تنصحونى اشترى شيفوليه لانوس زيرو ولا لا

[عماد]

تنصحونى عن تجربة اشترى شيفوليه لانوس زيرو ولا لأ
انا محتار وزهت
وعايز اروح المعرض علشان اخلص الاجراءات واستلم
_ ناس تقولى بلاش لانوس هات فيرنا وانا زهقت وخايف
سألتهم ايه المشاكل اللى فى العربيتين خدوا عندكم ده كلام من اعضاء نايل موتورز وبعض مستخدمى السيارة
1- بيقولوا اللانوس بتفتح شاسية وساعات تشرخ ( ياحلاوة )
2- بيقولوا اللانوس تكيفها ضعيف وبيأثر على السحب
3- بيقولوا اللانوس الباور بتاعها اضعف


1- بيقولوا الفيرنا اسواء فى الثبات
2- بيقولوا الفيرنا صالونها اضيق واسواء

وبصراحة انا زهت وعايز واحدة من الاثنين
ارجوكم ساعدونى ايهما اشترى واللى عنده سوأل ليه دول بالذات علشان منتشرين وقطع الغيار وسهولة الصيانة
الوقت قد نفذ

[waleedrahmy]

هم دول العربيات الشعبية المنتشرة والمتداولة
وخليك مع الشعب
يا تزود الميزانية شويتين ثلاثة

[M I D O]

لو من دول بس يبقي فيرنا لاكن رايي شوف كدة ال byd

[Elkordy2000]

انا كان معايا شيفروليه لانوس 2009 قعدت معايا سنتين كانت نعم السياره بصراحه ., غير الزيت والفلتر والسرفيس العادي مافيش اي مشاكل .., بالنسبه للتكيف بتعها فوق الممتاز بس طبعا بيأثر علي السحب وده حال كل الكوري علي فكره ., بالنسبه للبور كان ممتاز برضو بدون مشاكل .., موضوع شروخ الشاسيه ده انا أول مره اسمعه عن اللانوس واعتقد ان اللي قال كده مش فاهم حاجه أو مركبهاش اصلا ... اللانوس عربيه ممتازه سواء شيفروليه او دايو وسيبك من هري المنافسين ..... شوف كميه اللانوس اللي حواليك في الشارع وانت تعرف .... ومن الاخر صفقه رابحه
بالنسبه للفيرنا برضو صفقة رابحه مافيش كلام بس هي صالون اضيق شويه ووطيه علي الارض نسبيا عن اللانوس ., قعدتها بالنسبه لي مش مريحه زي اللانوس
اتوكل علي الله وهات اللانوس مش هتندم .... قطع غيار وصيانه وعمليه

[drmsadek1979]

انا كان معايا شيفروليه لانوس 2009 قعدت معايا سنتين كانت نعم السياره بصراحه ., غير الزيت والفلتر والسرفيس العادي مافيش اي مشاكل .., بالنسبه للتكيف بتعها فوق الممتاز بس طبعا بيأثر علي السحب وده حال كل الكوري علي فكره ., بالنسبه للبور كان ممتاز برضو بدون مشاكل .., موضوع شروخ الشاسيه ده انا أول مره اسمعه عن اللانوس واعتقد ان اللي قال كده مش فاهم حاجه أو مركبهاش اصلا ... اللانوس عربيه ممتازه سواء شيفروليه او دايو وسيبك من هري المنافسين ..... شوف كميه اللانوس اللي حواليك في الشارع وانت تعرف .... ومن الاخر صفقه رابحه
بالنسبه للفيرنا برضو صفقة رابحه مافيش كلام بس هي صالون اضيق شويه ووطيه علي الارض نسبيا عن اللانوس ., قعدتها بالنسبه لي مش مريحه زي اللانوس
اتوكل علي الله وهات اللانوس مش هتندم .... قطع غيار وصيانه وعمليه

الراجل دا جاب من الاخر
معايا 2013 وكل كلمه قالها مظبوطة

[agaty1st]

