خلاص قربت اتجنن من العفشة يا لانوس حرام عليكى

[abzoabzo]

انا الاسبوع اللى فات المقص اتكسر بيه وانا فوق كوبرى اكتوبر
المشكلة دلوقتى بعد متاكد ان المقص التانى سليم وظبط زوايا
فى بنزينة ميدان الجلاء
كل الناس مقتنعين ان صوت الطرقعة اللى بتحصل معايا وان نازل من على اى مطب صناعى او حتة اسفلت متكسرة ده طبيعى وفى كل الانوس

وتسمع بقى مشعوزين واحد يقولك اعمل تقرير عفشة فى موبيل شارع السودان
والميكانيكى يقولك ده كوبلن
والعفشجى يقولك سيبها شوية لغاية متظهر
وواحد يفتيلك فى المساعدين
وانا بينى وبينكم بقيت خايف امشى بيها ليحصلى حاجة تانى


ياريت يا جماعلة لو حد مر بالمشكلة ده يقولى عامل ايه

او حد يفهم فى اصلاح المشكلة ده ياريت يفدنا

وجزاكم الله خير

[abzoabzo]

ياجماعة هى المشكلة ده عندى بس ولا ايه

[Hossam_Hassan]

بص، انت لازم تروح لعفشجى محترم و ارشحلك الحاج صابر اللى ورا مرور عين الصيرة

[Strong]

بص هو في صوت طرقعة بتحصل معايا لما بامشي في مكان فيه طالع ونازل كتير ده أنا باسمعه عندي وكشفت على العفشة قاللي سليمة لو هو الصوت ده اعتقد كده خلاص

الصوت ده بيظهر لما بيكون الطريق في طالع ونازل او لو منزل صغير زي الحفرة الواسعة في اللحظة دي بتظهر الطرقعة

واتأكد عندك لحسن يكون في مشكلة ولا حاجة تاني

[m.farouk]

احتمال تكون البتاعه البلستك الموجوده فوق المساعد تكون متنية وعلشان كده بتخبط فى المساعد هى عباره عن حاجة زى الكوبية

[abzoabzo]

جزاك الله خيرا
بس ياريت الاستاذ محمد ممدوح
يحسم لينا لموقف

[MoMohsen]

غالبا دية علبة دركسيون ...روح لعفشجى كويس يكشفلك عليها

[D . a .\ AYMAN]

انا كان معايا نوبيرا وكانت بتعمل صوت الطقطقة ده في الشوارع المكسرة دايما وروحت لواحد عفشجي معرفوش وقاللى ده طبيعي !!!!!!

بس بعد كدة روحت لمحمد عبده وقاللى انها كده عايزو شغل في العفشة لكن مالحقناش نبص عليها لأني بعتها على طول عشان اتخنقت منها

عموما صعب يبقى فيه عربية بتعمل صوت الطقطقة ده ويبقى طبيعي !!

المقصات بتاعة الدايو عموما مش حلوة على حسب مافهمت من محمد عبده وبتتغير بمقصات اسباني أو برازيلي مش فاكر طبعا اللى هايفيد في الموضوع ده أكتر أستاذنا الكبير محمد ممدوح باشا

[Akram]

انا عندي صوت طقطقة برده لما بكون ماشي بسرعة شوية و أعدي على حفر ,
غيرت مساعدين و بيض و طرف بارات و كوبايات و بطاحات ,
و الصوت قل و الدنيا اتحسنت كتير , بس الصوت ما زال بحس بيه ,

رغم ان واحد صاحبي معاه لانوس 2006 بس ما شاء الله مفيهاش الصوت ده ,
متهيألي الواحد محتاج يروح لصنيعي تاني غير اللي بيتعامل معاهم و هو يشوف ايه الأخبار.

[acounter01]

حاجة اسمها كوزة بتركب فوق المقص دي ممكن تكون متنية أو معوجة أو مش راكبة صح
روح للفشجي وقله يبصلك عليها

[abzoabzo]

محمد باشا ممدوح انت رايك
فين يا كبير

[MMamdouh]

روح لمحمد عبدة يشيك على العفشة

MMamdouh

[msobhy]

انا خبرتى قليلة جدا جدا لسه فى اللانوس
اولا انت اخدت اى مطب جامد جدا بالعربية او اخدت مطب وانت معاك ناس كتير/ لو كدة يبقى ممكن يكون الشاسية فتح معاك وده بيسبب كذا حاجة اولها المقصات والكبالن بتبوظ والعربيه تلقيها بتحدف معاك وفى الاغلب بتكون يمين بالاضافة لصوت الطرقعة وعلشان تتأكد من الموضوع ده بتروح عن عفشجى محترم وبيبدأ يقيس المسافة بين الركبتين و هيه تقريبا 65 سم (على فكرة مش متأكد من الارقام) وبيقص المسافة بين الصرر وتقريبا بتكون 254 سم ولو الدنيا فارقة بيعملك زرجينة بيظبط الموضوع - الموضوع ميخوفش خالص بالنسبة لكلمة فتحة شاسية والموضوع بيتكلف 80 جنيه تقريبا بظبط الزوايا واهم حاجة تراجع درجات ميل العجل مع الشخص اللى بيظبط الزوايا ولازم يكون مكان محترم بحيث ان الجهاز اللى بيظبط الزوايا يكون عليه البيانات بتاعت اللانوس وبرضو خلى بالك ان ظبط العجل بتاع اللانوس 97 - 2003 حاجة واللى بعد كدة حاجة تانية

[shanodaa]

غالبا كلام الميكانيكي صح كبلن

[kero25]

انا عندى نفس المشكلة بس مش بتحصل كتير بلاخص وانا عند مطبات كارفور بسم صوت الطقة دية وانا معى ناس كتير فى العربية من العجلة اليمين وانا نازل من عند المطب بس انا كنت فاكر انها الدالايا بتاعت العجلة