خبطة في الرفرف اليمين

[Mahmoud.Fathy]

النهاردة الصبح قبل صلاة الجمعة لقيت الراجل بتاع الجراج اللى انا بركن فيه جاي بيجري عليا وانا كنت طالع من باب البيت :) .... قلتله فيه ايه ياعم ... العربية جرالها حاجة ؟؟؟ قالي اه يا باشا العربية اتخبطت ... قلتله لا حول ولا قوة الا بالله دا لسه مكملتش شهر بعد اللتجديد يا جدعان ... مين اللى خبطها ... قالي عربية شيفروليه جامبو كانت بتشيل زبالة وبتعدي بيني وبين عربية تانية عشان تدخل ورا العربيات في حتة كده قدام العمارات تاخد الزبالة ... المهم الراجل طبقلي الرفرف الشمال بتاعي ... دخل لجوا في صورة خط مستقيم كده ... لكن الرفرف متقشرش ولا الدهان وقع وفيه خدش بسيط جدا ... والعربية اللى كانت جمبي الناحية التانية شاهين خدله الرفرف الخلفي برضه بس بخسائر أقل ... قلت قدر الله وما شاء فعل ... المهم دلوقتى فيه سمكرى جمبي كويس هعملها عنده بس هو كان قافل الورشة النهاردة قالي ممكن تترد على البارد ومش هتترش وهتبقى باينة بسيط ... ايه رأيكو ارد على البارد ومرشش ولا ارد باللمبة وارش الرفرف ولا اجيب رفرف جديد ؟؟؟؟؟

[saddam]

صديقي المواطن
البارد في مصر ضعيف جدا والصنايعي المصري لا يجيده وحتبان لكن بره كلام تاني خالص
لو الرفرف سعره بسيط دون ال 500 طبعا تجيب واحد وترشه وبتاعك تشيله للزمن
ولكن.لو الرفرف بتاعك غالي فيتسخن ويتدق ويتظبط ويتمعجن ويتسحق وياخد فيلر ويتسحق ويترش كمبيوتر وبعد أسبوع يتسحق ناعم وبالتوفيق وقدر الله وما شاء فعل ومن نصر إلى نصر
ودمتم للنضال

[Mahmoud.Fathy]

الرفرف سعرة 170 جنيه .... انا لسه جايب رفرفين جداد من شهر وعاملهم مع تجديد العربية ... صعبان عليا اغير الرفرف وهو مكملش شهر

[Ahmed_Ramadan]

توكل على الله و رده على البارد

أصلا البلد ديه خسارة فيها تجديد العربيات و الله ده اللى مخلينى مكسل أسمكرها و لا أرشها علشان ييجى واحد حمار زى اللى خبطك و يحسرنى على اللى صرفته

[mostafa mahmod]

مصر بلد الفابريكه :(
.
رده يا باشا عالبارد لو ينفع لانه طالما ماشى فى شوارع المحروسه فانت معرض للخبطات و الذى منه
و ربنا يكفيك شرها :)

[na3m977]

رد على البارد ومشى حالك

[hilal]

طالما سعره 170 جنيه ، يبقى الافضل تجيبه استيراد بشرط يكون نفس اللون
وتشيل القديم احتياط لان التكلفة مش كبيرة والصنايعية أي كلام

[Mahmoud.Fathy]

170 التايواني وهيكون من غير لون ... لازم يترش بعدها ... موضوع انك تجيب قطعة استيراد نفس اللون وتركبها مباشرة دا صعب جدا عشان اكيد هتلاقي فرق في درجة اللون واللمعان ... كده كده هترش تاني ... الاستيراد هيكون مش اقل من 250 ج

[Mahmoud.Fathy]

رديته النهاردة على البارد ... بيني وبينكم شكله مش أد كده والعربية كلها بسم الله ماشاء الله زي الفل ودا اللى عامل زي الخرم في التيشرت الجديد :):):) ... انا همشي بيه كده شهر ولا حاجة لحد اما انسى الخبطة وبعدين غالبا هجيب واحد جديد وارشه واركبه تاني ... وحسبي الله ونعم الوكيل في الناس اللى معندهاش ضمير وماشية زي الحمير في الشارع