تجربتي مع تغيير الكمبرسور

[Mahmoud.Fathy]

طبعا من حوالي 3 ايام كتبت الموضوع ده

http://www.nilemotors.net/Nile/418207-a.html

انا مع جميع الاراء اللى بتاكد ان الكمبرسور الاستيراد زي البطيخة وان الافضل الجديد ... لكن للاسف الميزانية لا تسمح

امبارح وديت العربية لورشة التكييفات اللى بتعامل معاها وبدأ الشغل ... حلينا الكمبريسور وخرطوم الفريون اللى طالع من الكبرسور ورايح على السربنتينة الداخلية والفلتر والسير ومروحة التكييف وفكينا العمة ... وفضنا الفريون (أه يا فريوني يانا ياما ) ... مكملش شهر على الشهر

هو للامانة انا بشحن التكييف من شهر الراجل قالي الكمبرسور ده تعبان ومش هيعمر معاك .. هات اخره وبعيدن نغيره ... قلتله هيمشيني لحد اخر الصيف ... قالي مظنش :( :( :(

المهم جبنا كل حاجة جديدة (الفلتر - سري التكييف - الخرطوم بتاع الفريون عشان كان مرشح وشكله تعبان) والكمبرسور الاستيراد وبدأ التركيب ... بعد ما ركبنا وشغلنا التكييف ... الكمبروسر كان بيسقع وكله تمام لكن بيطع صوت خبطة وتكتكة من جواه ... الراجل قالي لا سبلي العربية وروح بقى عشان الكمبرسور ده مش مظبوط .. أنا هرجعه واجيب واحد غيره (اه يا بطني ... احنا بدأنا ولا ايه) هو كده كده الكمبرسور مسئولية الراجل مش تبعي

النهاردة رحتله لقيته امبارح بالليل راح رجع الكمبرسور وجاب واحد تاني وركبه وظبط وشحن وخلص شغل الساعه 3 بالليل وقفل الورشة ... رحت انا صحيته من النوم وخدته على الورشة :) :) :) فتحنا العربية وقالي دور وشغل التكييف ... دورت وشغلت التكييف ... لقيت صاروخ هواء ساقع طالع من الهوايات ... لاول مرة احس بسقوعية الهواء بالمنظر ده ... حتى الكمبرسور القديم بتاعي مكنش بيوصل للدرجة دي من التبريد

المهم بدأ اختبرارت ... كبس فريون وتشغيل التكييف على سرعات مختلفة ويعلي الموتور ويوطي الموتور وتجربة اوضاع التكييف في كل حالات السيارة .. الحمد لله صوت العربية طبيعي جدا وصوت الكمبرسور هادي وناعم وصوت التكتكة بتاعت امبارح مش موجود ...

قالي بالمرة بقى ننظف السربنيتة الداخلية .. وما اداركم ما فك وتنظيف السربنتية الداخلية ... حركات اكروباتيه داخل صالون السيارة لفك السربنتينة وتركيبها تاني من تحت الطابلوه ... بس نظبفها وركبها وتمام التمام ..

وخدت العربية ومشيت وانا مطمن نسبيا وقالي احنا على التجربة لمدة اسبوعين ... أى حاجة تحصل تعالى

وبكده احنا غيرنا (سير التكييف - فلتر التكييف - خرطوم الفريون اللى داخل صالون السيارة - الكمبرسور) ونظفنا السربنتينة وشحنا فريون جديد طبعا

الحوار كله اتكلف بالمصنيعات 1100 جنيه :( :( :( ... أنا عارف ان كده غالي بس انا برتاح للراجل ده وبثق في شغله

وحاليا انا على التجرية وربنا يستر وميحصلش اى خوازيق

[modyegypt]

طبها عالى بس
الاهم من كل دة انك كنت تغير فلتر الفريون اللى جمب الكمبوروسر مش فلتر هوا التكيف
لان دة اللى بيتقى الفريون

[akmm]

الف مبروك ......... وحاول خلال الاسبوعين بتوع التجربه تهرييه تشغيل على كافه السرعات وفى اوقات مختلفه خاصه بالنهار .