الكلام تاني اهه ياعم عماد عشان تسمع اراء الناس هنا و هنا
و ربنا يوفقك

بص يا باشا
انا عندي لانوس موديل 2003 من سنه
و فيرنا موديل 2007 من شهر
التقييم كالتالي :
1 - الفيرنا افضل من اللانوس في قوة الموتور و التكييف و الثبات و الفرامل و النعومه و الراحه اثناء القياده
2 - اللانوس افضل من الفيرنا في الارتفاع عن الأرض و استهلاك البنزين
3 - عيوب مشتركه الثبات و الفرامل
4 - العربيتين زي الفل بالنسبه للظروف المصريه و مفيش واحده فيهم هاتتعبك و الدليل في كلمه واحده (التاكسي)
5 - بكل أمانه أنصحك بالفيرنا ...... ليه ؟؟؟؟
أ - الفيرنا بالنسبه للسائق أوسع و أريح بكتير يعني في اللانوس برجع الكرسي عالأخر و هه ماشي الحال أما الفيرنا عالأخر بكون مرتاح جدا و ممكن قبل الأخر بدرجه
ب - لو من هواة الجري الفيرنا بتطير مع ان عربيت أوتو مش مانيوال لكن اسرع من اللانوس المانيوال
ج - تكييف اللانوس ضعيف و تكييف الفيرنا تلاجه
د - تكييف اللانوس يأثر على الأداء أما الفيرنا ولا أي حاجه

ملحوظه للأمانه : التقييم على أساس التجربه الشخصيه مع الأخذ في الاعتبار ان اللانوس مو 2003 و عامله 175 ألف كيلو أما الفيرنا مو 2007 و عامله 35000 كيلو يعني فيه فرق في الحاله
و اسمع برضه رأي الأعضاء و اكتب الموضوع في قسم اللانوس و اسمع رأي الناس

و بالتوفيق ان شاء الله

[J A G U A R]

بص يا باشا دى مقارنه من الالف للياء ومن خلالها تقدر تحدد اختيارك
اللانوس هى سيارة جنرال موتورز الشركة الأمريكية الاكبر في العالم قلبا وقالبا ، فشركة دايو من يوم ما ابتدت فى تصنيع السيارات، وحتى قبل ان تشتريها جنرال موتورز وهى تعتمد تماما على تصميمات جنرال موتورز ( أوبل الالمانية تحديدا )، والسيارة اللانوس ما هى الا السيارة اوبل استرا موديل 1995 من ناحية الموتور وقاعدة العجلات ( الشاسية يعنى) والات الجر و نظام التعليق (العفشة)،وكل شئ، فقط تختلف فى الشكل الخارجى والصالون الذى اعيد رسمه ليناسب موضات الموديلات الجديدة.

الفيرنا (سأتكلم هنا عن الفيرنا 1500 فقط لانها هى المقابلة للانوس) مبنية على محرك وشاسية وتعليق والات جر الميتسوبيشي اللانسر 1998 (كريستالة)، حيث ان هيونداى تعتمد على تكنولوجيا مشتراه من ميتسوبيشى اليابانية اكبر مصنع للمحركات في العالم.

المحرك

يوجد تحت كبوت السيارة اللانوس واحد من اشهر المحركات واكثرها انتشارا فى العالم، محرك E-tech المصمم بواسطة جنرال موتور ادى واجبة ولا يزال فى دفع العديد من طرازات جنرال موتورز للأمام فى قارات العالم السته، فهذا المحرك عمل مع السيارة اوبل استرا وفيكترا موديلات 95 والتى تعمل فى اوروبا باسم اوبل و فى انجلترا باسم فوكسهول وفى امريكا الجنوبية تحت اسم شيفورليه و فى استراليا تحت اسم هولدن،

كما عمل مع الدايو لانوس فى كل دول العالم وحاليا مع الشيفرولية افيو (التى هى النسخة الجديدة من اللانوس) و الشيفروليه كورسا البرازيلية التى تباع فى مصر باسم اوبل كورسا سيدان ، هذا المحرك يستحق تقدير ممتاز وهو افضل ما فى السيارة اللانوس ، المحرك احادى الكامة ذو 8 صبابات يعطى قدرة قصوى فى حدود 85 حصان عند 5500 RPM، نظام تغذية الوقود عن طريق الحقن الإلكترونى.

