تم بحدلله تغيير الفتيس الاوتو الكهربا للنوبيرا الخليجى

[Ahmed Nasser]

بسم الله الرحمن الرحيم
السلام عليكم ورحمة الله وبركاتة

اعضاء المنتدى الكرام
حبيت انقل ليكم تجريبتى فى تغير الفتيس الكهربا للنوبيرا
نكلم على الفتيس الاول الفتيس دة بيكون نازل على النوبيرا الخليجى والاروبى بيكون 4 سرعات امامية ويوجد زر powr
ووظيفتة انك لما تحب تدوس وتجرى بالعربية بتشغلة بداية من سرعة 80 وطالع ومينفعش تشغلى اقل من السرعة دى عشان مش هتحس انه بيعمل حاجة

ويوجد به ايضا زر hold
ووظيفتة انه بيخلى العربية تنقل على rpm 2.5
ولما تدخل فى صحرا مثلا مابيخليش العجل يعمل امركانى والعربية ترغز

يوجد ايضا كنترول خاص بالفتيس وكنترول خاص بالموتور ويوجد بوابة كهرباء

نيجى بقى للعطل اللى ظهر
اولا الفتيس دة بتاع العربية استاندر واول مرة يتفك من مكانة
والعربية موديل 1999 وعاملة 161 الف كيلو متر
وخلاص الفتيس جاب اخرة وبقى مريض بكل الامراض الممزمنة والمصتعصية
وطبعا سمعنا كلام كتير اللى يقولك الفتيس دة تمنة 2500ج واللى يقولك مش موجود
ويا اما تجيب الفتيس الواير العادى يا اما تقلب العربية مانوال وتريح دماغك

نسيت اقول الفتيس لم اباظ كان بيعمل ايه
كان ياسيدى تجيب النقلة تلاقى رزع وهبد وكان العربية لبس فيها نقل تقيل
وكان لما تمشى بالعربية كانت بتكلبش العجلتين اللى قدام واللى سايق بيلبس فى الدريكسيون
فكانت هنا العربية بندوس على زر hold وكانت بتمشى كويسةوخلاص
وسعات كانت بتاخد النقل والعربية تبطل

المهم روحنا لمدينة الصناعة فى الفيوم عند واحد اسمة احمد كان شغال فى توكيل دايو
جرب العربية والراجل جزاه الله خير مرضيش يفتى ويقول اى حاجة

قالنا هبعتك لواحد متخصص فتيسات وهو هيقولك على المفيد
روحنا للراجل وهو محترم جدااااا

بعد التجربة قال دة كدة علبة البلوف هى اللى بايظة
هما بيسموها عقل الفتيس

المهم هتجيب دلوقتى فتيس استيراد وسعرة 1200ج
كام ياعم ؟؟ انت عارف ان ده فتيس كهربا مش الواير قالى ياباشا انا عارف شغلى كويس قوى ومش اول مرة افتح كبوت نوبيرا خليجى
كدة كويس قوى الراجل خدنا ورحنا لبتاع الاستيراد
وراح مطلعلنا واحد من المخزن وخلصنا فى السعر 1000 يابلاش
بس انا كنت قلقان من حاجة انا معرفش الفتيس عامل كام كيلو فى العربية اللى افك منها
بس الراجل قال معاك تجربة اسبوع
وقولنا للمكانيكى كام مصنعيتك قالك 250 ماشى ياعم اتوكل على الله وفك

وبالمناسبة احنا كنا لسه مغيرين الزيت بقاله شهرين والراجل قال زيتك هيشتغل عادى فى الفتيس الجديد

والمفاجاة ان الفتيس اللى جاى استيراد كان فية زيت ابيض اللى هو بيتحط للبسات والجيتا والفنتازيا
وكان الزيت نظيف جداااااااااا


ركبا الفتيس ودور دارت العربية واستنينا لما الزيت مشى فى الرداتير والمواسير
وجينا نقيس الزيت بقى الله اكبر الزيت طلع مظبوط


كدة مش فاضل غير التجربة
النقلات سلسة جدااااااااا
العربية بتجرى بغباوة وطلعتها بقت خفيفه ورشيقة
ومن اقل لمسة بقت بتعمل كيك داون
وتحس ان الموتور هياخد العجلتين اللى قدام وهيمشى ويسيب العربية
وعلى طول اى حد راكب ظهره بيلزق فى الكرسى من اقل دوسة
والحمدلله الفتيس زى الفل


وربنا يبارك لصاحبة فية
بالمناسبة العربية بتاع واحد صاحبى اسمة ا-مصطفى فتحى
وهو مسجل معانا هنا فى المنتدى باسم abo soheb

