طريقة فك لوحة التكييف بالتفاصيل والصور_2

[مصطفى-حسن]

الحقيقة ان الموضوع دة انا عملتة من ضمن مراحل فك التابلوة وفرش السيارة كلة من اجل اضافة عزل الارما فليكس لصالون السيارة بالكامل

وهبدأ خلال الايام الجاية اعرض طريقة فك كل حاجة بالتفصيل بالصور فى مواضيع مختلفة
لوحة التكييف
تابلوة الاضاءة
العدادات
الدركسيون
التابلوة نفسة بالكامل
التلاجة
سربنتينة السخن
دواسات الوقود والفرامل والدبرياج

ودة كان المنظر النهائى للى انا عملتة بايدى وبدون صنايعية اقسم بالله



وهبدأ بأذن الله بلوحة التكييف

هنفك الاول الفبرة دى ودى بتركب كلبسات
يعنى حط مفك عادة فى الجنب بينها وبين جسم التابلوة وننطرها لبرة بحرص بدون ما نكسر الكلبسات ونطلعها بايدينا عادى جدا




وبعدين هنفك المسمارين دول




هتفك المسمارين بتوع درج التابلوة ونطلع الدرج برة



وبعدين هبدأ احرر الويرات بتاعة لوحة التكييف ودى المسؤلة عن خلط وتوزيع والتحكم بالهواء بالكامل (سخن وبارد)

الاول هنحرر الوير اللى عند دواسة السائق جنب دواسة البنزين




وبكدة نبقى حررنا الوير اللى مسئول عن البكرة دى



وبعدين نروح لناحية درج التابلوة



وبكدة نبقى حررنا الوير اللى مسئول عن البكرة دى



وبعدين فى اليمين شوية نروح للوير التالت



وبكدة نبقى حررنا الوير المسئول عن تحديد مجال دخول الهواء الى التكيف سواء من داخل السيارة او خارج السيارة والمسئول عنة الزرار دة



وبعدين نسحب لوحة التكييف لبرة بحرص عشان الفيش بتاعة الكهرباء كدة

هتلاقى 3 فيش 2 فوق وواحد تحت
هنفك الاتنين اللى فوق بحرص وسيب اللى تحت



وبعدين هنرجع تانى ناحية درج التابلوة عشان نحرر الكلبسات بتاعة الترموستات بتاع التكييف دى



وبعدين هنسحب اللوحة كلها فى ايدينا لبرة بحرص
لو لقيت ان فية حاجة معصلجة فدة معناة ان الويرات بتاعة التكييف وانت بتسحبها شابكة فى حاجة

بص على الجزء اللى شابك وسلكة ببساطة
بعد ما تطلع اللوحة كلها الباقى كلة سهل سواء عايز تنضفها او تغير الاضاءة ......الخ

واى استفسار انا فى الخدمة

[مصطفى-حسن]

الحمد للة رفعت الموضوع بنجاح

وربنا يسهل الايام اللى جاية هبدأ شرح كل حاجة عن فك كل مكونات صالون العربية بالصور واى استفسار انا تحت امر الاعضاء

[مصطفى-حسن]

نسيت اضافة بسيطة جدا عند فك الكلبسات بتاعة الترموستات انك تبقى تعلمهم اللى فوق واللى تحت

لربما يكون فية اختلاف فى الكهرباء(من باب الاحتياط لا اكثر)

[محمد الشامي]

الله ينور عليك وفي انتظار المزيد

[misho2008]

تسلم ايدك شغل زى الفل الله ينور وموضوع ررررررررررائع

[tarek_2005]

عمل رائع ولكن مع التنويه ان السيارة نوبيرا وليست لانوس والاختلاف الوحيد هو عدم وجود الثرموستات في اللانوس
وملاحظة اخري سلوك الثرموستات مش هتفرق في اي شيئ في ترتيبها لانه ما هو الا مفتاح كهربائي يعمل حسب درجة الحرارة

[ahmedzizo131]

