مساعده فى سيارتى نوبيرا 2 مخنوقه جدا

[coco2003]

السلام عليكم
يا جماعه انا معايا نوبيرا 2 موديل 99 اوروبى المشكله ان العربيه مخنوقه جدا وفى سحبها وحش
وكمان فى المطالع لو العربيه على الغيار المظبوط السرعه بتفضل تقل واطل اجيب غيار اقل
محتاج حد يشوفلى حل فعلا الموضوع تعبنى جدا
وكمان لما بشغل التكييف العربيه بتكون بتموت وتقريبا بتتحرك كانى بزقها
محتاج حد يشوفلى حل
برجاء حد يساعدنى

[a_arazik]

طيب قولنا الاول اخبار الصيانات بتاعت العربية اية والعربية مانيوال ولا اتوماتيك

[Khaled Lanos]

أبدأ اعملها طقم سيرفيس..غير البوجيهات..وفلتر البنزين..وفلتر الهواء..ونظف البوابة والحساسات..ولو لمبة التشيك بتنور اكشف عليها بجهاز كشف الأعطال عند أي متخصص..ومتنساش تغير زيت المتور والفلتر.
هي مانيوال ولا اتوماتيك؟

[coco2003]

انا فعلا غيرت البوجيهات والفلاتر والزيت
لكن منضفتش البوابه لسه
العربيه مانيوال
انا لسه شارى العربيه من شهر

[Ahmed Amin]

أحتمال كبير أووي تكون عندك طرمبة البنزين بتودع, أو فيها تهريب داخلي, عشان كدا ضغط البنزين اللي رايح للموتور قليل ومأثر علي سحب العربية في الطلعة والمشي والمطالع,

لو أنت غيرت الفلاتر والبوجيهات والزيت, نضف البوابة كمان,
ولو مفرقتش يبقي العيب في الغالب طرمبة البنزين, ومهياش غالية عشان متقلقش, من 90 ل 120 جنيه.
ولو لسه شاريها من شهر, ممكن اللي قبلك يكون كان مغيرها واللي ركبها جاب نوع تعبان,
أو أتركبت كروتة ومتربطش علي الخراطيم وفيها تهريب داخلي جوا التانك عشان كدا ضغط البنزين اللي رايح للموتور ضعيف.

[coco2003]

طيب اتاكد ازاى انها طلمبه البنزبن

[Ahmed Amin]

لو العربية بتغيب الصبح ف الدوران وهيا باردة وبتدور من اول مرة وهيا سخنة يبقي فيه تهريب داخلي في الطلمبة و الضغط ضعيف
لو فيه ونة أو زنة طالعة من تحت الكنبة الخلفية والعربية دايرة يبقي الموتر ضعف وبيودع,,

ولو تقدر تكلمه وتسأله هوا غيرها قريب ولا لأ, عشان نعرف لو أتغيرت قريب هتبقي أتغيرت بحاجة تعبانة او متربطش عليها كويس.

وبجانب الصيانات اللي أنت عملتها دي,

انا فعلا غيرت البوجيهات والفلاتر والزيت
لكن منضفتش البوابه لسه

بعد ما تنضف البوابة غير فلتر البنزين لو لسه مغيرتوش, لأنك متعرفش حالته عاملة أزاي وأتغير أخر مرة أمتي,
وبعد ما تغير فلتر النزين هتحط منظف الرشاشات علي تفويلة بنزين بعد ما تغير الفلتر مش قبل,,

من أحسن الأنواع STP Injection Cleaner
هتلاقيه في أمارات مصر والبنزينات النضيفة وهات منهم أفضل لأن برة ممكن تجيب منه مضروب,



ولو عندك رعشة مع التكييف أكشف علي قواعد الماتور والفتيس, لأنها بتكون سبب في ضعف سحب العربية, ويتخلي العربية أتقل مع تشغيل التكييف.

وأخر حاجة بما إن العربية إستعمال وبقالها معاك شهر متنساش تغير سير الكاتينة لو كاوتش ومش جنزير,
لأني معرفش هوا في النوبيرا كاوتش ولا جنزير,
وتاني دا مالوش علاقة بمشكلتك بس أنا قولت أفكرك بيه لأن ناس كتير بتشتري أستعمال وتنسي تغيرة وبعد كدا يقطع ويكلفها,, أو تعتمد علي كلام البايع اللي ممكن يقول أنه غير وعمل كل الصيانات وهوا بيبيع كلام ومعملش فيها شغل.

