أسباب جعل الموتور خفيف ؟؟؟؟؟؟

[pepomedhat]

ان من رأى ان الموضوع ده فيييه اسباب كتيير اوى
بس من احد الأسباب ديه هى الدوس على بدال البنزين بشكل عنيف

وياريت اى حد عندوا أسباب لجعل الموتور خفيف يقول عشان نقدر نتحاشى الموضوع ده و طرق الوقاية منه

عايز اشوف شلالات من المشاركات :)

[محمود السيد]

من الاسباب تهريب الكبس للبستم

[amdd]

متابع

[المنسي]

نوعية الزيت كمان ليها عامل مهم

[moko_2004]

موتور العربية بيخف بشكل طبيعي مع الزمن و الاستعمال و علشان كدة كل عربية ليها عدة مستويات من العمرة بتحدد على الموتور حسب الصانع قبل ما تضطر بعدها لتغيير الموتور بالكامل طبعا دى من عربية لعربية بتختلف
فية برضة تصرفات خاطئة بتجيب اجل الموتور بدري
1- القيادة الرياضية بصفة مستمرة على مواتير غير رياضية
2- عملية التسخين زيادة عن اللزوم
3- التسخين اقل من 30 ثانية و الحركة المفاجئة
4- الامركة و الضغط الزائد عن الحاجة عند التسارع
5- الضغط على البدال و التفصيلة على العربية و هيا باردة
6- النقل متأخر وعلى ار بي ام غير متناسب مع حالة الموتور و خصوصا للاوتوماتيك و كلما قربت للاحمر اعرف انك بتاكل في المكنة
7- استخدام زيت غير مناسب للمكنة و عدم تغييرة في المواعيد
8- نقص الزيت و تسربة
9- ضعف دورة التبريد و سخونة العربية بشكل مستمر
10- استخدام التكييف اثناء القيادة على سرعات عالية جدا من 140 وانت طالع لانك بتحمل على الموتور جامد

اغلب المواتير و من ضمنها الدايو الايكو تك ليها 3 مستويات من العمرة الاولى عند 250 الف كيلو بتشمل تغيير شنابر و خراطة بلوك و تغيير سبايك و بيلات و احيانا تغيير بساتم
و الثانية عند 500 الف و الثالثة عند 750 الف طبعا في ناس بتجيب اجل العربية قبل الموضوع دة وفية ناس بتزيد معاهم حاجة بسيطة حسب الاستعمال و المحافظة ولما الموتور بيكمل مليون كلم قلبة العداد الكبير المفروض يتحال للمعاش

الموتور بيبدأ 1496 سي سي و اخر خرطة في الشميز المفروض تكون سعتة 1730 سي سي
طبعا الناس بتقولك اشطة ماانا كدة وسعت حجرة الحريق ودة هيخلى العربية احسن للاسف انت وسعت حجرة الحريق مع تثبيت كمية الهواء اللى داخلة و كمية البنزين ودة معناه انخفاض للضغط و بالتالى ضعف في الاداء فمتفرحش قوى لان اغلب اللى بيعمر المكنة مبيقدرش يجيب اكتر من 140 سرعة بعد اول عمرة و120 سرعة بعد تانى عمرة

اعراض خفية المكنة
1-تهريب كبس من فايظ الزيت بيسموها تنفيخ و هتلاحظ البوابة الخاصة بالهواء دايما مزيتة بزيت اسود
2- زيت على سن البوجيهات
3- صعوبة شديدة في التدوير على الساخن
4- سحب ضعيف و غالبا العربية بتلت بلا داعى و فجأة وترجع تانى فجأه
5- عند فتح المكنة وازالة وش السلندر هتلاحظ ان البساتم مش ثابتة في مكانها بترقص يمين و شمال

في ناس بتسمي صيانة وش السلندر نص عمرة
هي مش نص عمرة اساسا و لا تمت للعمرات بصلة هيا صيانة لوش السلندر تحديدا لما يكون فية صبابات معووجة او جلد واقع او تاكيهات او عمود كامة و دة ملوش دعوة باللى بتكلم فية
المهم انك في القيادة الهادية و الصيانات المستمرة و تغيير الزيت في مواعيدة و التبريد الجيد هتعيش المكنة معاك الى اطول فترة ممكنة

