علي العربية و بقت كل حاجة جديدة ماعدا الزيت لانة لسة مكملش 700 كيلو علي حسب كلام صاحبها فمرضتش اغيره بس الراجل و هو بيسلمني العربية وراني جركن الزيت لقيتة زيت مصر 10000 كم طبعا سيء جدا المهم اني بعد الصيانة لسة العربية خشنة و صوتها عالي مع اني حاسس اني الموتور حالتة كويسة جدا و دا بيظهر بعد 3 rpm هل الزيت ممكن يكون السبب ؟؟؟؟
معلش انا طولت عليكم بس انا حبيت انقلكم الصورة كلها
شكرا

[محمد الشامي]

ايه الصيانه او السيرفيس اللي اتعمل بالظبط ؟

[joe_techno]

تغيير فلتر بنزين
تغيير بوجيهات NGK ياباني
تغيير جوان التاكيهات
تنظيف فلتر الهواء
تنظيف بوابة الانجكشن بالاسبراي
و ضع منظف انجكشنstp مع البنزين
خرط الطنابير(كان فيها شفة بسيطة ) و رجلشة الفرامل

[m_medo]

مبروك على السيارة الجديدة.
وعلى ما اعرف ان الزيت فعلا ممكن يعمل كدة... بس لازم تقول ايه السرفيس اللى اتعمل

[i_Am_Legend]

الف مبروووووك

[محمد الشامي]

اولا تبقا تغيير سير كاتينه في اقرب فرصه
ثانياً حضرتك بتحط بنزين ايه ؟

والخشونه والصوت العالى اللي حضرتك بتقول عليهم ده نتيجه انك بتكون دايس بنزين بس مفيش سحب ؟
ولا لان الموتور صوته عالى حتى على السلانسيه ؟

[m_medo]

ليه مغيرتش طقم سيور؟

[joe_techno]

اولا تبقا تغيير سير كاتينه في اقرب فرصه
ثانياً حضرتك بتحط بنزين ايه ؟

والخشونه والصوت العالى اللي حضرتك بتقول عليهم ده نتيجه انك بتكون دايس بنزين بس مفيش سحب ؟
ولا لان الموتور صوته عالى حتى على السلانسيه ؟

سير الكاتينة و سير الدينامو صاحب العربية مغيرهم علي 30000 او 35000 مش فاكر و فعلا الميكانيكي قالي لسة كويسين بالكتابة بتاعتهم و عامة انا مش هستني عليهم كتير

و موضوع السحب دا علي الاول و الثاني بس صوتها عالي و سحبها مش علي اد متورها يعني حسيت اني الافيو احسن انما بعد كدا سحبها ممتاز و صوتها مناسب لل rpm العالي

[محمد الشامي]

بتحط بنزين 80 ولا 90 ولا 92 ولا 95 ؟

ونصيحه بلاش تقارن النوبيرا بالافيو :) قارن نوبيرا بنوبيرا زيها في السحب والاداء

[joe_techno]

مبروك على السيارة الجديدة.
وعلى ما اعرف ان الزيت فعلا ممكن يعمل كدة... بس لازم تقول ايه السرفيس اللى اتعمل

الله يبارك في حضرتك و هو كدة ميتبقاش غير الزيت فعلا و انا كان عندي الموضوع ده في الافيو مع الزيت الموبيل كنت بحس انها جرار زراعي بعد مغيرت الزيت السحب و نعومة الموتور زادوا بعد مغيرت الي Valvoline بس انا عايز اطمن من خبراء النوبيرا

[joe_techno]

الف مبروووووك

الله يبارك في حضرتك

[joe_techno]

بتحط بنزين 80 ولا 90 ولا 92 ولا 95 ؟

ونصيحه بلاش تقارن النوبيرا بالافيو :) قارن نوبيرا بنوبيرا زيها في السحب والاداء

بنزين 92 انا عارف اني مفيش وجه مقارنة اصلا بس انا معنديش حاجة اقدر احكم بيها علي العربية الا تجربتي للافيو يعني حاليا الافيو احسن في السحب علي السرعات القليلة و في النعومة و النوبيرا احسن في السحب علي سرعات عالية عشان كدة انا عايز خبراء النوبيرا يقولولي طبيعة العربية دي و هل كدة الموضوع طبيعي و العيب من الزيت فقط ولا في شك في كفاءة الموتور؟؟؟؟؟؟

[AlGazar2]

الافيو اخف من النوبيرا فهتلاقيها على السرعات القليله بتشد احسن من النوبيرا
بس النوبيرا بعد 4000 rbm بتتحول بمعنى الكلمه

و غير الزيت و حط شيل او فالفولين او كاسترول او ليكوى مولى هتلاقى الصوت هدى و السحب اتحسن شويه

و خلى بالك ان البنزين مضروب فحط من بنزينه نضيفه و انصحك بامارات مصر بنزينها كويس

[joe_techno]

الافيو اخف من النوبيرا فهتلاقيها على السرعات القليله بتشد احسن من النوبيرا
بس النوبيرا بعد 4000 rbm بتتحول بمعنى الكلمه

و غير الزيت و حط شيل او فالفولين او كاسترول او ليكوى مولى هتلاقى الصوت هدى و السحب اتحسن شويه

و خلى بالك ان البنزين مضروب فحط من بنزينه نضيفه و انصحك بامارات مصر بنزينها كويس

ما انا ناوي فعلا اغير نوع الزيت دة بس قولت استني شوية دة لسة مكملش 1000 كيلو

[محمد الشامي]

بنزين 92 انا عارف اني مفيش وجه مقارنة اصلا بس انا معنديش حاجة اقدر احكم بيها علي العربية الا تجربتي للافيو يعني حاليا الافيو احسن في السحب علي السرعات القليلة و في النعومة و النوبيرا احسن في السحب علي سرعات عالية عشان كدة انا عايز خبراء النوبيرا يقولولي طبيعة العربية دي و هل كدة الموضوع طبيعي و العيب من الزيت فقط ولا في شك في كفاءة الموتور؟؟؟؟؟؟

كده معظم الاسباب المبدئيه لخنقه العربيه وضعف السحب مش موجوده عندك والحمد لله
ومش فاضل غير تغيير الزيت مع انه مش هايفرق جامد في السحب والخنقه
عالعموم انتظر رأي الزملاء الكرام ومع النقاش ان شاء الله تلاقي حل للمشكله

وحاول تقارن اداء عربيتك بعربيه نوبيرا تانيه تكون حالتها كويسه وطبيعيه
لان ممكن مايكونش في فرق, خاصه اني لاحظت من كلامك ان احساسك بضعف السحب والخنقه مبني على فكرتك عن العربيه النوبيرا بشكل عام مش بناءا على تجربتك الشخصيه مع العربيه