باركولى............النهارده اشتريت نوبيرا 2

[ادم جو]

1-
بعد طول معاناة مع السيارات القديمة اتخذت قرار التغيير الى الحديث وهنا بدأت المشكلة ..فلان يقولك خليك فى النوع كذا وعلان يقولك اوعى تجيبها صاحبك يقولك العربية دى ممتازة انا عارفها وغيره يقولك دى عربية زبالة وغيره وغيره و............ .قعدت حوالى شهرين اسأل واستفسر وادخل على النت اشوف مشاكل العربيات واسعار قطع الغيار وسعر اعادة البيع وخلافه وبعد فترة ليست بالقليلة وفترة من بهدلة المواصلات كل يوم الصبح انتهى بى المطاف الى النوبيرا 2 وهنا بدأت المشكلة الاكبر ازاى اجيب عربية سلمية بمعنى الكلمة فى جو انعدام الضمير والنصب اللى احنا بنعيش فيه نزلت السوق مرة واتنين ولقيت معظم العربيات مشغولة والسليمة زايدة عن سعر السوق 5000 ...طعبا انا كنت بأخد ناس متخصصة معايا لان خبرتى على قدها ..وزهقت لف فى الحر وملقيتش طلبى قلت استنى شوية لحد ماحاجة حلوة تقع قدامى لحد ما واحد مقرب ليا جالى فى يوم وقالى بس لقيت ليك واحد معرفة صاحب معرض فى مدينة نصر عنده عربية طلبك روحت وفى اليوم دا بالصدفة مكنش معايا حد متخصص شفت العربية مو2001 اتوماتيك شكلها مغرى جدا والراجل صاحب المعرض استقلبنا وهاتك ياتثبيت بالكلام من قبيل......انتو جايين من طرف واحد يعز عليا ولايمكن اديكو حاجة فيها شك بنسبة 1% والعربية حالتها.....................المهم خدت العربية بسعر اغلى من السوق بحوالى 4000 وقلت مش مشكلة فى الزيادة فى مقابل انها مضمونة وتانى يوم الصبح قلت اروح افرج عليها ذوى الخبرة .........وهنا فوجئت بالكارثة
يتبع

[mero100]

كارثه ؟؟؟؟... ليه بس ...

[modo88]

يامسهل :D

[AhMeD MeTwAlY]

طيب ولقيت الكارثه ايه يعني العربيه ديزل مش بنزين ؟؟؟

[د.عماد صلاح]

يعني نقول مبروووك ولا نستني ولا ايه

[kar!m]

متابع ...

[kokowasfy]

كارثة اية يعم شوقتنا اوى

[د.عماد صلاح]

بلاش التشويق ده ..هو احنا ناقصين انتظار ...

[ادم جو]