[Mahmoud.Fathy]

طبها عالى بس
الاهم من كل دة انك كنت تغير فلتر الفريون اللى جمب الكمبوروسر مش فلتر هوا التكيف
لان دة اللى بيتقى الفريون

اللانوس اصلا مفيهاش فلتر تكييف هواء ... الفلتر اللى انا غيرته واللى انا اقصده هو فلتر تنقية الفريون اللى قدام الريداتير ...

[amirz]

الله ينور ومعلش علقة تفوت ولا حد يموت

[samehenany05]

مبروك ياباشا عاوز اعرف الراجل بتاعك عنوانه فين

[lutenit030]

تغيير زيت الفرامل

انا عندى استفسار اتمنى الخبراء هنا يجاوبونى عليه
انا حبيت اغير زيت الفرامل بنفس الطريقه ديه

https://www.facebook.com/l.php?u=http%3A%2F%2Fwww.nilemotors.net%2FNile%2F149434-a.html&h=lAQHqseey

بس اللى حصل معايا انى لما فكيت مسمار هواء اول عجله خالص نزل كام نقطه و خلاص و الزيت مش بيندفع بغزاره زى ما هو مشروح فى الموضوع، خايف اكارك لان ميكاميكيه كتير نصحونى انى ماخدش هواء للعربيه عشان ممكن المساتر العمومى ميجمعش تانى و يبوظ و حضطر اغيره لان مساتر الانوس وحشه جدا (الكلام ده مظبوط ولا هجس) ؟؟

ايه رايكم فى الموضوع ده؟؟ انا عايز اغير الزيت لانه متغيرش من 14 سنه

[swimmer25]

ربنا يباركلك فيها ومادام مستريح خلاص
وفعلا مهما تصرف وتلاقي في الأخر الحاجة إتصلحت بتستريح نفسيا عشان بتحس إن ربنا باركلك

[ادوارد]

الف مبرووك
ممكن عنوان الراجل دة ورقمة على الخاص

[lutenit030]

انا عندى استفسار اتمنى الخبراء هنا يجاوبونى عليه
انا حبيت اغير زيت الفرامل بنفس الطريقه ديه

https://www.facebook.com/l.php?u=http%3a%2f%2fwww.nilemotors.net%2fnile%2f149434-a.html&h=laqhqseey

بس اللى حصل معايا انى لما فكيت مسمار هواء اول عجله خالص نزل كام نقطه و خلاص و الزيت مش بيندفع بغزاره زى ما هو مشروح فى الموضوع، خايف اكارك لان ميكاميكيه كتير نصحونى انى ماخدش هواء للعربيه عشان ممكن المساتر العمومى ميجمعش تانى و يبوظ و حضطر اغيره لان مساتر الانوس وحشه جدا (الكلام ده مظبوط ولا هجس) ؟؟

ايه رايكم فى الموضوع ده؟؟ انا عايز اغير الزيت لانه متغيرش من 14 سنه

انا اصف حطيت الموضوع هنا بالغلط

[Mahmoud.Fathy]

ياشباب ... اسمحولى بس اجرب الشغل لمدة معينة وبعدين اديكوا رقم وعنوان الراجل ... عشان اكون انا اطمنت على الشغل 100/100 ومحدش فيكو يلبس بسببي :) :) :)

[S O P H O S]

معلش يا باشا
ان شاء الله تكون الاخيرة

[Khaled Lanos]

هو اللانوس فيها فلتر فريون؟
اصلي معنديش واحد :)

[Mahmoud.Fathy]

فيها فلتر فريون موجود وانت واقف قصاد كبوت العربية على الشمال امام الريداتير ... شبه الزجاجة المعدنية لونه فضي ...

[Mahmoud.Fathy]

بعد اسبوع من التجربة .. وفي اليومين الحر اللى فاتوا دول ... التبريد كان سئ جدا ... رجعت تاني كشفت على العربية ... نص شحنة الفريون اتسربت .. والسبب ... ابرة موجودة في خرطوم الفريون اللى طالع من الكمبرسور ورايح على الصالون ... وتم تغيير الابرة واعادة الشحن ولا توجد مشاكل في الكمبرسور حتى الان ... ولازلنا في مرحلة التجربة