موضوع مهم بعد انتهاء التجربة لنقل الافادة

[engwael]

الحمد لله بلية الكاتينه عندي قفشت فيي النوبيرا والسير سقط من عليها وجابت صبابات وبدات بفتح الماتور علشان نعرف ايه اللي حصل ونجيب طلباته اول تجربة كانت في شارع دمشق هناك في تفاوت شديد في اسعار قطع الغيار خصوصا الاصلية بس الحمد لله ربنا هدانى لواحد معرفة ادانى معظم قطع الغيار gm اصلي باسعار معقولة تانى تجربة انى اكتشفت ان العربية محتاجة طقم شنبر هي كانت ممكن تمشي سنه من غير ما اعمله بس انا قلت بالمرة طالما فتحنا الموتور وفعلا جبت الشنبر وركب تالت تجربة وهي الاهم اه حبيت اقول ان ديه تانى مرة الكاتينه تعملها معايا الميكانيكي استغرب خصوصا انى انا مشيت بالسير ده 12000 كيلو بس المهم انه اكتشف ليه البلية بازت لان السير كان مشدود اوى وقالي ان ممكن ارخيه شوية عن طريق تغير وضع طرمبة المية سنه بسيطة طبعا انا غيرت طرمبة اليه كمان بالمرة وقالي ان معلومة تغير وضع طرمبة الميه سنه بسيطة مش كل الناس عارفها . عندي بقي سؤال الميكانيكي بيقولي انا العربية تلين ساعتين بس لانه شمبر بس مش عمره انتو ايه رايكم الين قد ايه وشكرا وارجو اكون افدتكم.
طبعا انا مردتش اجيب شورت بلوك علشان ده زي البطيخة وانا مش فاضي للتجربة بالاضافة ان كل قطع الغيار اللي انا جبتها اصلية

[engwael]

اه بالنسبه لسعار قطع الغيار بس ديه من عند واحد معرفة بس اكتشفت ان تقريبا هو معندوش فرق لانه راجل محترم اوي في شارع دمشق 1- سير الكاتينة الاصلي 235
2- البليتين اصلي 375
3- طقم شنبر اصلي 180
ديه الاسعار اللي انا فاكرها

[MITSUKERO]

مبروك ياباشا

التليين 1000 كيلو ثم تغيير زيت و فلتر اوعي تسيب الفلتر

[saddam]

صديقي المواطن
مبروك وأنا سعيد بيك ﻷنك صاحب فكر مستنير ولست مع أصحاب القول الخاطيء بإنك تجيب مكنة إستيراد أو حاجات تانية بينما تصلح بتاعتك عند حد فاهم وتقعد معاك 5 أو 8 سنين وتبقه عارف جواها إيه لكن الناس تصطدم مرة بميكانيكي عبيط عديم الخبرة وكفتجي يعيشهم تجربة سيئة فتخليه طول عمره يقللك التوبة أعمل عمرة لمكنة وإنت عملت التصرف السليم
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

[engwael]

واضح ان اللي عملته عجبك بس انت مقلتليش بردو الين قد ايه

[saddam]

واضح ان اللي عملته عجبك بس انت مقلتليش بردو الين قد ايه

صديقي المواطن
أنا أصلا التليين ده عندي مزاج ويوم التليين ده عندي يوم سعادة وكمان بكرة ولا بعد بكرة عندي تليين في عربيتي رقم 9 طقم الشنبر يكفيه تليين 8 ساعات ولكن أنا بلين 24 ساعة متواصلة بدور العربية وبقعد جتبها وعشايه وغدايه معاها وبجيب كراسي ونقعد مع الناس والشاي والبسكوت وتوابعهم
عشان لو أي مشكلة تبان معايه بعد كده أنزل الزيت والفلتر وأحط بقه زيوت ترميمية وشوية خلطات وأعيش المكنة لحظتها وأخليها تفتكر أمجادها القديمة ولما بلين لو بالشارع أقفل الدركسيون بقفل عصاية محدش ضامن الغدر الوطني
وهذا ما لزم بيانه ودمتم وبالتوفيق وإلى اﻷمام ومن نصر إلى نصر
ودمتم للنضال

[FAR!D]

الحمد لله على قد كده اولا و ثانيا مبروك و ثالثا:
ربنا يستر علينا كلنا من غدر سير الكاتينه

[MMamdouh]

وقالي ان معلومة تغير وضع طرمبة الميه سنه بسيطة مش كل الناس عارفها

تعليق خارج الموضوع شوية بس ضرورى:

دا من ضمن الفروق بين ميكانيكى بيفهم و ميكانيكى بطيخة.... و زى ما احنا شايفين معلومة فى منتهى الهيافة تكلف فك موتور و طقم صبابات

مش كل ميكانيكى رخيص يبقى كويس ولا كل ميكانيكى غالى جزار

MMamdouh

[swimmer25]

طيب ما هو ممكن يكون العيب كان أصلا في طرمبة المياه إنها تقيلة وإنت مكنتش تعرف؟ ولا ايه؟

[engwael]

لا لما فكينا لقينا البليتين ضيعين متفرتكين وبلية طرمبة المياه كويسة

[lanos2004]

شكرا على نقل التجربه
متابع

[broadband]

ممكن تقولنا جبت ايه تانى و المصنعية كام لو سمحت
اكيد جبت جوانات و الذى منه

و مبروك عامة