أغير لتخليقى ولا أخليها معدنى زى ما هى؟!

[ABO MALEK]

استفسارى يا رجالة بخصوص زيت الموتور لانوس عاملة 85000 كم وبغير توتال 5000 اللى ب 115 حنيه وبنزله على 5000 كم وبغير معاه الفلتر فى كل مرة والزيت بينقص حوالى نص كم فى الغيارة (انا عارف ان الزيت ده المفروض ينزل على 3000 مش 5000)...وعايز اغير لتخليقى السؤال بقى:
النوع وبيتغير على كام وسعره كام؟؟
مع العلم ان اغلبية مشاويرى سفر .

دمتم بخير حال.

[Amr Axel]

يا جماعة و الله ما فيه حاجة اسمها زيت 3000 و زيت 5000 فيه زيت معدني و نص تخليقي و تخليقي
و الزيت ع حسب لزوجته و ريحته بيبان اذا كان قد حان وقت تغييره و لا لأ الا لو انت عايز تمشي ع نظام تغيير كل عدد محدد ده شئ يرجع ليك
يعني ممكن الزيت يقعد معاك 5000 و ممكن 8000 و ممكن ميكملش 3000 ديه بتعتمد ع طريقة السواقة و الجو و حالة الموتور اهم حاجة متابعة لزوجته و ريحته او تغييره بمرور الشهور لو مبتمشيش كتيير
انا أفضل التخليقي ممكن تجرب تغييرة تخليقي و تشوف هينقص و لا هيفضل ثابت لو فضل تمام خلاص استمر ع التخليقي لو نقص بشكل ملحوظ ارجع للمعدني و خاصة انك داخل ع 100 الف ك عايز تكمل معدني خلاص كمل بس لو بتحط لزوجة 20w50 الأفضل تشوف حاجة اخف زي 15w50 و ده هتلاقيه في شل اللي بيقولوا عليه شل الاصفر اللي هو شل HX5 و المفروض انه مخصص المواتير اللي تعدت 100 الف ك و ميزته انه اخف للوصول لاجزاء الموتور في بداية التشغيل من 20w50
اما التخليقي فهتلاقي لزوجته 5w30 تقريبا و النصف تخليقي 10w40
و احسن حاجة انك بتغير الفلتر مع كل تغييرة لأنه يحافظ ع نضافة الموتور بفلترة الشوائب و مفيش حاجة اسمها فلتر يقعد 5000 و فلتر 10000 اللي بيقولك يقعد 5000 ده هتلاقيه تعبان شوية او خامته مش اوي فميستحملش و ممكن ميفلترش بعد كده انت و نصيبك و اللي يقولك 10000 ده هيكون انضف و غالبا هيقولك ياباني او كوري اهم حاجة تستخدم فلتر نوعيته نضيفة و تغيره مع كل تغييرة

[ahmed.zahra]

الزيت التخليقي هو الأفضل

[ABO MALEK]

ده كلام جميل ...لسه باقى الإجابة من فضلكم
أغير لنوع ايه؟وبينزل بعد كام؟وسعره كام؟
يعنى اللى بيستخدم زيت تخليقى وكويس والعربية مرتاحة عليه وصوتها ناعم وسحبها كويس وجودة الزيت محترمة يا ليت يفيدنى من فضلكم.

[ABO MALEK]

توتال 15w 40

[megaman]

يص يا سيدى انت تخليك زى منت فى المعدنى بس تغير نوعه مثلا شل انا اظن احسن من توتال وحط الفلتر الاصلى اظن ده حيبقى 100/100

[ABO MALEK]

يا باشا توتال اصلا كويس بسم الله ماشاء الله...لكن 5000 كم بيتغير بسرعة مش اكتر
انا عايز حاجة تخليقى لأنه فى اعتقادى فترته أطول وبيحافظ على الموتور أكثر.

[khalid_adel]

معلش ياعمور ليا اضافه
الزيت لو نقص وهو مثلا كان بيحط 20-50 فلو حط 10-40 حيتبخر اكتر واسرع
يعني دلوقتي مفروض يحط اضافه سيراميك او شحم بتوع ليكوي مولي ويفضل علي 20-50 لو كان ده اللي بيحطه لكن ميقلش في اللزوجه خالص خلاص
لان لما الماتور يبتدي ياكل الزيت ساعتها بنزودلو اللزوجه درجه درجه تباعا لحد مايوصل ل درجه 50 فقط (sick)

[m_medo]

انا لسة حاطط شل تخليقى بقاله 1000 كيلو.... انا حاسس ان صوت الموتور على شوية ...... بس العربية سحبها كويس... المهم تغير الفلتر

[ABO MALEK]

غيرت زيت امبارح الحمد لله .
جبت فيسكو 3000 =120 جنيه.ويارب يكمل 5000 كم.
وسأخبركم بالنتائج إن شاء الرحمن
شكرا لكم.

[swimmer25]

غيرت زيت امبارح الحمد لله .
جبت فيسكو 3000 =120 جنيه.ويارب يكمل 5000 كم.
وسأخبركم بالنتائج إن شاء الرحمن
شكرا لكم.

بيقولوا بيقعد 10 الاف بس بص عليه لما تكمل 5000 ولو كويس بص عليه تاني علي 7000
وهو نصف تخليقي مش تخليقي كامل
الف مبروك وان شاء الله العربية تستريح عليه

[ABO MALEK]

والله ياباشا عامل المحطة قالى انه بينزل على 15000 كم.انا ان شاء الله لو كمل ال 5000 يبقى تمام قوى.

[Amr Axel]

مبروك الزيت الجديد فيسكو 3000 مش وحش انا استخدمته فترة بس حسيت بتغير و العربية مش مرتاحة معاه فغيرت لشل تاني و فعلا مش بيكمل معايا 5000

[ABO MALEK]

ربنا يبشرك بالخير

[egyptiandiver]

تخليقى - Misr Petroleum oil Phonix 225 pounds 10,000 km
Liqui Moly also ok