رشاشات ولا حاجه تانيه

[esnawy]

السلام عليكم جميعا..وكل سنه وانتم طيبين
عندي مشكله في عربيتي لانوس 2001 بقالها فتره
-العربيه فيها رجرجه علي السلانسيه مضايقاني جداا
-رائحه بنزيين
-الموتور كأنه هيبطل لو جييت ادووس علي البنزين مع فرقعه خفيفه.. وده بيحصل فقط في اول الدواره ولمده 3 دقائق تقريبا وبعد كده لو دوست الامور بتبقي عادي خالص
-السحب كوييس...بس احيانا بحس بنتشه خفيفه علي السرعات العاليه
-كشفت علي القواعد ومفيهاش مشكله
-غيرت طرمبه بنزيين وفلتر بنزين وحساس tps وحساس السلانسيه..وجربت موبينه جديده..لكن الاعراض السابقه مازالت موجوده.

انا دلوقتي شاكك بنسبه كبيره انها تكوون رشاشات..
ارجو الافاده ...لو حد في حضراتكم عنده راي اخر..مع الملاحظه انه لايوجد في منطقتنا التراسونيك او اي اجهزه لاختبار الرشاشات

[Ahmed Saad]

غير بوجيهات جديده بص هقولك على حاجات اعملها دور العربيه على السلانسيه وفك سلك سلك للبوجيهات السلك اللي يبرجل العربيه يبقى الاحتراق مظبوط والسلك اللي هتفكه مش هيأثر على العربيه أو يبرجل الموتور يبقى المشكله من هنا هتجيب مفك وتقربه من السلك مكان مابيتحط في البوجيه لو طلع شرارة يبقى السلك والموبينه تمام نخش على اللي بعده هتفك البوجيه بتاع السلك اللي مابتعطلش العربيه وتحطه في السلك وتخلي حد يدورلك العربيه لو أدى شرارة يبقى شغال ولو ماداش يبقى بوجيه طيب أدى شرارة يبقى تركب البوجيهات وتجيب لمبه صغيره 12 فولت مثلا لمبه نور صغير اللي هوا بتاع التابلوه اللي في الكشاف من قدام وتجيبلها دوايه وتعملها سلكين علشان تبقى لمبه بيان وتفك فيشه الرشاش اللي على السلندر اللي بنجرب عليه وتوصل السلكين بفيشه الرشاش اللي انت فكتها وخلي بالك تلمس كل سلك بكل سنه جوه الفيشه وطبعا العربيه دايره وانت بتعمل كده هتلاقى اللمبه منوره بسيط وبترعش لو بتعمل كده يبقى الضفيره تمام والكنترول تمام طيب لو منوره جامد ومتواصل يبقى كنترول بايظ ولو منورتش خالص يبقا كهربا طيب نورت وبترعش نور خفيف يبقى تفك الرشاشات والمسطرة راكبه في خراطيم البنزين والمسطرة بره الحوض أو الرشاشات من تحت من ناحية ما كانوا في الموتور وجهم لبره وخلي حد يدور من جوه لو الأربع رشاشات لاقيتهم بيرشو بنزين يبقى مافيش مشكله في الرشاشات ولو لاقيت واحد مش بيرش يبقى ده العيب وتغير طقم الرشاشات طيب لو مفيش مشكله في الرشاشات يبقى السلندر ده جاب شنبر ومهرب كبس وهتعرفه بقياس كبسلكل سلندر وان شاء الله ده اسوء الظروف ودي اخرآخر حاجه خالص لو كل ده شغال بس اعمل زي ماقولتلك بالترتيب وان شاء الله هتظبط وعموما انا هتابع معاك

[ضى القمر]

شوف البوجيهات ونضف الفلتر الهواء او غيره بالاضافه الى فتلر بنزين

[esnawy]

البوجيهات غيرتهم بطقم جديد..
وانهرده ركبت طقم رشاشات بالمسطره كامله بالرجيوليتور وبرضه لسه في رجرججه في العربيه علي السلانسيه..
مع العلم ان الموتور صوته كويس..

[Ahmed Saad]

البوجيهات غيرتهم بطقم جديد..
وانهرده ركبت طقم رشاشات بالمسطره كامله بالرجيوليتور وبرضه لسه في رجرججه في العربيه علي السلانسيه..
مع العلم ان الموتور صوته كويس..

طيب العربيه بتسحب حلو معاك وبتجيب سرعات لو كده خلي ميكانيكي يكشفلك على قواعد الموتور والفتيس

[hon]

فاضل سلوك البوجيهات وكانت بتحصل معايا ولما غيرت السلوك ضبطت
بدال معير طرمبة البنزين والموبينة والبوجيهات وفلتر البنزين فاضل على منظومة الكهرباء سلوك البوجيهات ماكنش نتكلم على الرشاشات وانتظر رأى الخبراء وبسيطة ان شاء الله

[Eng.Geo]

فرقعة ده يبقي في بنزين كتير في غرفة الحريق واطلع في العادم فرق برة
المسؤل هنا عن الموضوع ده هو الرشاشات وحساس الشكمان
حط العربية علي سكانر وشوف الرشاشات بتفتح في وقت قد ايه وشوف قراية حساس الشكمان
المفروض الرشاشت علي السلانسية بتفتح 1.6ms
لو قراية حساس الشكمان sensor1 bank1 ثابتة مابتتغيرش مع دوس البنزين يبقي الحساس فلسع

[esnawy]

متشكر خالص ياجماعه علي الردوود
..لكن هل حساس الشكمان لو فيه مشكله يعمل رجرجه علي السلانسيه..

[mohmmedzohier]

السلام عليكم

حساس شكمان صريح

[esnawy]

وفي مشكله كمان..لما بشغل النور او الاشارات يمين او شمال ..لو العربيه علي السلانسيه تتنفض اكتر...ولو في العربيه ماشيه بحس كأنه في حد بيشد العربيه للخلف ويسبها لحد ماطفي النور او الاشارات.

[waley]

غير سلك بوجيهات واعمل ايدل ليرن تانى لو مافيش حاجة من دول ممكن يكون الكونترول مهيس

[esnawy]

انا بالفعل غيرت سلووك البوجيهات..وعملت ايدل ليرن...لكن لايوجد اي تغيير..الوضع كما هو عليه

[esnawy]

بالنسبه للرجرجه اللي علي السلانسيه ..انا روحت امبارح للميكانيكي وقاللي الموتور ثابت ومفيش اي رجرجه في العربيه بسببه...وبعد كده نزل تحت العربيه وقاللي احتمال يكون الشكان بيخبط في العربيه من تحت وده اللي عامل الهزه في جسم العربيه..وفعلا مسك الشكمان من تحت ولقيت الرجرجه اللي في العربيه راحت بسنسبه 80%...

[esnawy]

لوسمحتو ياجماعه ..في اي حلول مقترحه لموضوع الشكمان ده قبل مارووح لبتاع الشكمانات علشان مايشتغلنيش.

[هيثم احمد]

بالنسبة للرجرجة على السلانسية انا عندى نفس المشكلة ذى دقدقة على السلانسيه اذود بنزين تروح ولما العربية تسخن تروح بنسبة كبيرة لكن سحب السيارة عالى رحت لميكانيكى قالى احتمال كبير فيه رشاش بايظ هو الى عامل كده بعد ما جرب كهربة الموبية والشرارة مع البوجيهات
بصراحة انا مسألتش بعد كده وسبت الموضوع من دماغى هل ممكن الموضوع ده ي}ذى حاجة فى العربية