بالنسبة للفيرنا 1500 نجدها تحمل محرك سلفتها الأكسنت 1998، والذى هو بشكل ما نفس محرك اللانسر البطة او الكريستالة مع تعديلات تكنولوجية طفيفة جدا، مبنى ايضا بنظام الكامة الواحدة العلوية و 12 صباب ولكن بتصميم فريد جدا يجعل الإتصال بين الكامة العلوية والصبابات عن طريق منظومة من الروافع(التاكيهات) والميزة التى اراها واضحة فى هذا التصميم هى سهولة ضيط خلوصات الصبابات (ضبط التاكيهات) عند اى ميكانيكى بدون الحاجة للذهاب لمختص الصبابات، فينما لا يستطيع الميكانكى العادى ضبط تاكيهات اللانوس او الشاهين او حتى ال128 لان ضبطها يتم عن طريق تغيير اطباق الكامة وهو امر يحتاج مختص، فإن تاكيهات اللانسر والأكسنت و الفيرنا يستطيع الميكانيكى الجيد ضيطها، ولكن يعيب هذا التصميم كثر الاجزاء المتحركة فى الموتور وهو امر غير مطلوب، الصراحة حاولت البحث عن القدرة الحصانية لهذا المحرك فى حدود 92 حصان وهو يتميز بسهولة الصيانة وطيلة العمر الافتراضي.

الأداء

ملامح اللانوس فى الاداء تبدو كالتالى، المحرك يكون كسول الى حد ما فى RPM المنخفضة ولكنه بمجرد تجاوز حد ال2500 RPM يعلن عن عنفوانه ويكشر عن انيابه ويطير بالسيارة الى مد البصر تاركا السيارات المنافسة تعانى الغبار الذى اثارتة اللانوس، ولذلك فهى من السيارات البطيئة فى الإنطلاق ولكنها تعوض هذا البطء فى السرعات العالية، ثبات السيارة على الطريق معقول وان كان يسوء الى حد ما فوق ال120، ولكن يوجد حل بسيط لهذة المشكلة البسيطة هو تركيب جنوط سبور من نوع جيد، قدرة السيارة على المناورة افضل من معقولة، فرامل السيارة تبدو الى حد ما فقيرة تصميما ولذلك فهى تجاهد لإيقاف السيارة( على رأى ممدوح عبد العليم قى فيلم بطل من ورق: مابيعرفش يواجيفها مابيعرفش بيواجيفها ).

الفيرنا بعكس اللانوس سيارة ترغب فى القفز من على الأرض بمجرد رفع القدم اليسرى من على دواسة الدبرياج، فتشعر وكأن السيارة سوف ترفع عجلاتها الأمامية عن الارض كما يفعل الحصان ثم تطير من على الأرض، ولكن الملاحظ ان هذة الثورة فى الإنطلاق تفقد حماستها الى حد ما مع السرعات العالية فلو افترضنا ان اللانوس والفيرنا انطلقتا معا بأقصى ما تسمح به محركاتهما فانا اتوقع ان الفيرنا بسرعة انطلاقها العالية ستختفى من مجال إبصار سائق اللانوس لفترة ولكنها لن تصمد مع اللانوس فى السرعات العاليه حين تلحق بها وتتخطاها، فرامل الفيرنا افضل كثيرا من اللانوس وقدرتها على المناورة لا تختلف كثيرا عن قدرة اللانوس وكلاهما جيدتين، لكن الفيرنا المجمعة محليا يعيبها بشدة عدم الثبات على السرعات العالية وحتى الأن لم يفيدنا احد بحلول لهذة المشكلة.

الصوت

محرك اللانوس رغم انه ليس اهدأ محرك فى العالم لكنه افضل بمراحل من محرك الفيرنا من وجهة نظر الصوت، محرك اللانوس له زنه مميزة لكنها ناعمة و مريحة للأذن وليست مرتفعة.

لكن محرك الفيرنا خشن و صوته مرتفع وغير مريح وهو احد النقاط التى اعتبرها سلبية للفيرنا، لكن نلاحظ بالمقابل ان الفيرنا صوت آلات الجر بها غير مسموع فى حين يبدو واضحا فى كابينة اللانوس، ايضا نلاحظ ان عزل صوت الطريق فى الفيرنا افضل من اللانوس فبينما ان اى عقب سيجارة يخبط فى السيارة اللانوس من اسفل يرن بداخل الصالون فإن دوشة الطريق اسفل السيارة غير مسموعة فى الفيرنا.

