مشكله في تكييف النوبيرا

[moudy88]

السلام عليكم زرحمة الله وبركاته

التكييف عندي في مشكله ...على السرعات العاليه والطرق الطوالي قوة هوا التكييف بتقل وتضعف لحد ماتتسد

ويبقى سرعة المروحه على 3 ولا كأنها على 1 مع صوت عالي وكأن الهوا محبوس جوا التابلوه

ولازم اوقف العربيه وابطلها شويه وبعد كده ترجع المروحه عادي ...وبكده تشغييل التكييف في السفر بقى صعب جدا الا لو جبته على 4 وهيبقى كأنه على2

مع العلم ان قوة التبريد اصلا ضعيفه وبالذات لما تكون العربيه واقفه ومش عارف دي مشكلة كمبريسور ولا شحن ؟؟

[Gelgel2004]

ممكن تتصل بكوول اير
26202455 - جسر السويس
و ان شاء الله تجد عندهم الحل

[al_manara]

ممكن يكون عيب ترموستات التكيف . مش بتخلي الكباس يفصل فبتكون تلج . وبالتالي التكيف يضعف والهوا يقل . اما تحصل لك المشكلة افتح الكبوت وشوف في تلج علي خراطيم التكيف الباردة ولا لا

[moudy88]

المروحه اللي بتقل مش تبريد الهوا ...هل فيه علاقه مابين الكباس والمروحه ...لو مفيش كباس اصلا ..المروحه بتشتغل بنفس قوتها

[moudy88]

محدش يعرف تشخيص المشكله ايه

[i_Am_Legend]

غير التربينة..المروحة اداخلية نفسها

[3ateef]

تقريبا المشكلة فى التلاجة, اللى موجودة ورا الدرج بتاع التابلوه.

[samfady]

نفس المشكله كانت عندى
ده بلف الكباس تمنه 150 وبيتغير فى 2 دقيقه

[mhopa2440]

متابع لذات المشكلة عندي

بس التكييف اتحسن جدا معايا لما نظفت السربنتينة الداخلية اللي تحت الطابلوه وبقى نسبة التبريد ممتازة جدا وانخفاض سرعة المروحة بيكون بداية من 3 ار بي ام بس بعد عملية التنظيف بقى انخفاض السرعة قل بصورة كبير

لو ف اي حد يعرف اساس المشكلة او اي حل ليها ياريت يفيدنا

[tarek_2005]

عيب حاجة من الاتنين
1 - تراب علي التلاجة بيتندي من البرودة وبيسد مجاري هواء الثلاجة
2 - زيادة شحنة فريون

[hany111111]

المشكلة عندى اكبر من كده بكتيرررررررر:
انا غيرت الكباس 3 مرات استيراد وكل مرة ميكلش شهرين واسمع صوت الكركرة عالى جدا

فى حاجة تانية دايما بحس بهواء سخن من تحت الطارة

ممكن حد يجوبنى ضرورى ولو حد فى الجيزة ويعرف يدلنى على محل بيبيع كباس جديد وصنيعى كويس عشان انا اتشقمت من اللى بتعامل معاه

او حد يكون بيعمل تعديل على الكباس ويركب واحد يابانى مكانه زى تكييف التويوتا

[asas630]

ممكن يكون عيب ترموستات التكيف . مش بتخلي الكباس يفصل فبتكون تلج . وبالتالي التكيف يضعف والهوا يقل . اما تحصل لك المشكلة افتح الكبوت وشوف في تلج علي خراطيم التكيف الباردة ولا لا

الدايو مفهوش ثرموستات ده موجود في العربيات الي فيها تكيف تتش

[asas630]

المروحه اللي بتقل مش تبريد الهوا ...هل فيه علاقه مابين الكباس والمروحه ...لو مفيش كباس اصلا ..المروحه بتشتغل بنفس قوتها

بس يا سيدي مشكلتك كالاتي تكمن في بلف كنترول (control valve) في الكمبريسور وده وظيفته في الطوالي او حتي في الزحمة بس لما تكون الدنيا باليل اي الحمل الحراري كبير منع تكوين التلج علي التلاجة (evaporator) المسمي عند الصنايعية التلاجة مليسة من التلج مما ينتج عنه
1-ضعف في كفأءة التبريد حتي تكاد تختفي مع الوقت في الطوالي
2-ضعف مستوي الهواء الخارج من المروحة لان المسارات مسدودة بالتلج والدلالة علي كدا جرب تشغل المروحة من غير تكييف حتلاقي مستوي الهواء تمام بيدا يقل مع الوقت
3-مع الوقت واهمال التصليح الكمبريسور بيقفش
تمنه تقريبا من 150 ال 200 ج

اتمني اني اكون اصبت وتتحل المشكلة

[asas630]

نفس المشكله كانت عندى
ده بلف الكباس تمنه 150 وبيتغير فى 2 دقيقه

+1111

[asas630]

وفي حل مؤقت لحين الاصلاح وانت في الطوالي كل ماتحس بنقص في الكفاءة افصل افصل التكيف وسيب المروحة شغالة لمدة دقيقة كدا وشغله تاني كرر العملية ديه كل ربع ساعة واهو اديك بتوازن مبتقرفش نفسك وبتحافظ علي الكباس

ملحوظة اثناء الفصل حتلاقي بخار طالع متقلقش ده التلج بيسيح