قدر الله وماشاء فعل - العربيه اتهشمت من الامام (لانوس 2012)

[alaafahmy]

السلام عليكم ورحمة الله وبركاته
قدر الله وماشاء فعل - امبارح الصبح بدرى عملت حادثه شديده بعربيتى (لانوس 2012) خبطت فى تاكسى رمى ادامى وهدى وانا كنت جاى سريع طيرته طلع على الرصيف واتقلب وعربيته تهشمت تماما وانا عربيتى كما بالصوره...
المهم روحت التوكيل جبت مقايسه عشان التأمين وفوجأت بأسعار هلاميه بمعنى الكلمه .. انا عايز نصيحتكوا ازاى اقدر اخفض التكلفه - انا عارف التأمين لسه هيفاصل بس انا برضه هتحمل 20% وكمان اعتقد انى هدفع الفلوس كلها وبعدين استرد 80% من الفاتوره من التأمين (مصر للتأمين)
المهم مش هطول عليكما .. آدى المقايسه بالتفصيل :

اولا / مصنعيات :-
ضبط واستعدال الشاسيه : 950 ج
اعمال سمكرة وتغيير التالف وضبط المقدمه : 1800 ج
اعمال دهان المقدمه والدواخل : 1800 ج
اعمال كهرباء : 250 ج
اعمال ميكانيكا لزوم السمكره : 500 ج
اعمال تكييف : 350 ج
اعمال سروجى !!!!!!!!! : 150 ج

اجمالى المصنعيات : 5800 + 10% ضريبة مبيعات

ثانيا / قطع الغيار :-
اكصدام امامي كامل : 1800 ج
كبود موتور : 2200 ج
مفصله كبود : 150ج
شبكه اماميه بالعلامه : 500 ج
صدر امامى صاج : 300 ج
كشاف شمال : 580 ج
كشاف يمين : 580 ج
لمبات فوانيس اماميه : 30 ج
لباد كبود موتور : 500 ج
كالون كبود موتور : 120 ج
كلاكس : 250 ج
كارتير تراب شمال : 100 ج
كارتير تراب يمين : 100 ج
رفرف امامى شمال : 580 ج
ريدياتير : 900 ج
شداد ريدياتير : 40 ج
سربنتينة تكييف : 1430 ج
صاجة فرن شكمان : 180 ج
جلدة مياه ريدياتير : 90 ج
مروحة تكييف : 500 ج
مروحة تبريد : 580 ج
قربة مياه مساحات : 120 ج

اجمالى قطع الغيار : 11630 + 10% ضريبة مبيعات

اجمالى المقايسه : 17430 + 10% ضريبه مبيعات (1743) = 19173 ج

اعمل ايه بقى يارجاله ؟ انا عايز احافظ على عربيتى جديده مش عايز استرخص وفى نفس الوقت العمليه كده فاتحه جامد اوى اوى بصراحه والله اعلم لسه هيدخلولى فى ايه تانى ؟!
ايه اللى ممكن اجيبه من بره ويكون كويس يفى بالغرض او ايه نصيحتكوا بوجه عام ؟

وهل التوكيل يرضى انى اجيب حاجه من بره وهما يركبوها ويرشوها ؟

انا مستنى ردودكم فى اقصى سرعه لانى رايح بكره مع مهندس المعاينه بتاع شركة التأمين بكره الصبح وهشوف هيوصل معاهم لأيه ....

شكرا مقدما لكل اللى هيقدم نصيحه

[khaabas]

ربنا يصبرك يا رب وأوعى تزعل قدر الله وما شاء فعل وربنا يكرمك ان شاء الله وترجع العربية احسن من الاول

[amr elsisi]

ربنا يخلف عليك بالخير
والله طالما التامين حيشيل 90%
خليك معاه
اما لو مش حيشيل العربية دي تتكلف بالكتير 4000 ج

[MohammedAladel]

العربية دى مش هتتكلف كتير برا التوكيل بس هو كدا أسعار التوكيلات

[s0144862631]

