طريقة فك قطمة الدركسيون بالكامل بالتفاصيل والصور

[مصطفى-حسن]

الاول قبل ما اشرح طريقة الفك

لازم انوة الى ان دة جزء من عملية فك وتفوير صالون السيارة بالكامل من اجل عزل صدر وارضية العربية بالارما فليكس الايطالى (عزل حرارة وصوت)
وان فى مراحل متعددة وحاجات كتير فكيتها
عشان فى الاخر وصلت للمرحلة دى بدون اى صنايعى ما يحط ايدة فى العربية



واول موضوع عملتة كان دة

http://www.nilemotors.net/Nile/340764-_2-a.html

وان شاء اللة خلال شهر مارس الحالى هرفع باقى المواضيع بالتفاصيل والشرح والصور وهى بالترتيب كالاتى

عمل فلتر للتكييف داخلى وخارجى
فك تابلوة الاضاءة
فك العدادات
فك الدركسيون
فك التابلوة نفسة بالكامل
فك التلاجة
فك سربنتينة السخن
فك دواسات الوقود والفرامل والدبرياج
فك الفبر
فك فرش السيارة بالكامل
طريقة اصلاح الاطارات المتهالكة القديمة

وبالموضوع دة ابقى عملت 2 من اصل 11 موضوع
ربنا يسهل وهرفعهم باذن اللة

نخش على الشغل بقى

اول حاجة بنفك مسامير الفبر اللى قافل على قطمة الدركسيون
ونتابعها بالصور















وبعد كدة بنحرر الفيش اللى راكبة فى الدركسيون وكمان بتاعة الكلاكس ومتخافش من ترتيبهم لما تيجى تركب لان مفيش فيشة بتركب مكان التانية











وبعدين نفك الكرسى بتاع السواق ونطلعة برة العربية خالص ودى حاجة بسيطة فمش محتاجة شرح هما كلهم 4 مسامير 12

نيجى بقة لقطمة الدركسيون نفسها
اولا هيا ممسوكة ب 3صواميل 12
2 فى صدر العربية من تحت
ودة مكانهم




ومسمار فى نهاية القطمة تحت خالص




واخيرا ارخم صامولة فيهم (الرخمة بنت الرخمة بنت الرخم )
وفى الشرح هتعرفوا انا مسميها كدة لية
دة منظر لعمود الدركسيون من تحت


ودة شكلها وانا مصورها والكاميرا فى عمق التابلوة من الداخل




الاول هتفك الصامولتين دول نص فكة (يعنى متفكهمش للاخر)



وبعدين هتفك المسمار دة خالص وخلى بالك مش هيتفك الا بلقمة 12 او مفتاح مشرشر عشان مكانة صعب شوية



وبعدين نخش على الصامولة الرخمة
الاول لازم تكون نايم على ضهرك فى الدواسة
وانا هشرح كل المحاولات اللى عملتها عشان محدش يتسحل زييي ويقعد يحاول محاولات فاشلة

هتشتغل عميانى (بالتحسيس يعنى) لانك مش هتعرف تشوف الصامولة كويس
وهتدخل ايدل من ناحية دواسة الدبرياج
الاول جربت افكها بمفتاح 12 ناحية وناحية بس كانت المشكلة كالتالى




قلت اجرب افكها بمفتاح 12 مشرشر وكانت المشكلة كالتالى




فقلت يبقى مفيش غير بيبة 12 بس بردة كانت المشكلة كالتالى




طبعا انا مش مجرد ما حطيت المفتاح وجربت لقيتة مش نافع رحت راكنة وجايب غيرة
انا فضلت احاول من اليمين واحاول من الشمال واشوف اى مكان المفتاح دة او دة او دة ممكن يدخل منة لدرجة ان انا فضلت احاول لمدة ساعة كاملة لحد ما دراعى وقف وزهقت فطلعت برة العربية وقعدت على الرصيف وقعدت افكر

مهو اكيد فى حتة عدة بتفك الصامولة دى مش معقولة يعنى الخواجة ربطها وقالها (روحى انتى مش هتتفكى)

قلت بس مفيش غير طقم اللقم اللى عندى هوة اللى هيجيبها




ركبت لقمة 12 والتطويلة المناسبة ليها على المفتاح السستيم ودخلت تانى نايم على ضهرى واحاول واحاول واحاول