ودى صور الفتيس الاستيراد قبل التركيب

[Ahmed Nasser]

بسم الله بدا فك الفتيس القديم









ودى صور المرحوم بعد ماطلع

[a_arazik]

الف مبروك لصاحبك علي التغير وربنا يبارك فية يا رب

[Gelgel2004]

الف مبروك

الف مبروك و ياريت تقولنا الشغل ده اتعمل فين للافادة

[MITSUKERO]

مبروك ياباشا و حلو التقرير ده

ناس كتير بتشتكي من الفتيس الاوتوماتيك بتاع النوبيرا

[Ahmed Nasser]

الف مبروك لصاحبك علي التغير وربنا يبارك فية يا رب

الله يبارك فيك ياباشا

الف مبروك و ياريت تقولنا الشغل ده اتعمل فين للافادة

الله يبارك فيك
ما انا قولت الشغل معمول فى الفيوم

مبروك ياباشا و حلو التقرير ده

ناس كتير بتشتكي من الفتيس الاوتوماتيك بتاع النوبيرا

الله يبارك فيك
بص هو الفتيس دة مخلف عن الواير العادى
دة استهلاك بنزين واداء وعمر افتراضى احسن بكتير من العادى
وكفاية انة قعد شغال فى العربية 161 الف كيلو متر
ومش بايظ فيه الا علبة البلوف بس اما الباقى كلة سليم

[محمد الشامي]

الف مبروك الفتيس الجديد وشكرا على الشرح والصور

[lanos2004]

موضوع جميل جدا

[hamdyy010]

الف مبروك انا عندي نفس الفتيس ونفس العربية وربنا يسهل ان شاء الله هعملها قريب نفس الحركة دي وهحتاج خبراتك اكيد ان شاء الله
وربنا يبارك لصاحبة فية

[mhopa2440]

معلش سؤال غبي

انت جبت فتيس ويرات وركبته النتيجة النهائية الفتيس ويرات ولا كهربا ولو كان كهرباء كل حاجة شغلة اوفر درايف وهولد ولا ايه

وطبعا مجهود رائع وموضوع جميل جدا

[Ahmed Nasser]

الف مبروك الفتيس الجديد وشكرا على الشرح والصور

الله يبارك فيك يابو حميد

موضوع جميل جدا

نورت الموضوع ياكبير

الف مبروك انا عندي نفس الفتيس ونفس العربية وربنا يسهل ان شاء الله هعملها قريب نفس الحركة دي وهحتاج خبراتك اكيد ان شاء الله
وربنا يبارك لصاحبة فية

انت بس اول ماتفكر تعمل حاجة ابقى كلمنى
وانا تحت امرك فى اى وقت

[Ahmed Nasser]

معلش سؤال غبي

انت جبت فتيس ويرات وركبته النتيجة النهائية الفتيس ويرات ولا كهربا ولو كان كهرباء كل حاجة شغلة اوفر درايف وهولد ولا ايه

وطبعا مجهود رائع وموضوع جميل جدا

يابشا هية العربية اساسا نازلة بفتيس كهربا
والنتيجة النهائية كلة شغاااااااال تمام والحمدلله

[hamdyy010]

ربنا يكرمك يا برنس هو ده العشم بردو وربنا يسهل ان شاء الله
سؤال رفيع: انت اخدت الفتيس بالكنترول ولا من غيرة وهل انت كنت محتاج تغيرة ؟؟؟؟؟؟؟؟

[Benimaru]

ألف مبروك يأخي علي تغيير الفتيس بنحاح و اهم حاجة ان اصبح لدينا خبير في الفتيس الأوتوماتيك ....

[Ahmed Nasser]

ربنا يكرمك يا برنس هو ده العشم بردو وربنا يسهل ان شاء الله
سؤال رفيع: انت اخدت الفتيس بالكنترول ولا من غيرة وهل انت كنت محتاج تغيرة ؟؟؟؟؟؟؟؟

لأ احنا جبنا الفتيس فاضى تماما
كان فية بس السويتش بتاع عصاية الفتيس والحساس اللى جنبة وشكرااااااااااااا
اما الكنترول والكبالن وكل حاجة شغااااالة تمام
اللى كان بايظ فقط فى الفتيس القديم هى علبة البلوفة

ألف مبروك يأخي علي تغيير الفتيس بنحاح و اهم حاجة ان اصبح لدينا خبير في الفتيس الأوتوماتيك ....

الله يبارك فيك ياباشا