[محمود السيد]

بارك الله فيك ...
بجد معلومات جميلة جدآ ومدهشة

[mr_sese]

السحب الزيادة

[FOUR 2014]

بارك الله فيك معلومات قيمة
وبالنسبه للانوس الافضل بدل متعمره تغير مكنه

[MMamdouh]

الموضوع ملوش علاقة بكبس و حرق و الحاجات دى.... عمر المكنة الافتراضى مرتبط بالصيانة الدورية و نوعية قطع الغيار و الزيوت اللى بتستعملها

يعنى لو العمر الافتراضى للمكنة من 250 الى 300 الف كيلو يبقى الحرق و الجرى هيوصلك الى ال250 الف كيلو لان دة الحد الادنى للعمر الافتراضى مع الاستخدام الاقصى للمكنة بشرط انك بتصينها صح

و العكس بالعكس لو بتستخدم العربية بشكل اقتصادى هتوصل لل300 الف لان دة الحد الاقصى للاستخدام الخفيف

باى حال من الاحوال مش هتعرف تزيد عن 300 الف لان دة الحد الاقصى و مع اقل احمال و ضغوط دة هيفضل الحد اللى عندة بتصل نسب التاكل للحد الاقصى المسموح بيه و اى تجاوز عن كدة هيؤدى لانهيار المحرك

لكن طبعا انت ممكن متوصلش اصلا لل250 الف لو انت بتستعمل قطع غيار مضروبة او بتهمل فى الصيانات و مش بتعملها فى مواعيدها او بتستعمل زيوت و شحوم اى كلام انت كدة هتقصف عمر المكنة... حتى لو مش بتزود عن سرعة 90 و الRPM مش بيعدى 3000

MMamdouh

[Ahmedmahereng]

متابع بقوة :d

[hon]

الموضوع ملوش علاقة بكبس و حرق و الحاجات دى.... عمر المكنة الافتراضى مرتبط بالصيانة الدورية و نوعية قطع الغيار و الزيوت اللى بتستعملها

يعنى لو العمر الافتراضى للمكنة من 250 الى 300 الف كيلو يبقى الحرق و الجرى هيوصلك الى ال250 الف كيلو لان دة الحد الادنى للعمر الافتراضى مع الاستخدام الاقصى للمكنة بشرط انك بتصينها صح

و العكس بالعكس لو بتستخدم العربية بشكل اقتصادى هتوصل لل300 الف لان دة الحد الاقصى للاستخدام الخفيف

باى حال من الاحوال مش هتعرف تزيد عن 300 الف لان دة الحد الاقصى و مع اقل احمال و ضغوط دة هيفضل الحد اللى عندة بتصل نسب التاكل للحد الاقصى المسموح بيه و اى تجاوز عن كدة هيؤدى لانهيار المحرك

لكن طبعا انت ممكن متوصلش اصلا لل250 الف لو انت بتستعمل قطع غيار مضروبة او بتهمل فى الصيانات و مش بتعملها فى مواعيدها او بتستعمل زيوت و شحوم اى كلام انت كدة هتقصف عمر المكنة... حتى لو مش بتزود عن سرعة 90 و الrpm مش بيعدى 3000

mmamdouh

أستاذ محمد بعد التحية
ياترى بخبرة حضرتك فى الدايو ياترى متوسط عمل المواتير إلى بنستخدمها فى اللانوس أد أية؟
وطبعا مع مراعاة الصيانة فى مواعيدها واستخدام زيوت ومكونات أصلية ولك جزيل الشكر

[Mahmoud.Fathy]

متابع بغباوة :-) مش عارف ليه عندى هاجس ان مكنتي خفيفة وعاوز اعملها اختبار كبس

[tarek_2005]

تشغيل التكييف علي سرعات عالية فوق ال 140
معلومة غير صحيحة

[pepomedhat]

فعلا ديه معلومات قيمة جدا شكرا للأعضاء الكرام :(

[moko_2004]

المهم انك في القيادة الهادية و الصيانات المستمرة و تغيير الزيت في مواعيدة و التبريد الجيد هتعيش المكنة معاك الى اطول فترة ممكنة

دى خلاصة القول و الكلام من الاخر