المشكلة كانت ان اللقمة 12 مش راضية تعشق فى الصامولة خالص

قلت طيب اجرب اللقمة لوحدها بدون تطويلة والمفتاح السستيم
جربتها لقيتها ركبت زى الفل وعشقت

طلعت اللقمة وركبت فيها التطويلة وقلت اعشقها وبعدين اركب فيها المفتاح السستيم

مش راضية تعشق خالص مع الصامولة

طلعت اللقمة تانى والتطويلة وبصيت لهم وبعدين حاولت ابص على الصامولة

ففهمت المشكلة


المشكلة كانت ان الصامولة مربوطة على مسمار طولة حوالى 3 سم فلازم يكون فية فراغ فى اللقمة 3سم عشان المسمار يخش فيهم واللقمة توصل للاخر وتعشق



وطلعت تانى قعدت برة العربية افكر وافكر
طب وبعدين
مهو اكيد فية طقم لقم عمق الخرم اللى فى نص اللقمة يسمح للمسمار انة يعدى منها عشان اللقمة تعشق فى الصامولة

يعنى اية يعنى

اروح اشترى طقم لقم بمبلغ وقدرة عشان افك صامولة
ولا اروح زى التلميذ الفاشل اللى معرفش يعمل الواجب لاى ميكانيكى اقولة ييجى يفكلى صامولة12


اهو دة اللى ناقص

وبعدين قعدت مع نفسى خمسة وتذكرت انة لما كانت حاجة تعصلج معايا قوى وتصعب عليا كنت بقول حديث للنبى علية الصلاة والسلام وربنا يسهلها معايا

(اللهم لا سهل الا ما جعلتة سهل وانت تجعل الحزن ان شئت سهلا)

ولميت العدة اللى انا شغال بيها وقعدت ابصلها كدة ثم لمعت فى ذهنى فكرة انى اعمل اللقمة اللى انا عايزها

رحت جايب اللقمة 12 وقطعتها بالصاروخ نصفين

وبعدين جبت النص العدل وقعدت اكل منة بشكل مضلع على الصاروخ بتاعى عشان يطلع عندى فى الاخر راس للقمة يركب عليها مفتاح 10 وتتخطى كل العيوب اللى كانت فى المفاتيح التانية


وبعد ما خلصت وجربت كان لازم انى اعمل العمق اللى انا عايزة 4 سم عشان المسمار يعدى فية واللقمة تعشق على الصامولة

فجبت الشنيور ومسكت اللقمة بالبنسة القفش وطولت العمق بتاع اللقمة عشان تعشق على الصامولة




ودى التفاصيل عشان تفهموا انا قصدى اية








وسميت باسم اللة ودخلت تاتى العربية ونمت على ضهرى وشبطت اللقمة على الصمولة لقيتها عشقت
ركبت مفتاح عشرة ناحية وناحية ركبت
قلت الحمد للة
وفكيت الصامولة (الرخمة بنت الرخمة بنت الرخم)
وبعدين اتعدلت وانا قاعد فى العربية
وفكيت المسمارين اللى كنت فكيتهم نص فكة فى الاول بايد والايد التانية ماسكة الدركسيون من تحت عشان ميقعش

بعد ما هتفك الدركسيون مش هيطلع معاك علطول لان نهاية قطمة الدركسيون حتة مبططة بتخش حشر فى المكان دة




هتشد القطمة كلها بالعقل لبرة لحد ما تحررها
ودة كان الشكل النهائى




وربنا يسهل الايام اللى جاية واقدر ارفع باقى المواضيع
وبكدة يبقى انا عملت موضوعين من اصل 11 موضوع بالصور والشرح

نسيت حاجة بسيطة خالص
قبل ما تفك لازم يكون العجل الامامى عدل (فى وضع مستقيم)

ربنا يسهل
واى استفسار انا حاضر
مصطفى حسن
العاشر من رمضان

[tefa22m]

ايه يا باشا الشغل العالى اوى ده
ده انت مدرسه فى السيارات

[مصطفى-حسن]

ايه يا باشا الشغل العالى اوى ده
ده انت مدرسه فى السيارات

دة بس من ذوقك
وبعدين الحاجة ام الاختراع

[vovoasw]

