المساعدة بسرعة من الخبراء

[MEMOAHMED14]

انا معايا دايو لانوس 2007
انا نازل من ساعتين رايح الشغل بالعربية ودورت وسخنت العربية عادى ولس برجع لورا شوية بيها ولقيت صوت صفارة جامدة .. وانا راكن العربية على مطلع فالمفروض لما اسيب فرامل العربية تمشى لوحدها على المنزل بس لقيتها مبتنزلش ... زى ما يكون حاجة جامدة قفشة فى العربية ... المهم فكيت العجلة اللى ورا ودقيت على الطنبورة فالصوت راح شوية وركبت وطلعت على الطريق بس وانا ماشى جاى ادوس فرامل لقيت الدواسة بتنزل للاخر ومفيش فرملة وبعدين تتقل تانى .. انا وقفت وخفت لانى كنت هلبس فى عربية ولفيت ورجعت تانى... عايز اعرف منكم دلوقتى المشكلة فى الفرامل ولا حاجة تانية ... عشان انا مستنى شوية واروح للميكانيكى بس عايز ابقى عارف المشكلة من ايه....
مستنى الرد

[MEMOAHMED14]

أرجو الرد....

[MEMOAHMED14]

ايه ياجماعة هو الموضوع صعب كده ...

[MITSUKERO]

ماستر فرامل خلفي وش

هرد عليك بالتفصيل دلوقتي بالصور

[MITSUKERO]

شوف الموضوع ده:

http://www.nilemotors.net/Nile/319989-a.html

و شوف سبب ان الفرامل كانت بتقفش بقي :

الماستر بيبقي قافش يعني ايه ؟ يعني بدل ما يفتح و يرد لا بيفتح و مش بيرد

الحل انك تغير ال 2 ماستر الخلفي

و هتسمع كلام كتييييييييييييييييييييييييييييييييييييييير جدا بقي و في الاخر جرب بنفسك قبل اي تغيير و اطمن

هتعمل ايه بقي ؟

اول حاجة هتفك الطنبورة و التيل و تشوف بايدك الماستر قافش ولا لا

طب ازاي ؟

بمنتهي البساطة هتضغط عليه بصوابعة من الاتجاهين و لو دخل معاك و رد يبقي سليم لو لقيته قافش غيره فورا

الصور :

دي صورة الماستر القافش عندي اللي دقيت عليه بالشاكوش لما طلع مرضيش يتحرك !!!



و دي صورةالماستر الجديد و الصنايعي ضاغط عليه


و دي صورته لما رد لوحدة لما شال ايده:


انا طبعا غيرت حاجات كتير من كتر الخوف لان العربية كانت هتتقلب بيا و هي اساسا مراتي اللي بتركبها انا بركبها كل اسبوع بس اطمن عليها و اريح عربيتي شوية فانت مش متخيل الرعب اللي كنت فيه بس دي فرامل يعني حياتك

و برضة اطمن علي سلك فرامل اليد احسن يكون قافش

والله اعلي و اعلم