أستفسار مهم من وحوش الدايو

[أشرف العدوي]

صلوا على النبي

بما اننا لينا نفس المواتير فحبيت استفسر عن شيئ محير عربيتي أفيو مانيوال 2008

دلوقتي انا سير الكاتينة اتقطع و انا ماشي
و طبعا غيرت صبابات و طقم جوان كامل
و زيت شيل الاحمر
و بوجيهات
و سير مجموعة
و فلاتر
و زيت فتيس مانيوال موبيل بالمرة
و غسيل دورة التبريد
و تيل فرامل امامي
كل ده مع أحد المراكز المعنة حديثاً في المنتدى

الي حصل بقى
مشيت حوالي 260 كم و بقيس الزيت لقيته على الـ Min فروحت للمركز تاني علشان نشوف فيه ايه

ملحوظة :- لما غيرت الصبابات و الحاجات دي طلبت جيركن الزيت أخده يعني على اساس انه فاضي
روحت البيت لقيت فيه بتاع حوالي 2 ليتر فشيلتهم معايا على اساس انهم بتوع عربية تاينة علشان ارجعهم المركز تاني

المهم روحت المركز و حكيتله على الي حصل قالي انت كدة عربيتك بتاكل زيت مع ان ما كنش فيه زيت على البوجيه
بس خرطوم العمة الي واصل للبوابة كان معرق بيسط
فقولتله ان جيركن الزيت الي خدته قبل كدة في حوالي 2 ليتر المهم زودته
و قالي انت كدة لازم تعمل طقم شنبر لان العربية بتاكل زيت

السؤال هو المنطقي ان العربية لو بتاكل زيت تاكل 2 ليتر في 260 كم من غير دخنة و لا برجلة و لا اي حاجة خالص

مع العلم بردو ساعة الصيانة الاولى هو قالي انه حط ال 4 ليتر كلهم يعني المفروض الجيركن يكون فاضي
انا عارف ان عربيتي بتاخد ال 4 ليتر من ساعة ما كنت بعمل الصيانة في مقار كان بيقولي لما بتغير فيلتر بتاخد 4 من غير الفلتر 3.75 ليتر

الغريب بقى
اني ماشي دلوقتي حوال 350 كم و الزيت ما نقصش مللي واحد

انا مش فاهم حاجة

[swimmer25]

يبقي فعلا هو محطش الجيركن كله والصنايعي إعتمد إنه يقيس وهو بيزود (ميعرفش الكمية الصح)
وكان بيزود ويقيس علي طول فمخدش المقاس الصح
كويس إنك أخدت بالك
تابع المقاس وإن شاء الله مفيش مشكلة

[أشرف العدوي]

يبقي فعلا هو محطش الجيركن كله والصنايعي إعتمد إنه يقيس وهو بيزود (ميعرفش الكمية الصح)
وكان بيزود ويقيس علي طول فمخدش المقاس الصح
كويس إنك أخدت بالك
تابع المقاس وإن شاء الله مفيش مشكلة

ربنا يطمن قلبك
انا عايز اعرف بس لو العربية بتاكل زيت ايه الاعراض و انا ماشي

و كمان الطبيعي ان تاكل حوالي 2 ليتر في 260 كم

لان صاحب المركز مشكورا عرض عليا اني ابتدي عمل طقم الشنبر في نفس اليوم بس انا ما كنتش عاملي حسابي في الفلوس طبعا
فقولتله ممكن كمان 15 يوم بالكتير و طول الفترة دي هتحرك بيها في اضيق الحدود

فجزاه الله خيرا عرض عليا اني اسيبها عنده و هو هيعملها و مش مشكله الفلوس
بس طبعا انا اتحرجت منه

[gadoo30]

تابع الزيت كويس وان شاء الله العربية مفايهاش حاجة وبعدين انت حاطط زيت تقيل ميطرش بسهولة ولا فية رشح زيت باين ولا دخان
ان شاء الله خير
بس غير الراجل دة لان لو كان فعلا حاطط زيت قليل فدة كان هيضيعلك الموتور وربنا ستر

[مصطفى-حسن]

عربيتى لما كانت المكنة خفيفة كانت بتاكل كيلو زيت كل 150ك الكلام فى اخر مراحلها قبل ما اعمر

بالنسبة ليك زى الاعضاء ما قالوا تابع مقاس الزيت كل يوم الصبح قبل ما تدور وان شاء اللة خير

[Dr.Solom]

هوا اكيد نسى يحط لكمية المزبوطه عشان لو بتاكل 2 لتر ف 260 كيلو هاتلاقى نفسك ماشى بعربية بطاطا وانت بتقول مافيش اى دخنه

[ضى القمر]

هوه محطش المقياس المظبوط للزيت

[moe gawad]

اشرف بيه ايه الاخبار يا فندم،
يافندم العبوه اللى مع حضرتك ديه كانت بتاعت عربيتى ، وانا اللى احرجت اقولك والله العظيم،
اعتقد انى حضرتك يافندم لمست فينا المصداقيه فى التعامل، واشكر الظروف اللى عرفتنى على شخص محترم زى حضرتك،
استاذن حضرتك تعدى عليا فى المركز مره ثانيه نعيد الكشف على السياره بطريقه اكثر دقه ، مع العلم بان المره الماضيه الزيت وصل للبوابه الخاصه بالانجكشن كما زكرت باعلى الموضوع ،
انا فى انتظار حضرتك فى مركزى المتواضع نعيد الكشف مره اخرى انشاء الله ماكينتك هاتتلع سليمه ، والخطأ هايكون من عندى انا ، وبالمره تاخد قهوتك معايا ، ياريت يكون فى اسرع وقت

[أشرف العدوي]

ازيك يا باشمهندس
انا مش عايز اتقل عليك و الله
بس انا ماشي من ساعة ما كنت عندك حوالي 500 كم و الزيت فعلا ما نقصش خالص
ان شاء الله أجيلك يوم الجمعة الي جاية و هبقى طبعا أتصل بحضرتك قبلها بيوم .
و أن شاء الله خير

[moe gawad]

تنورنى حضرتك يا اشرف بيه، وانا مع حضرتك 24 ساعه انشاء الله

[exact]

اظبط الزيت بنفسك وتابعه

[msnaga]

أولا كويس ان حضرتك احرجت بسبب الفلوس وما عملتش طقم شنبر.
ثانيا الماكينة سليمه إنشاء الله ولا تحتاج طقم شنبر وما تفتحش الموتور بدون داعى لأنه لاتوج أى مؤشرات على نقصزيت الموتور ولا تعريق زيت على البوجيهات
ثالثا اضبط مستوى زيت الموتور على المقاس عند شرطة الماكسيمم كنقطة قياس ( هو المفروض يكون بين العلامتين فوق المنتصف بحاجة بسيطه) وتابع مستوى الزيت يوميا أو كل يومين حسب مشاويرك . لو ثابت مابيقلش ، يبق أوكيه، وأعتقد هتلاقيه ثابت.

[moe gawad]

يافندم السياره فعلا على اخر مره السيد والصديق المحترم اشرف بيه شرفنى فى المركز كانت ناقصه حوالى ثمن كيلو زيت، الشرطه نقصت حاجه صغيره جدا،
والفاصل انى فى المرتين يتم تنظيف البوابه، وخرطوم العمه ، ونجد بداخلهم زيت مره اخرى ،
اشرف انا بعتبره صديق شخصى، واخ لى، فعلا،
هو راجل محترم جدا ولا يستحق منى ومنا جميعا سوى كل احترام وتقدير ، كفايه العيش والملح اللى بينا