ما شاء الله عليك الله اكبر ربنا يحرسك ويحفظك من اى سوء واشكرك شكرا جزيلا على ما تعلمتة منك والله استاذ

[ketoo]

ايه يا عم الشغل العالى دة الله يباركلك وياريت الادارة تثبت مواضيعك ليستفيد منها جميع الاعضاء

[abo rodina]

كنت فين من زمان يا دكتور؟؟؟؟؟؟

[مصطفى-حسن]

ما شاء الله عليك الله اكبر ربنا يحرسك ويحفظك من اى سوء واشكرك شكرا جزيلا على ما تعلمتة منك والله استاذ

ربنا يحفظك يا باشا ويزيدك من نعمة عليك
ومتشكر جدا لردك الجميل

[مصطفى-حسن]

ايه يا عم الشغل العالى دة الله يباركلك وياريت الادارة تثبت مواضيعك ليستفيد منها جميع الاعضاء

ربنا يباركلك
واضم صوتى على صوتك فى موضوع التثبيت

[Khaled Lanos]

ايه ياعم الشغل العالي دا بسم الله ماشاء الله تسلم ايدك والله..انت كدا انضميت للمواضيع الجامدة زي بتاعة عصام غنايم والناس الجامدة اللي في المنتدى

ومستني منك موضوع فلتر التكيف على أحر من الجمر ههههههه

تحياتي ليك يا باشا.

[mostafa mahmod]

الله ينور
شغل فنادق من الاخر
مستنيين باقى المواضيع يا باشا و ربنا يجازيك خير ان شاء الله

[مصطفى-حسن]

كنت فين من زمان يا دكتور؟؟؟؟؟؟

تحت امرك لو محتاج حاجة

[tarek_2005]

شغل اكثر من رائع والمشكلة بتاعة الصامولة كان يكفيك انك يكون معاك لقمة ويد ¼ بوصة هتفي بالغرض وتعمل جيداً في هذا المكان وتم فكها من قبل مرات بالطقم ده

[مصطفى-حسن]

شغل اكثر من رائع والمشكلة بتاعة الصامولة كان يكفيك انك يكون معاك لقمة ويد ¼ بوصة هتفي بالغرض وتعمل جيداً في هذا المكان وتم فكها من قبل مرات بالطقم ده

منور الموضوع ياباشا
بس انا للاسف الطقم اللى معايا اللى هو الصغير
اصغر من دة
بس انا كنت عارف ومتأكد انة اكيد فية طقم بيفك الصامولة دى
ولجأت للاجتهاد عشان مغرمش تمن طقم جديد لان انا عارف ان اقل تمن لية فوق 200ج
ونجحت الفكرة
ودة كان الفرق فى العمق بين اللقمة اللى انا عملتها واللقمة الاصلية






ودة كان شكلها لما ركبتها وفكيت بيها بمفتاح 10 ناحية وناحية

[batviser]

استاذذذذذذذذذذذذ ... موضوع رائع ... مستنى باقى الموضوعات ....
ليا سؤال لو تعرف ....
بعد فك القطمه ... ازاى ممكن اغير اويل سيل الى بين القطمه و السكاترا ... عشان عندى ابتدا يرشح زيت خفيف ...
و نفسى اعمله بنفسى ....

[مصطفى-حسن]

استاذذذذذذذذذذذذ ... موضوع رائع ... مستنى باقى الموضوعات ....
ليا سؤال لو تعرف ....
بعد فك القطمه ... ازاى ممكن اغير اويل سيل الى بين القطمه و السكاترا ... عشان عندى ابتدا يرشح زيت خفيف ...
و نفسى اعمله بنفسى ....

رفعت لك صورة فيها الشرح
بس خلى بالك
لازم يكون بالك طويل

وتكون اصلا شخص غاوى فك وتركيب وانك تعمل حاجتك بايدك
مش لمجرد انك شوفت الموضوع يبقى هتبطقة

ولازم يكون معاك كل اشكال مفتاح 12 واهم حاجة اللقمة العميقة اللى قال عليها الاستاذ طارق فى المشاركة اللى فوق عشان متتسحلش زييى

الشغلانة كلها بتخلص بمفك صليبة ومفاتيح 12 ولقمة 12 مناسبة
وربنا يوفقك