بسم الله الرحمن الرحيم
شغل على مية بيضة
و كمان
نار هدية
تسلم و الله ينور عليك

[مصطفى-حسن]

عمل رائع ولكن مع التنويه ان السيارة نوبيرا وليست لانوس والاختلاف الوحيد هو عدم وجود الثرموستات في اللانوس
وملاحظة اخري سلوك الثرموستات مش هتفرق في اي شيئ في ترتيبها لانه ما هو الا مفتاح كهربائي يعمل حسب درجة الحرارة

باشا
دى عربيتى
لانوس 2002

وانا اللى عامل الشغل دة بايدى
والشغل دة جزء من عملية فك التابلوة وفرش السيارة بالكامل عشان كنت بعمل عزل ارما فلكس لصدر وارضية العربية بنفسى ودى صور الصالون بعد ما فكيت كل حاجة



ودى صورة الصالون بعد مابدأت عزل بالارما فليكس
والشغل دة دة كل بايدى والله وبدون ما صنايعى يحط ايدة فى العربية







وشكرا على معلومة ان سلوك الترموستات مبتفرقش فى الترتيب

[JAM]

ماشاء الله.. تسلم إيدك.. بس هل أماكن تثبيت الويرات فى التابلوه.. هى نفس الأماكن فى الانوس...؟؟؟

[مصطفى-حسن]

ماشاء الله.. تسلم إيدك.. بس هل أماكن تثبيت الويرات فى التابلوه.. هى نفس الأماكن فى الانوس...؟؟؟

يا باشا دى لانوس 2002
لانوس2
مش نوبيرا

ولوعربيتك لانوس 2 ونزلت بصيت جنب دواسة البنزين هتلاقى اول واير
لانوس ياناس
لانوس يا عالم
لانوس يا هوووو

[JAM]

يا باشا دى لانوس 2002
لانوس2
مش نوبيرا

ولوعربيتك لانوس 2 ونزلت بصيت جنب دواسة البنزين هتلاقى اول واير
لانوس ياناس
لانوس يا عالم
لانوس يا هوووو

هههههههههههههههههههههههههه
ياباشا حقك عليا.. انا مكنتش واخد بالى.. لإنى لقيت شكل السماعات فى الباب مش زى عندى.. فا علشان كدة انا قولت دى نوبيرا... حصل خير.. وماشاء الله عليك

[م. محمد نافع]

اللانوس مفيهاش ثرموستات للتكييف
دي اكيد اضافه
والله ينور علي الشغل

[S O P H O S]

ما شاء الله
مجهود رائع ..

[mahmoudysf]

لانوس ياناس
لانوس يا عالم
لانوس يا هوووو

مصدقينك يا باشا تسم ايدك
بس يا ترى اللانوس برضه نفس الحكاية ههههههههههههههه
بهزر طبعا
تسلم ايدك انت قبلك جامد على العملية الانتحارية دي

[مصطفى-حسن]

مصدقينك يا باشا تسم ايدك
بس يا ترى اللانوس برضه نفس الحكاية ههههههههههههههه
بهزر طبعا
تسلم ايدك انت قبلك جامد على العملية الانتحارية دي

هى فعلا عملية تفوير الصالون بالكامل كانت عملية انتحارية

وانا بصراحة كنت عاوز اعمل الموضوع كلة فى صفحة واحدة
بس لقيت الموضوع هيبقى طويل قوى ومليان تفاصيل وفى اعضاء ممكن تهاب الموضوع

فعشان كدة هبدأ اعمل كل حاجة لوحدها وبالتفاصيل والصور حتى عشان تبقى مرجع للجميع


لوحة التكييف
تابلوة الاضاءة
العدادات
الدركسيون
التابلوة نفسة بالكامل
التلاجة
سربنتينة السخن
دواسات الوقود والفرامل والدبرياج
الفبر
فرش السيارة بالكامل

ربنا يسهل ان شاء اللة الايام اللى جاية