الراحة

الباور ستيرنج والتكييف فى كلتا السيارتين ممتاز وان كان تكييف اللانوس يجهد كثيرا من محركها ، وضع القيادة مريح فى كلتا السيارتين، الفيرنا افضل فى التعامل مع دواسات البنزين والفرامل لان مشاويرها اقصر، الرؤية الخلفية والمرايات قاصرة جدا فى اللانوس بسبب ارتفاع الشنطة وصغر الزجاج الخلفى لكنها معقولة فى الفيرنا.

الإتساع

صالون اللانوس اوسع لكن شنطة الفيرنا اكبر والسيارتين بنفس الطول (420 سم) .

المتانة

شاسيه اللانوس يعتمد عليه تماما فهو احد الإبداعات القيمة لجنرال موتورز التى تهتم تماما بمتانة الشاسيه، اما الصاج الخارجى للانوس فلا استطيع ان اعطيه اكثر من خمسة على عشرة، ارق كثيرا مما تتطلبه ظروف بلدنا التى يعتبر اهلها سيارات الغير الموجودة فى الشارع هى الإمتداد الطبيعى للكنبة الموجودة فى البيت، وكبوت سيارات الغير هو المكان الملائم للاكل والمذاكرة وتبادل عبارت الغرام. الخامات المستخدمة فى صالون اللانوس تقييمها من ناحية المتانة 6 من 10

بالنسبة للفيرنا جاء صاجها الخارجى نقلة تاريخية فى تاريخ هيونداى التى عودتنا فى السابق انها تصنع سياراتها من ورق الكلينكس المعاد تدويره، ولكن مع الفيرنا هيونداى قدمت لنا صاج خارجى رائع ، فبينما ان سيارة مثل الإكسيل تحصل على 3 من عشرة للصاج الخارجى ، اجرؤ على ان اقيم صاج الفيرنا ب 8 من 10، اما عن شاسية الفيرنا فهو لايزال حارس مرمى لم يختبر، ولكنى متفائل من ناحيته ولا ادرى ما السبب، وخامات الصالون افضل الى حد ما من اللانوس.

الأناقة

هذة بالطبع مسالة اذواق ، ولكنى بشكل شخصى ارتاح للمنظر الخارجى للفيرنا وشكل صالونها، لا لشئ سوى ان عينى ترتاح للخطوط الحادة ( يكون شكلها أكثر رياضيه )اكثر من الأسطح المنحنية (الكيرفات).

العمر الافتراضي :

أثبت التجارب أن محركات جنرال موتورز أكثر عمرا من محركات هيونداي واكثر قدرة على العمل في الظروف القاسية .

[abo_lamar]

الاستاذ Mohamed2013201
ياريت لو حضرتك كنت نزلت اللينك بتاع الموضوع اللي كان كاتبه استاذ سبعاوي في المنتدى من زمان عن المقارنة بين اللانوس و الفيرنا بدل ما حضرتك نقلته ونسبته لنفسك حتى من غير ما تشير لصاحب الموضوع الاصلي .

http://www.nilemotors.net/Nile/670-a.html

[J A G U A R]

الاستاذ mohamed2013201
ياريت لو حضرتك كنت نزلت اللينك بتاع الموضوع اللي كان كاتبه استاذ سبعاوي في المنتدى من زمان عن المقارنة بين اللانوس و الفيرنا بدل ما حضرتك نقلته ونسبته لنفسك حتى من غير ما تشير لصاحب الموضوع الاصلي .

http://www.nilemotors.net/nile/670-a.html

انا يا باشا اخدت الكلام كوبى وحطيته عندى انما اللينك مش عندى

[Omar2017]

لا دية ولا دية الساجا افضل منهم في الثبات و الكماليات و الشكل و توفير البنزين و الوسع بتاعها نفس وسع لا اللانوس و الموتور 1300 موفر جدا علىى فكرة توكيل منصور سيء جدا فوق الحدود عز العرب افضل منة بكتير لكن غبور لا يعلى علية
ملحوظة
اللانوس و الفيرنا تقفيل مصري
اما الساجا تقفيل ماليزي

[memo2000soft]

انا يا باشا اخدت الكلام كوبى وحطيته عندى انما اللينك مش عندى

بس لازم علي الاقل تكتب كلمة منقول علاشان حتي منبخسش حق صاحب الموضوع

[gabry832003]

لاااأ