مية الرادياتير بتنقص بسبب وجود هوا في دورة المية

[gassarian]

أعرف ازاي وجود هوا في دورة المياة و ايه الحل و بتيجي من ايه؟

الرادياتير لسة مصلحه كان فيه تسريب من الفيبرة اللي في جنبه و حاليا مفيش تسريب ظاهر و المية نقصت حاجات بسيطة زي كوباية في أسبوعين
هل تشغيل التكييف السخن بيقلل المية في القربة؟

[tarek_2005]

اكبس دورة التبريد الاول ولو تمام اعتقد دا بداية جوان وش سلندر

[gassarian]

اكبس دورة التبريد الاول ولو تمام اعتقد دا بداية جوان وش سلندر

و إيه أعراض جوان وش السلندر؟؟؟ هل نقص المية فقط؟؟؟
العربية مظبوطة و دخانها نضيف و بتعرق مية و سحبها كويس و إستهلاكها كويس جداً و صياناتها مضبوطة في مواعيدها و قبل مواعيدها

[mostafa mahmod]

متابع

[tarek_2005]

موضوع تعريق المياه دا يؤكد كلامي

اكبس الدورة لو مفيش تسريب يبقي جوان

[محمد الشامي]

العربية مظبوطة و دخانها نضيف و بتعرق مية و سحبها كويس و إستهلاكها كويس جداً و صياناتها مضبوطة في مواعيدها و قبل مواعيدها

المكنه عندي كانت بنفس الوصف اللي حضرتك بتقوله , وبردو عانيت كتير من حكايه نقص الميا وتغيير لون الميا دايما الى البنى الفاتح , وقررت اني اغيير جوان وش السلندر , ومع الفك تبيين ان الجوان القديم كان ملسوع (حسب وصف الميكانيكي) وهو اللي كان عامل المشاكل دي

والحمد لله بعد التغيير اصبح معدل نقص الميا عادي جدا

[tarek_2005]

المياه ليس لها معدل نقص مياه التبريد لا تنقص ابداً لو الدورة سليمة

[MEDHAT MOHAMED]

سلام عليكم انا برضوا عندى مياه بتنقص تقريبا بمعدل كل يومين بتنقص تبقى حاجه بسيطه لسه مغير الرداتير فى عربيه اوبل فيكترا 2002 لو حد يعرف تكلفه جوان وش سلندر تقريبا كام ممكن يقولى وانا هروح تانى للراجل بتاع الرادتيرات يشوفلى موضوع الهوى دى وربنا يستر بقى

[محمد الشامي]

المياه ليس لها معدل نقص مياه التبريد لا تنقص ابداً لو الدورة سليمة

اظن ان ده نظرياً فقط :) لكن عملياً الوضع بيختلف

[tarek_2005]

اظن ان ده نظرياً فقط :) لكن عملياً الوضع بيختلف

عملياً سيارة اختي من ساعة مستلموها من التوكيل ولمدة خمس سنوات لم يعرفوا كيفية فتح غطاء القربة الا عند تلف ماسورة الشجرة
عربيتي لما بعتني بيها بقعد ست اشهر مببصش علي الميه نهائي

[MMamdouh]

احب بس اضيف ان وجود هوا فى دورة التبريد عمرة ما هيخللى المية تنقص... دا يخللى العربية تسخن فقط

MMamdouh

[gassarian]

العربية مش بتسخن خالص عندي و كله بالنسبة لها تمام.........
عموماً أنا بتايعها كل كام يوم عشان أتأكد إنها بتقل........
و بالنسبة للتعريق المية من الشكمان فده بيحصل في الصبح بعد التسخين و بينشف بعد المشي شوية و لكن سبتها شغالة على الواقف فترة طويلة بتفضل معرقة لحد ما أدوس بنزين شوية بتفضي المية و تنشف

هو مش مفروض لما وش السلندر بيبقى فيه حاجة الزيت بيخلط على المية؟؟؟؟

[محمد الشامي]

مع كامل احترامي لأراء جميع الزملاء :)
انا لما كان عندي جوان وش السلندر ملسوع كانت الحراره طبيعيه ومش بتزيد عن معدلها (قبل النص بشويه) ولكن كان اهم اعراض عندي هي تغير لون الميا دايما الى البنى الفاتح (بدون ما تعمل طحينه زي ما بيقولو) وكانت دايما دورة التبريد جواها ضغط هوا زياده عن الطبيعي , وتزامن معاها نقص في الميا وربما كان سبب نقص المياه هو تسريب من احد الوصلات , وتم اصلاحه اثناء عمليه تغيير جوان وش السلندر

مش عايز حد يعتبر رأيي مخالفه لرأيه :) بس انا حكيت شئ واقعي وحصل معايا بالفعل

[ahmedteam]

فى اخر مقابله لمنتدى الدايو كنا بنسأل طارق عن موضوع وش السلندر ده و قال ان من اعراض تلفه حاجه من اربعه :

1- انه بيدخل المياه على الزيت (تلون المياه) نقص المياه
2-نه بيدخل المياه على غرفه الحريق يؤدى الى نقص المياه
3- انه بيدخل الزيت على المياه(الطحينه اللى يتكون فى الرياداتير) نقص الزيت
4- انه بيدخل الزيت على غرفه الحريق يؤدى الى نقص الزيت

اعتقد ان عندك رقم 1 و يا رب اكون نقلت المعلومه صح على قد ما افتكر و يا ريت تصححولى

[MMamdouh]

مع كامل احترامي لأراء جميع الزملاء :)
انا لما كان عندي جوان وش السلندر ملسوع كانت الحراره طبيعيه ومش بتزيد عن معدلها (قبل النص بشويه) ولكن كان اهم اعراض عندي هي تغير لون الميا دايما الى البنى الفاتح (بدون ما تعمل طحينه زي ما بيقولو) وكانت دايما دورة التبريد جواها ضغط هوا زياده عن الطبيعي , وتزامن معاها نقص في الميا وربما كان سبب نقص المياه هو تسريب من احد الوصلات , وتم اصلاحه اثناء عمليه تغيير جوان وش السلندر

مش عايز حد يعتبر رأيي مخالفه لرأيه :) بس انا حكيت شئ واقعي وحصل معايا بالفعل

دة حصل لان التلف فى الجوان او الوش كان بين غرفة الحريق و دورة التبريد فا البساتم كانت بتكبس العادم فى دورة التبريد... دة سبب تغير لون المية و زيادة الضغط فى دورة التبريد و لو شميت الهوا اللى بيطلع من القربة لما تفتحها هتلاقى ريحتة عادم

نقص المية بيحصل لما تبطل و يبقى مفيش كبس فى البساتم بتبداء مية التبريد تخرج من دورة التبريد (ضغط عالى) الى غرفة الحريق (ضغط جوى)

دة حصل فى عربية ابن خالتى و البستم اللى عندة المشكلة دى كان البوجية بتاعة علية صداء

MMamdouh