الحاجات اللي انت غيرتها واللي فاضلة لك دي كلها لازم تعملها بما أنك شاري العربية أستعمال,
عشان ترجع أدائها للطبيعي وتحافظ عليها معاك.

وأبقي طمنا عملت أيه, وكان السبب من أيه.

[mhopa2440]

كل كلام الرجالة زي الفل ومطلوب تعمله طبعا

بس كل الحاجات دي صعب توصل العربية للمرحلة الصعبة دي

اولا لو عربيتك مانيوال يبقى لازم تكشف على الديسك والاسطوانة وتشوف مدى ارتفاع عداد الر بي ام مع عداد السرعة يعني على السرعة الثانية لما بيكون ار بي ام 3 السرعة بتكون كام ونفس الكلام على السرعة الثالثة والرابعة

ثانيا العربية متلتة ولا أيه يعني كل البوجيهات شغاله (اكشف على الموبينة)

ثالثا طلبمة البنزين لو ضعيفة العربية هتنتش معاك وخصوصا لو دوست بنزين مرة واحدة

رابعا الحساسات

وياريت تبقى ترد انت عملت ايه لما حليت المشكلة عشان الكل يستفيد وربنا يوفقك ان شاء الله

[Ahmed Amin]

كل كلام الرجالة زي الفل ومطلوب تعمله طبعا

بس كل الحاجات دي صعب توصل العربية للمرحلة الصعبة دي

اولا لو عربيتك مانيوال يبقى لازم تكشف على الديسك والاسطوانة وتشوف مدى ارتفاع عداد الر بي ام مع عداد السرعة يعني على السرعة الثانية لما بيكون ار بي ام 3 السرعة بتكون كام ونفس الكلام على السرعة الثالثة والرابعة

ثانيا العربية متلتة ولا أيه يعني كل البوجيهات شغاله (اكشف على الموبينة)

ثالثا طلبمة البنزين لو ضعيفة العربية هتنتش معاك وخصوصا لو دوست بنزين مرة واحدة

رابعا الحساسات

وياريت تبقى ترد انت عملت ايه لما حليت المشكلة عشان الكل يستفيد وربنا يوفقك ان شاء الله

تصحيح لمعلومتك بس,
طلمبة البنزينة لو ضعيفة او فيها تهريب مش هتخلي العربية تنتش لو داس مرة واحدة , هتغيب ف التجميع بس.
لان حتي وهيا ضعطها ضعيف, بتقوم الموتور بس بتغيب في الدوران وهيا باردة ولحد ما ضغط البنزين في المواسير يوصل ل ٣ بار وبعد كدا هتدور من أول مرة,
وبيبقي تجميع العربية مش حلو لكن مش بتنتش.

وأنت قلت حاجة مهمة أحنا كنا ناسينها بما إن العربية مانيوال اللي هما الديسك والأسطوانة.

[Ahmed Nasser]

انا فعلا غيرت البوجيهات والفلاتر والزيت
لكن منضفتش البوابه لسه
العربيه مانيوال
انا لسه شارى العربيه من شهر

عربيتك عاملة كام كيلو ؟؟؟
واضح انك ماغيرتش سير الكاتينة صح ؟؟

[Ahmed Nasser]

تصحيح لمعلومتك بس,
طلمبة البنزينة لو ضعيفة او فيها تهريب مش هتخلي العربية تنتش لو داس مرة واحدة , هتغيب ف التجميع بس.
لان حتي وهيا ضعطها ضعيف, بتقوم الموتور بس بتغيب في الدوران وهيا باردة ولحد ما ضغط البنزين في المواسير يوصل ل ٣ بار وبعد كدا هتدور من أول مرة,
وبيبقي تجميع العربية مش حلو لكن مش بتنتش.

بص ياباشا طرومبة البنزين لما بتبوظ ليها اكتر من شكوى
لما تكون ضعيفة بتدى خنقة فى السحب
لما بتضعف جامد بتبدى تنتش معاك وبعد كدة تقطع
اما بقى لما تغيب فى الدوارة بتبقى فيها سيكس بلف بيهرب بنزين بعد ماتبطل

[coco2003]

ان شاء الله هقوم بتنظيف البوابه وبعدها هحاول اتاكد من موضوع طلمبه البنزبن
العربيه بتدور على طول الصبح ومش بتغيب وعلى فكره انا لسه مغير فلتر البنزين من اكم يوم
ولسه مغيرتش ير الكتينه رحت للمكنيكى بص عليه قالى امشى عليه شويه وبعدها نغيره