ما هى فائدة ثرموستات الكوعه للنوبيرا

[Viper12345]

سؤال لخبراء المنتدى انا عندى مشكله مجننانى فى النوبيرا بتاعتى انى المياه بتخلص من العربيه كل 4 ايام تقريبا ومفيييش اى حاجه بتسرب مياه نهائى رحت ل 4 ميكانيكيه و3 بتوع ريداتير وكل واحد يقول حاجه مختلفه اخر اتنين واحد قالى جوان وش السلند بس انا مش مقتنع بالكلام ده لان العربيه سحبها كويس جدا ومفيش طحينه فى الموتور او القربه ومفيش مياه بتخرج من الشكمان رحت لواحد تانى انهارده وقالى ان ثرموستات الكوعه قافل ومش بيقفتح خالص وده بيسخن العربيه وبيخلى المياه تتبخر من غير تسريب فاقترح عليا انى اشيلها خالص لانها ملهاش لازمه فحبيت اتاكد منكوا الكلام ده مظبوط ولا لا وايه فايدة الثرموستات ده اصلا وهل هيبقى فى مشكله لو شلته ومركبتش غيره
واسف جدا على الاطاله واتمنى انى الاقى عندكوا الحل لانى بدات اقفل من العربيه وبفكر ابيعها

[ahmedsamy90]

لو المشكلة في ثرموستات الكوعة غيرها بس متشيلهاش

[ahmedsamy90]

اقرا الموضوع ده
ثرموستات الكوعة... المفترى عليه

[Viper12345]

انا بشكرك جدا لسرعة ردك عليا بس سؤال لو الثرموستات علق فى وضع القفل هيخلى الميه تتبخر من العربيه وتخلص فى 4 ايام ولا ملوش علاقة؟؟؟

[ahmedsamy90]

العفو على ايه ........ بس انا مشاكل المية عندى كنت املاها وانزل بعدها بـ 3 ايام الاقيها مش موجودة ..... والسبب ان قربة الميه عندى كانت مشروخة من تحت وبتسرب والردياتير كان مخروم وملحوم قبل كده وسرب تاني وغيرته علشان ذهقت منه .... بس مش عارف ممكن ثرموستات الكوعة يعمل موضوع التبخير ولا لأ ...... اتمنى اكون افتدك بأى حاجة.

[Viper12345]

طبعا انا استفدت كتير من حضرتك بس انا غيرت القربه والريداتير قبل كده ومفيش حاجه بتسرب عندى وانا بدات افكر انى ابيع العربيه بسبب الموضوع ده مع انى بحبها جدا واخاف ادخل فى حوار جوان وش السلندر لانى بقلق منه

[dedi]

اعتقد فكرة الغاء الترموستات موش صح و العربية هتبقى باردة و تستهلك بنزين
انا غلبت فى موضوع تسريب المياة اعمل مشوار بالعربية و ارجع اطفى السيارة وراقبها و هى مطفية اعتقد انة ممكن يكون عيب تسريب
يارب اكون افدتك على قدر معلوماتى
لو الترموستات قافل كان جاب وش سلندر

[mhopa2440]

أولا الميكانيكي اللي قالك ترموستات كوعة الميه شيله مش ليه لازمة دا (متخلف ومش فاهم اي حاجة ومترحش ليه تاني) دي افتكاسات صنايعية اغبيه

دا مهم جدا جدا جدا
في الجو البرد في الشتاء يعني لما تمشي بالعربية على سرعة الهواء هيبرد المياه لدرجة ان كومبيوتر العربية يشتغل على وضع التسخين اول ما تشغل العربية وهتلاقي استهلاك البنزين حاجة غبية فوق ما انت تتخيل مش هتلاحق عليها والله ودا طبعا غير انه ممكن يكون ليه تاثير كبير على الشنبر لانه احتمال كبير جدا البساتم تاكل الشنبر

دا بيقفل لما الميه تسخن لدرجة معينة وبعد كدا يفتح عشان يحافظ على ثبات درجة حرارة الموتور

ثانيا بالنسبة لتسريب الميه ف احتمال مهم جدا هو طبات المياه ف الموتور ممكن يكون ف طبة ميه بتسرب وبسبب سخونة الموتور الميه بتتبخر مباشرة من غير ما تنقط على الارض لانه في طبات ف الموتور من الخلف من ناحية صدر العربية والمارش مش هتشوفها خالص

روح لميكانيكي يكون بيفهم يغير ليك الطبات الطبة تقريبا 5 ج بس المشكلة ف المصنعية بتكون غالية شوية عشان لازم يفك حاجات كتير عشان يركبهم دا طبعا لو مفيش اي تسريب ف الخراطيم او الردياتير

[lad]

لو الثرموستات قافل العربية كانت تسخن على طول فيه حاجة تانية بتسرب

[tarek_2005]

متوسط عدد الكيلو مترات المقطوعة في الاربع ايام كام كم

[MMamdouh]

لو الترموستات علق فى مضع مقفول الموتور هيسخن جدا جدا و مؤشر الحرارة هيخش على الاحمر

MMamdouh

[Viper12345]

انا بشكر كل اللى رد عليا انا استفدت منكم جدا بالنسبه لطبب المياه والتسريب مفيش اى حاجه بتسرب خالص ولا حتى علامة الصدا موجوده فى اى جزء من دائرة التبريد هل من الممكن ان يكون جوان وش السلندر بايظ والمياه تكون بتدخل على الشنابر وبتتحرق من البوجيهات؟؟؟؟

[Viper12345]

متوسط عدد الكيلو مترات المقطوعة في الاربع ايام كام كم

من 450 ل 500 كيلو

[MMamdouh]

اكبس دورة التبريد

MMamdouh

[Viper12345]

اكبس دورة التبريد

mmamdouh

كبستها ومفيش اى تسريب للضغط