مشكلة و حل . الدبرياج بيلزق فى الدواسه

[-=.AHMED.=-]

بسم الله الرحمن الرحيم

السلام عليكم و رحمة الله

اعضاء المنتدى الغاليين
دى مشكله قابلتنى و تم الحل و الحمد لله فقولت افيد بيها اعضاء المنتدى

المشكله ان الدبرياج سقط فى الدواسه . مش تحت قوى لكن كلان خلاص بينه و بين الدواسه كام سنتى . فتحت الباب و نزلت زقيته لفوق . طلع تمام

مشيت شويه كمان عمل نفس الموضوع

تانى يوم مكدبتش خبر و طلعت على الميكانيكى و قولتله اتصرف
بعد ما كشف عليها قالى ان ماستر الدبرياج العلوى تعبان و السفلى جاب آخره

قولته و المطلوب
قالى اشترى على الاقل السفلى دلوقتى و العلوى ممكن كمان فتره مش كبيره

روحت اشتريت ماستر الدبرياج السفلى
نوعين
واحد فاليو كورى 125 جنيه
و واحد كورى اصلى 140 جنيه الاصلى

سألت على العلوى
قالى نفس النوع فاليو كورى 125 جنيه
و الاصلى معندوش . بس اعتقد هيكون نفس السعر لان الفاليو سعره واحد علوى و سفلى

و انا اشتريت الاصلى بحكم ان الفرق كلام فاضى

رجعت للميكانيكى ركب القطعه الجديده تمام
و زود الزيت الباكم . لانه نقص طبعا مع الفك و التركيب و الكشف فى الاول

و طبعا اللى مش معاه زيت هيتكلف عبوة زيت زياده على الاسعار اللى كتبتها و معاها اجرة الميكانيكى

و الحمد لله العمليه مشيت و العربيه اتظبطت

و منصحش اى حد فى النهايه انه لو حصل معاه الموضوع دا انه يستنى على العربيه او يسوقها على وضعها دا كتير او انه لازم يزود الزيت الباكم لو المشوار طويل للميكانيكى لان الماستر لما بيعمل كده لازم بيكون فيه تسريب فى الزيت
لانها ممكن توصل لانك متقدرش تنقل الغيارات
و ربنا يسترها

اتمنى اكون فيدتكو بحاجه

[a_arazik]

الف مبرررروك

[ahmedmanga]

هتلاقى غالبا العيب فى السوسته بتاعت الدواسه روح لحد يشلها كده او يزيتها هتلاقى العيب مش موجود ان شاء الله الموضع دة كان عندى وعملت كده واتظبطت

[-=.AHMED.=-]

الف مبرررروك

الله يبارك فيك . مش عاوز اقول عقبال عندك

هتلاقى غالبا العيب فى السوسته بتاعت الدواسه روح لحد يشلها كده او يزيتها هتلاقى العيب مش موجود ان شاء الله الموضع دة كان عندى وعملت كده واتظبطت

شكرا لردك استاذ احمد . و انا بعد الكشف كان عندى الماستر السفلى هوا اللى عاوز يتغير زى ما كتبت فى الموضوع كده . و الحمد لله العمليه ظبطت بعد التغيير . و قريب هغير العلوى بالمره ان شاء الله عشان يبقى الدبرياج كله تمام كده

[ahmedmanga]

ربنا يخليك

[MMamdouh]

هتلاقى غالبا العيب فى السوسته بتاعت الدواسه روح لحد يشلها كده او يزيتها هتلاقى العيب مش موجود ان شاء الله الموضع دة كان عندى وعملت كده واتظبطت

الدبرياج مفيهوش سوستة

MMamdouh