2-
الناس ذوى الخبرة اللى اتفرجوا على العربية وتفحصوا جيدا وجدوا الاتى..1-العربية عاملة حادثة سابقا فى الجنب اليمين مسمعة فى الحوض ومعمولة بحرفية متخليش حد يشك فيها..2-الموتور بتاعها خفيف جدا لدرجة انه مش هيكمل شهرين..3- الفتيس فيه بودار مشكلة (طبعا هو معملش مشكلة معايا بس طبعا نظرتهم تختلف).......سمعت الكلام دا قلبى وقع فى رجلى ..على طول اتصلت بالراجل وقولتله العربية متلزمنيش(طبقا لاتفاقتا فى اليوم السابق انى هاكشف على العربية ولو طلع فيها مشكلة هارجعها وهو كان رده طبعا :ياباشا العربية لو فيها مسمار تلزمنى وتاخد فلوسك وفوقيهم خمسة)المهم لما كلمته قالى تعالى غبت من الشغل وخدت واحد مت الناس اللى بصوا عليها ورحنا بمجرد ماقعدنا معاه واكلمنا فى التفاصيل الوش التانى بتاعه ظهر وعمل بمبدأ(خدوهم بالصوت )قعدنا ساعتين نتفاوض وهو عمال يقول العربية مفيهاش حاجة ومصمم على رأيه (طبعا عشان ميظهرش بمظهر النصاب) المهم اتقفنا انى اجي ليه المعرض تانى يوم الصبح عشان الغى التويل اللى هو عمله ليا وبعدين اخد ال40الف اللى دفعتهم...وبالفعل روحت الصبح وجه معايا واحد من الموظفين واخد نفس العربية واحنا فى طريقنا للشهر العقارى العربية بطلت منه ...يدور مش راضيه تدور...........يدور مفيش!!! (قولت فى سرى الحمد لله ان ربنا نجانى منها) خدناها مشى لحد الشهر العقارى ولغيت التوكيل ورحت اخد الفلوس قالى بكره عشان مفيش سيولة النهارده!!! قلقت بس قلت مش مشكلة بكره من النهارده مش فارقة ورحت تانى يوم والراجل بالفعل ادانى الفلوس .ولكن طبعا انا خسرت الاكراميات اللى دفعتها للشباب ويومين غياب من الشغل..وبعد الموال دا لعنت العربيات واللى بيشترى وبيبع عربيات ...لحد مافى يوم واحد معرفة جه وقالى فى عربية نوبيرا 2 مو2004 اتوماتيك موجوده مع واحد صاحبه فى محافظه من محافظات الوجه البحرى تبعد عن القاهره حوالى 100كيلو وصاحب العربية بيقول فيها شعر وحكايات قلت فى نفسى(الحمد لله فرجت ) وعقدنا العزم وتوكلنا على الله ورحنا نشوف العربية اللى مفيش منها على حسب كلام صاحبها ....وياريتنا مارحنا!!!!!!
يتبع

[د.عماد صلاح]

يعني كله حزين كده ...حنفرح في الاخر ولا ايه طمننا ...الزيرو اوعي تسيبه وتروح لغيروا عشان غيرك هيكون اخد خيروا
اللي فات ده بيت شعر في المستعمل

[nab!l]

متابع :(

[Mahmoud.Fathy]

ايه جو افلام نادية الجندي دا

[ادم جو]

3-
وصلنا الى المحافظة المنشودة وكان فى انتظارنا صاحب العربية ولن اقدر ان اوصف مدى حفاوة الاستقبال كان معايا زميل عنده خبرة بالنوبيرا بالذات وسمكرى بالاضافة الى صاحب العربية التى استاجرنها نظرا لعدم وجود سيارة توصلتا ....المهم صاحب السيارة مسك فينا الا ولازم نتغدى الاول ياعم متشكرين.......مفيش.....كتر خيرك....مفيش برده....طب نتفرج على العربية الاول .......لا ......دخلنا لقينا فى انتظارنا وليمة ..خلصنا.. هات ياعم الحاج العربية....طب استنوا تشربوا الشاى الاول....ماشى .شربنا الشاى ...العربية فين ياعم الحاج حاضر 5 دقايق الواد بيغسلها عشان مركونة بقالها فترة.قلت فى نفسى(اكيد العربية لقطة وتستاهل المشوار.الكلام خدنا ببص فى الساعة لقيت انه احنا بقالنا اربع ساعات ..المهم لقيت العربية جت ..منظرها من بعيد جميل المهم السمكرى فتح الكبوت وانا واقف جمبه مش ببص ع الحوض انا ببصله هو فى انتظار اللحظة الفارقة .لاقيته قفل الكبوت وراح هامس فى ودنى العربية دى مش سكتنا وقفت على جنب وبداخلى شعور بالمرارة والاكتئاب لايوصف وبقية الناس اللى معايا بيكلموا مع الراجل وبيشكروه على حسن الضيافة وبيستئذنوا فى الانصراف والراجل بقاله 5دقايق عمال ينادى عليا عشان يسلم عليا وانا سرحان وبالى مشغول بمشوار 100كيلو اللى طلع على فاشوش وتعطيل شغلى واجرة العربية اللى خسرتها والناس اللى تعبتها معايا و......... وللمرة المليون لعنت العربيات واللى بيشتريها واللى بيبعها واللى....... . لحد امبارح ماكان فى انتظارى مفأجاة
يتبع

[ahmedsamy90]

يعني هنباركلك في الآخر ولا هنعمل ايه

[hugan]

متابع
طالما العربيه من معرض
تعرف انها مش بعيد تكون عامله 5000 حادثه