اخيرا فتحت الماتور ودى التجربه بالاسعار لانوس 2004

[samehenany05]

طبعا العربيه كانت بتنقص زيت + دخان ابيض + مياه بتنقص بمعدل كوب ماء كل ثلاثة آيام

رحت للميكانيكى فك الماكينه الحمد لله قالى طقم شنبر بس

اشتريت طقم شنبر يابنى knp 150 ج
طقم جوان كورى 140 ج عباره عن علبه كارتون فيها ( جوان وش سلندر + جوان مينفولد + جوان فرن + كوتش صباب )
جبت بجيهات 45 ج
فلتر بنزين كورى مكتوب عليه mg 30 ج
فلتر زيت 20ج
4 لانيه 5 ج

مجموعها 450 ج

رحت خرطت وكان فى حته كده فى الوش مياه الحنفيه وكلها بس بسيطه قوى عملها وظف الوش وركب كوتش الصباب وخد للخراطه 210 ج بالبقشيش

طبعا اليوم كده خلص لسه هشوف ايه اللى هيحصل بكره وهقولك على ماتم

السؤال

العربيه هتحتاج لتلين ولا همشى بيها على طول
تفتكروا الميكانيكى هياخد كام

انا كنت عاوز اغير الدسك والاسطوانه والبليه بس هوه قالى بعد ما نخلص حوار الماكينه ( فى المنصوره عندنا الميكانيكى لوحده والعفشجى لوحده فشكله مش عاوز يوجع دماغه )

انا سألت على الدسك والاسطوانه والبليه نوع فاليو بمبلغ 420 ج

بكره اكملكم بس ياريت تردوا على أسألتى

[aw2100]

طالما غير الشنابر لازم تليين على الأقل 1000 ك وانصحك تغير طقم الدبرياج بالمرة خصوصا لو طلع الموتور من العربية لكن لو مسقطش الموتور ممكن تأجله وربنا يوفقك !!

[samehenany05]

طالما غير الشنابر لازم تليين على الأقل 1000 ك وانصحك تغير طقم الدبرياج بالمرة خصوصا لو طلع الموتور من العربية لكن لو مسقطش الموتور ممكن تأجله وربنا يوفقك !!

لا مطلعش الماتور بره

[starlanos]

ربنا معاك

[Silent~Dream]

هتلين 1000 كيلو و الف مبروك

[Khaled Lanos]

ألف مبروك ياباشا
اللي اعرفه انك لو مخرطتش وركبت شنبر بس تمشي عادي بدون تليين..لكن واحدة واحدة عليها في الأول ومتقرصش عليها.

[MMamdouh]

طالما طقم افشمبر اتغير لازم تليين

MMamdouh

[mostafa8085]

ربنا معاك و تخلص العربية على خير
بعد اذنك مين الميكانيكي اللي بتتعامل معاه في المنصورة ؟

[agaty1st]

لازم تلين 500 كيلو الrpm ميزيدش عن 2.5 و السرعه القصوى متزيدش عن 60 كم/ساعه مع عدم طلوع اي مطالع لمسافة لحد ما تعمل 500 كيلو و بعدين تغير زيت و فلتر زيت و تمشي 500 كيلو كمان مشي طبيعي لكن بدون قرص و بعد الألف اعمل اللي انتا عاوزه
و لازم قبل كل ده تلين وهي واقفه و تحرق 20 لتر
و نصيحه كل ما تهدى عالموتور في التليين كل ما يعيش معاك

[samehenany05]

ربنا معاك و تخلص العربية على خير
بعد اذنك مين الميكانيكي اللي بتتعامل معاه في المنصورة ؟

شكرا ليك الميكانيكى فى السنبلاوين

[samehenany05]

مع الاسف مستلمتش العربيه

كان من المقرر استلام العربيه اليوم لكن حصل الاتى

بعد مركب الماكينه غيرت سير الكاتينه بجديد وبعد الدواره سمعنا صوت حاجه خشنه زى ما يكون بلى قالى هنغير بلى الكاتينه رحت اشتريت واحده كورى ب 70 ج

