Tweet
عربيتي الجوليت كانت اتبهدلت خالص ... وقررت بقى خلاص انى اجددها واظبطها سمكرة ودوكو عشان شكلها بقى لامؤخذة معفن .... وبعد اخد ورد مع نفسي كتير قررت أوديها لمركز نايل موتورز على الرغم من أن مكانها بعيد جدا عني والعربية هتقعد هناك فترة مش قليلة ... إلا أن سمعة المكان وسابقة الاعمال خلت القرار سهل ... وهو انى أروحلهم على طول مهما كانت المسافة ومهما كان السعر ... كفاية أن الشغل يبقى نظيف ... الفلوس هتتدفع وتتنسي لكن العربية هتفضل واقفة قدامي ...
طبعا انا مش محتاج أشكر في كريم منير هو انسان غني عن التعريف لكل اللى في المنتدي وكمان أما قابلته حسيت انه فعلا أخ لكل اللى في المنتدى فدا شئ مفروغ منه يعني :) ... أحمد قدروة كمان مدير الورشة راجل في منتهى الاحترام والشطارة وفاهم كويس هو بيعمل ايه ... وتحس بالامان كده وهو شغال في العربية ... متحسش أن فيه فتي أو تأليف أو حاجة غريبة بتحصل ... تحس كده أن الشغل دا صح حتى لو انت مش فاهم .... أنا هلخص الموضوع في مجموعة نقاط
1- المعاينة: يوم المعاينة اول يوم رحت الورشة وكنت المعاد مع احمد قدروة عن طريق كريم منير ورحت بالعربية واحمد بص على العربية ولف حواليها وقالي العربية محتاجة كزا وكزا وكزا .... عشان كزا وكزا وكزا ... وهتاخد 20 يوم شغل ... قلتله مش كتير 20 يوم ... قالي انا ممكن اقولك 10 ايام وبعدين اتأخر عليك ... لكن أما اقولك 20 يوم يبقى قبلها أن شاء الله .
2-الاستلام: الاستلام تم بعد 17 يوم ... دا غير اننا زودنا شغل اثناء مهو كان شغال يعني كان ممكن تخلص قبل كده زي انى قررت انى أرش الجنوط كلها بلون فيراني وارش الكاليبارات أحمر ... يعني الاستلام تم قبل المعاد المتفق عليه .
3-الامانة: انا كنت مفضي العربية من كل الحاجات اللى فيها حسب نصيحة بعض الناس ... لكن نسيت بعض الحاجات الرفيعة .... لكن الشهادة لله ... مفيش حاجة اتحركت من مكانها ولا حاجة نقصت ولا اى حاجة ودا دليل على امانة كل الناس اللى شغالة في المركز من اصغر واحد لاكبر واحد ...
4- جودة الشغل: اقل ما يقال عن الشغل انه Professional يعني شغل زي ما الكتاب بيقول ... مفيش عك ولا طسلائة ولا تقفيل أي كلام ... كل حاجة مظبوطة وكل حاجة حسب اصول الصناعة زي بنقول احنا يا مهندسيين :) ... بصراحة العربية بتاعتي حالتها كانت تصعب على الكافر وشكها زبالة :) والصاج مليان معجون والدهان لومنة مغير من الشمس وشوية خرابيش زي الفل ...بس أما خلصت رجعت فابريكا تاني
4- جودة الشغل: اقل ما يقال عن الشغل انه Professional يعني شغل زي ما الكتاب بيقول ... مفيش عك ولا طسلائة ولا تقفيل أي كلام ... كل حاجة مظبوطة وكل حاجة حسب اصول الصناعة زي بنقول احنا يا مهندسيين :) ... بصراحة العربية بتاعتي حالتها كانت تصعب على الكافر وشكها زبالة :) والصاج مليان معجون والدهان لومنة مغير من الشمس وشوية خرابيش زي الفل ...بس أما خلصت رجعت فابريكا تاني
5-الراحة النفسية: والعربية في المركز بتبقى نايم في بيتكوا ومرتاح نفسيا ومش قلقان ومش خايف وحاسس أن العربية في مكان امين وان فيه حد وراك محافظلك عليها وحافظ غيبتك فيها ... يعني انا سبت العربية 17 يوم رحت خلالهم 3 مرات بس متابعة غير يوم الاستلام ... وال3 ايام دول رحت عشان كان فيه حاجات ناقصة وانا رحت عشان اشتريهم مش عشان ابص عالشغل ... يعني مش لازم تبقى واقف فوق دماغهم زي باقي الصنايعية ... كل حاجة بتتعمل كأنك موجود .
والأن أترككم مع الصور قبل التجديد وبعده
قبل التجديد
بعد التجديد
شكرا لنايل موتورز
Comment