ربنا يصبرك بس الخبطه دي بره تتكلف من 3000 الى 4000 بالكتير بس انت اللي هتشيلهم كلهم بالنسبه للتامين لو فرضنا التكلفة 20000 وانت هتشيل 20% منهم يعني 4000 برده بس هتضمن ان كل حاجه رجعت اصلي وزي ما كانت بالظبط

[TAMERHASSAN]

قدر الله وما شاء فعل من رااي تعملها في التوكيل وبلاش تعملها بره علشان تظبط وش العربيه واعتقد كده تاقص شحن التكيييف واعمال التكييف زود 400 جنيه

[AlGazar2]

قدر الله و ما شاء فعل و الحمد لله ان انت بخير

بس ليه الخبطه دى تتكلف 20 الف جنيه هما الناس دى بتستعبط ولا ايه
دى بره تتكلف سمكره عند واحد حرامى 700 جنيه بعد الفصال و حاجات ب 1500 جنيه مثلا و 1000 جنيه رش نمره 1

مش هتكمل 3 الاف تقريبا بالكتير 4 لو جايب الحاجة كلها جديده و مجبتش حاجة استيراد

[AlGazar2]

و معلش يعنى هو ايه الى حصل ل لباد كبوت الموتور من الخبطه زعل مثلا انه اتنى فعايز يتغير ولا صاجه فرن الشكمان المراوح ريحت عليها فالصاجة زعلت و عايزه تتغير

على العموم يا باشا الخبطه دى انا عملت زيها بعربيتى بس مش بالقوه دى بس كانت فى الكبوت و مجتش ناحيه الاكصدام و متكلفتش كلها تقريبا 3000 جنيه علما بان العربيه نوبيرا ( قطع غيارها اغلى من اللانوس )

[ahmedhilmy]

الحمد لله انك بخير و ربنا يخلف عليك

[speed_magnum]

ربنا يعوض عليك خير

[hossam_elwani]

لاحول ولا قو الا بالله

انا ابن عمى عامل لسه حادثه برضه بلانوس زيرو مكملتش 2000 كيلو التوكيل طالب من التأمين 28000 جنيه !!!!!!

برضه نفس الخبطه من الامام

[mshmshm3]

من قبل ما اشوف الصور تخيلت ان وش العربية ضايع
الموضوع بسيط جدا جدا و تكلفة التوكيل مبالغ فيها اوي
دي كبيرها 4000 جنيه و ترجع زي الفل
580 جنيه فانوس امامي ليه ؟ سعره قرب سعر بتاع الفليوانس ؟ مالو الديبو
دي خبطة بسيطة جدا ما تتكلفش 20 الف و العربية كلها ب 68 الف تقريبا

[buddha]

انتى عايز عربيتك تبقى كويسة زى ما بتقول
يبقى خليك فى التوكيل
بدة برة التوكيل هتصرف كتير

يعنى فى اكصدام وفوانيس وشنب اتعوج وسربنتينة وردياتير ومراواح ردياتير
وكبوت ورفرفين وممكن يكون فى قواعد سفلية باظط وقنطرة

دة غير سمكرة وزرجينة ودوكو

طبعا هتتكلف جامد بردة
20% من قيمة الخسائر قيمة جيدة جدا جدا

اعقلها وتوكل

[bebom]

ال حمد الله انك بخير

[mahmoud_anwar]

اولآ قدر الله وماشاء فعل
تاني حاجة انا كنت متخيل لما هشوف الصور علي المبلغ مش هلقي نص امامي
بس انا ملاحظ اسعار غريبة في الاانوس هيا قطع غيارها اغلي من الجولف 2 الي المفروض انها الماني وقطع غيارها في انقراض بجد انا بقيت اتغاظ عربية بي بلاش وقطع غيارها اغلي منها انا سئلت علي 2 بطاحة لقيته بيقولي 260 الجوز هار اسود البطحات
اما بخصوص ان التوكيل هيرجعها زي الاول دي كلمة بيضحكو بيها علي الناس عارف التوكيل مافيهوش صنيعية بي الاات جديدة يعني دة التوكيل بيبعت لي صنيعية برة ملهمش فيها كمان
انتا خدها وانزل بيها الحرافين او المنصورة واسئل علي العفريت الي فيهم