تسقيف في العربية وزجاج كهرباء

[Sameyes]

مساء الخير على حضراتكم
عندي سؤالين:
الأول: عندي صوت تسقيف لما آجي أزود بنزين في المطالع أو حتي في الطرق العادية وبلاحظ كمان نقصان في مياه القربة مع العلم إني كبست دورة المياه مرتين عن إتنين مختلفين وبأحدث الطرق ولم نجد أي تسريب نهائي ومفيش مياه على الزيت ومفيش مياه في الشكمان بالعكس ده بيعرق فده معناه ايه هل حساس الشكمان "الاجسجين" هو السبب لأنه بيودع أو حساس الإيدال؟؟؟

الثاني:
عاوز أخلي الزجاج بالكهرباء فممكن أعرف أي معلومات وأسعار عن الموضوع ده؟؟

وشكراً

[Sameyes]

يعني ٢٨ واحد شاف الموضوع ومش مكلفين خاطرهم يقولو اي معلومة على العموم شكراً برضوا للي كلف نفسه وقرا الموضوع

[amoor89]

بتحط بنزين 80؟
ايه اخبار البوجيهات والفلاتر
حتى لو بتحط 80 تقدر تعدل فيشة الاوكتان لو العربية لانوس

[Rafek Orbit]

انا عندى نفس المشكله بس صوت تسقيفه مش عاليا وغيرت فلتر وبوجيهات والمشكله لسه موجوده وباستخدم بنزين 92

[dr.hazem]

بنزين اوكتانه مش مناسب للعربيه او غيارات بدري عن معادها او فلتر هوا مردوم او سخونة ماتور على غير العادة او نوع بوجيهات مش مناسبه او ظبط كهربا لو العربية كربيراتير
تحياتي

Sent from my mobile using Forum Runner

[MMamdouh]

الأول: عندي صوت تسقيف لما آجي أزود بنزين في المطالع أو حتي في الطرق العادية وبلاحظ كمان نقصان في مياه القربة مع العلم إني كبست دورة المياه مرتين عن إتنين مختلفين وبأحدث الطرق ولم نجد أي تسريب نهائي ومفيش مياه على الزيت ومفيش مياه في الشكمان بالعكس ده بيعرق فده معناه ايه هل حساس الشكمان "الاجسجين" هو السبب لأنه بيودع أو حساس الإيدال؟؟؟

تسريب المية اللى مش بيبان فى اختبار الكبس اما غطا قربة او جوان وش سلندر... و التسقيف المرافق للنقصان بيرجح اكتر موضوع الجوان خصوصا انك بتقول ا الشكمان بيعرق مية و احنا فى الصيف

الايدل و حساس الشكمان ملهمش علاقة لا بنفص المية و لا التسقيف

الثاني:
عاوز أخلي الزجاج بالكهرباء فممكن أعرف أي معلومات وأسعار عن الموضوع ده؟؟

لو بنتكلم فى بابين امامى يبقى هتحتاج مكنتين ووحدة زراير و ضفيرة و دول بالتركيب هيعملوا حوالى 500 جنية بالتقريب

لو بنتكلم فى اربع ابواب يبقى لازم تغير فرش الابواب و دة لوحدة ب 1200 جنية تقريبا غير تمن المكن و الضفيرة و المصنعية

MMamdouh

[MMamdouh]

يعني ٢٨ واحد شاف الموضوع ومش مكلفين خاطرهم يقولو اي معلومة على العموم شكراً برضوا للي كلف نفسه وقرا الموضوع

مش معنى ان 28 واحد شافوا الموضوع انهم عندهم معلومة و بيبخلوا عليك...

كدة احسن ولا اما تلاقى الموضوع فيه 28 مفتى و كل واحد براى و كلهم مش صح؟؟ (مع كامل احترامى لكل من شاهد الموضوع و لم يدلى براى)

MMamdouh