ركبها لقينا نفس الصوت قالى لازم نحل تقريبا العيب ده من طرمبة المياه بينى وبينكم العربيه معايا بقالها سنه ومغيرتش طرمبة مياه ومعرفش ظروفها ايه والعربيه كانت ماشيه بمياه الحنفيه فقالى سيبها تلين تحرق صفيحة بنزين وهيه واقفه ونحل بكره ونكمل

نسيت اقولك

مقاس الزيت مكنش بتاع العربيه اشتريت مقاس زيت + جلده بتاعت المياه جلده صغيره بس مش فاكر اسمها دول ب 30 ج

واشتريت زيت بترومين عادى لزوجه 40 ب 57 ج

بكره اكملكم ان شاء الله

[broadband]

ربنا يوفقك موضوع الموتور ده مشكلة لانك لازم تستغنى عن العربية اكتر من يومين

[MMamdouh]

على فكرة موضوع التليين دة فيه جدل واسع حول الطريقة الصحيحة للتليين... لما والدى عمل طقم شمبر فى العربية البيتلز كان مكتوب على علبة الشمبر ان تليين الشمبر عبارة عن تسارع من سرعة 60 الى 90 بدون حرق او تسقيت نقلات و اول ما توصل 90 ارفع رجلك و سيب العربية ترجع لسرعة 60 لوحدها بدون فرملة.... تكرر العملية السابقة 10 مرات بعد كدة يبقى الشمبر اتلين

دى صورة من المحادثة اللى بينى و بين خدمة العملاء للشركة اللى عملت طقم الشمبر لما لما موضوع التليين اتفتح قبل كدة:



MMamdouh

[mgelgel]

لسه عامل الشغلانة دي من كام شهر و جبت طقم شنبر و و غيرت صباب كان بيهرب كبس و بعد ما الميكانيكي قفل و دورت لاحظت الدخنة البيضاء لسه موجودة فقاللي بس كمل تليين و بعد 500 كم الدخنة استمرت فحل المكنة تاني طلع الباشا مغيرش كاوتش الصبابات بس المرة دي بقي وقفت علي ايده و عملت الصح وديت الوش المخرطة لعمل مسح و ملو نتيجة بعض التاكل و غيرت طقم الصبابات كله و طبعا سير تقسيمة و البليتين و برضه زي حضرتك طلمبة المياه و طقم بوجيهات و غيار زيت تاني و قفل و دور ماشاء الله الموتور نقط ميه بعد ما العربية سخنت بس طبعا الموضوع ده دخل في 1900 جنيه و اللي فاكره كالاتي
طقم شنبر ياباني 180 جنيه
جوان الوش + التاكيهات 60 + 40
زيت خفيف 50
طلمبة المياه مش فاكر
مصنعية الميكانيكي 450 عشان بعد ما خلص اضطر يغير طلمبة المياه
------------------------------
طقم صبابات 280 جنيه
مصنعية المخرطة 180 جنيه
طقم كاوتش صباب 40
سير تقسيمة 80 البليتين تقريبا 200
زيت 50
طقم مسامير بتاعة وش غطاء التاكيهات بالجوانات 50 جنيه
طقم بوجيهات 45
و حاجات تانية مش فاكرها و دفعت مصنعية 100 جنيه اكرامية للصنايعية
طبعا المصروف كتيييير بس احسن ما اجيب موتور تاني يا عالم بيه و ترخيص ووجع قلب
نصيحتي لحضرتك تعمل غسيل لدورة التبريد و تحط ميه خضرا من اي بنزينة موبيل
و طبعا الواحد بطل يقرص ع العربية لان زعلها طلع وحش قوي

[samehenany05]

على فكرة موضوع التليين دة فيه جدل واسع حول الطريقة الصحيحة للتليين... لما والدى عمل طقم شمبر فى العربية البيتلز كان مكتوب على علبة الشمبر ان تليين الشمبر عبارة عن تسارع من سرعة 60 الى 90 بدون حرق او تسقيت نقلات و اول ما توصل 90 ارفع رجلك و سيب العربية ترجع لسرعة 60 لوحدها بدون فرملة.... تكرر العملية السابقة 10 مرات بعد كدة يبقى الشمبر اتلين

دى صورة من المحادثة اللى بينى و بين خدمة العملاء للشركة اللى عملت طقم الشمبر لما لما موضوع التليين اتفتح قبل كدة:



mmamdouh

دائما تأتينا بالجديد شكرا لك