ارجوكم شوفولي حل

[GALAL mohammed]

السلام عليكم

انا محتاج خبرتكم علشان انا زهقت من مشكلة في العربية مش عارف احلها ، الشكمان بيطلع دخان اسود وغيرت فلتر الهواء وحساس الشكمان وفلتر البنزين والبوجيهات وانا بحط بنزين 92 وعمري ما حطيت بنزين 80 ، مع العلم ان المكنة عندي خفيفة وكان عندي مشكلة في السحب والنقلات كانت بتهرب ، وطبعا الفتيس عندي اوتوماتيك ، انا قلت ان الفتيس عاوز يتغير ، بس الحمد الله المشكلة اتحلت ومطلعتش عيب فتيس ، كانت مشكلة كونترول الفتيس ( كارتة الفتيس ) وحاجة اسمها جي ام الميكانيكي بيقول انه لغاها ، ايه الجي ام ده ،
الحمد لله السحب اتظبط والنقلات رجعت احسن من الأول والعربية حلوة في كل حاجة غير بس الدخنة السودة اللي تعباني ومش لائيلها حل ، مع العلم ان العربية مابتغيبش في الدوارة وكشفت علي الكمبيوتر ومفيش حاجه

العربية نوبيرا 1 موديل 97

[GALAL mohammed]

هوه الموضوع صعب ولا ايه

[MMamdouh]

دخنة سودة = احتراق غير كامل

دة اما رشاشات وحشة او حساس شكمان وحش

MMamdouh

[Mahmoud.Fathy]

دخنة سودة = احتراق غير كامل

دة اما رشاشات وحشة او حساس شكمان وحش

mmamdouh

مش ممكن يكشف عليها بالاسكنر ويعرف ان كان العيب منهم ولا لا ؟؟؟

[MMamdouh]

اكيد

MMamdouh

[GALAL mohammed]

ماهو تنا كشفت بالاسكانار مرتين ومفيش حاجه ، ومغير حساس الشكمان ، طيب هوه ممكن العيب يكون من اسلاك البوجيهات ، علي اساس انها متغيرتش من سنتين ولا ايه :(

[GALAL mohammed]

رحت لكهربائي يشوف المشكلة لو مشكلة كهرباء ، فقالي احنا نشيل راس الانجكشن ونظفة ونغير جوانات لو محتاج ، وهتتكلف حوالي 150 الي 200 جنيه ، ايه رأيكم في الكلام ده ، انا المكنة عندي خفيفة وكانت بتطلع زيت من خرطوم الفايز وده اكيد كان بيدخل في الهواء وممكن يكون وسخ راس الانجكشن زي ما الكهربائي بيقول ، بس انا دلوقتي لغيت خرطوم الفايز وعملت صرف ليه الوحده علشان ميدخلش علي العمة ، ايه رأيكم اعمل كلام الكهربائي ولا ايه ؟

[Ahmed Nasser]

هو اية راس الانجكشن دة ؟؟؟

[GALAL mohammed]

هو اية راس الانجكشن دة ؟؟؟

والله انا مش عارف عبارة عن ايه رأس الانجكشن ، بس اكيد داخل فيها المانيفولد والثلاجة والبوابة

[GALAL mohammed]

ياجماعة المفروض هروح بكرة للكهربائي ينظف رأس الانجكشن ولو فيه جوانات هيغيرها ، اروحلو وأتوكل علي الله ولا المفروض ان دي شغلة الميكانيكي

[Ahmed Nasser]

لو قصدك المانفول
عادى بيتفك وبيتخيرلة جوان بعشرة جنية وعلبة منظف بـ 25ج
وبيتفك كمان من بعضة وبطلع الهباب اللى جواة

http://www.nilemotors.net/Nile/248945-air-manifold-2-a.html

[GALAL mohammed]

لو قصدك المانفول
عادى بيتفك وبيتخيرلة جوان بعشرة جنية وعلبة منظف بـ 25ج
وبيتفك كمان من بعضة وبطلع الهباب اللى جواة
http://www.nilemotors.net/nile/24894...ifold-2-a.html

تقريبا هوه ده اللي هيعملو الكهربائي ، وبيقول هياخد 150 الي 200 جنيه علشان لو هيغير جوانات ، كده انا شايف السعر عالي اوي
شكرا لإهتمامك استاذ احمد

[Ahmed Nasser]

دا بقولقك 200 ج على اساس انة هيفك الموتور ولا ايه
فك المانفول اخرك 50 ج مصنعية
و10ج حوان مانفول
25 ج منظف
وشكرا على كدة

[GALAL mohammed]

انا رحت لميكانيكي جمب البيت عندي علشان يفك البوابه وينضف الدنيا ، طبعا انا كان نفسي اعملها بنفسي بس معيش عدة ، المهم الراجل فك البوابة قلتلو متفك المانيفول كله ، قال لا ده حوار كبير وبتاع ، قلتله خلاص فك البوابة ونبئا ننضف المانيفول كده وهوه راكب ، وجبت منظف البوابة ، البوابة كانت زي الزفت من جوة والحساسات زبالة وكله زفت ، نضفنا وظبطنا والجوان بتاع البوابة كان بايظ غيرته ، وركبنا البوابة ، ودورنا العربية مش عاوزه تدور وانها تدور ابدا ، المهم انا شكيت في المرش وجبنا كهربائي يشوفها ، قال ده ترس المارش وحل المارش وخد 70 جنيه علشان يجيبلو ترس وانا اتخنقت منهم وطلعت البيت اكل وانتخ لغايت ما يخلص المارش ، وشوية كده وهنزلهم

[GALAL mohammed]

الحمد لله كله تمام والعربية رجعت احسن من الاول والدخنة السودة اختفت ، والتفاصيل عملتها في موضوع مستقل علشان الكل يستفيد