بخصوص الفرامل

[bebom]

انا النهارده نازل من علي الكوبري مورت وبطلت العربية ادوس فرامل مفيش نهائي

دورت لقية الفرامل 100% سليمة وكويسه جدا
ده طبيعي ولا في حاجة
انا مغير ماستر فرامل عمومي تيل من3شهور

[Mohamed ELOoL]

دة طبيعي يا باشا :)

[exact]

اعتقد ده طبيعي جدا لأن السيرفو بيعتمد على الفاكيوم اللي الموتور بيطلعه... لو حصل لااااااااااااازم تعشق العربية وتستعمل فرامل اليد بس بحذر شديد جدا جدا

[blazer]

هو انت عاوز تعمل حادثة او تودى نفسك وغيرك فى داهية؟
ايه التصرفات الغير مسؤله دى!!!!!!!

[mshmshm3]

الفرامل حجرت
ماتعملش كدة تاني عشان ممكن ماتلحقش تدور العربية و تلبس في حد او تحضن السور

[truss]

غلطتين عملتهم اثناء استخدامك للفرامل و الغلط اكبر خصوصاً و انت نازل من على كوبرى:
1- انك مورت العربية
2- انك بطلت العربية

[Mohamed ELOoL]

غلطتين عملتهم اثناء استخدامك للفرامل و الغلط اكبر خصوصاً و انت نازل من على كوبرى:
1- انك مورت العربية
2- انك بطلت العربية

اشمعنا يا باشا و انا ميمور غلت !!!

[amr_adel00]

طبعا مع احترامى ليك
اوعى تعمل كده تانى ابداااااااااا.
والحمد لله ان محصلش حاجه..
انت لما بتبطل العربيه كده بتلغى الفرامل تماما لان الفرامل معتمده على السيرفو و ده بيشتغل لما تبقى العربيه دايره مش زى عربيات زمااااااان..

[a_arazik]

طبيعي جدا جدا عشان الفرامل بتعتمد علي السيرفو وانتا بطلت العربية

[tarek_2005]

يا شباب الفرامل بتشتغل حتي والعربية مبطلة الفارق الوحيد انك والعربية دايرة بتحتاج ضغطة خفيفة اما لو مبطلة هتحتاج ضغطة ناشفة اوي علي البدال
موضوع تبطيل العربية علي منزل الكوبري خطر علشان الدريكسيون ممكن يسوجر فقط
المور بيحتاج ضغطة فرامل متقطعة وبيطول مسافة الوقوف شوية

[truss]

اشمعنا يا باشا و انا ميمور غلت !!!

يفضل اثناء الفرملة انك تسيب العربية واخدة غيار للاستفادة بفرملة المحرك (لما تشيل رجلك من على دواسة البنزين العربية بتتكتم و بتهدى) فتقلل الحمل من على نظام الفرامل فى العجلات وبالتالى الفرامل كفائتها تبقى احسن.
و الغلط اكبر و انت نازل من على كوبرى لان العربية وهى فى منزل بتكون فى حالة تسارع بسبب وزنها و بالتالى الحمل على الفرامل بيكون اكتر و اكتر .

[Mohamed ELOoL]

يفضل اثناء الفرملة انك تسيب العربية واخدة غيار للاستفادة بفرملة المحرك (لما تشيل رجلك من على دواسة البنزين العربية بتتكتم و بتهدى) فتقلل الحمل من على نظام الفرامل فى العجلات وبالتالى الفرامل كفائتها تبقى احسن.
و الغلط اكبر و انت نازل من على كوبرى لان العربية وهى فى منزل بتكون فى حالة تسارع بسبب وزنها و بالتالى الحمل على الفرامل بيكون اكتر و اكتر .

شكرا يا باشا علي الافادة

بس دة في الحالة المفاجئة مش كدة !

يعني في العادي مش مشكلة عشان انا علطور بمور لما بدوس فرامل

( انت كلامك صح بس دة للي معهوش فرامل ... بيعشق غيار اقل زي الاول و التاتي عشان تقف )

ولا انت شايف ايه !

[MMamdouh]

يعني في العادي مش مشكلة عشان انا علطور بمور لما بدوس فرامل

كدة غلط

متمورش الا اذا كانت العربية خلاص هتبطل من استخدام الفرملة

MMamdouh

[mado83]

كدة غلط

متمورش الا اذا كانت العربية خلاص هتبطل من استخدام الفرملة

mmamdouh

افهم من كده ياممدوح ان الواحد لما يجى يفرمل مايمورش العربيه
يعنى لما بكوننازل من كوبرى وشايف الطريق واقف من بعيد بمور العربيه وادوس فرامل

[Ahmed Nasser]

بص لما تيجى تفرمل شيل رجلك من على البنزين ودوس فرامل من غير ماتدوس على الدبرياج
لغاية ما تلاقى الار بى ام هينزل تحت الواحد سعاتها تفصل حركة او تمور