تجربتي مع النوبيرا..ارجو المساعدة من الخبراء

[zoma_zin]

يا جماعة انا معايا نوبيرا 2 خليجي اتوماتيك موديل 2003 برميوم لسه خايبها من شهرين .. السيارة ماشية 160 الف كيلو.. فتيس اتوماتيك اليكتروني .. المهم العربية اول لما جبتها كانت رهيبة سحب و كيك داون و زرار باور في الفتيس بيخليها بي ام بجد مش مبالغة .. و تكييف تلااجة .. بس الحلو مبيكملش
المشكلة بدأت معايا بزيادة استهلاك بنزين رهيبة يعني الصفيحة تمشيني 100 كيلو و كمان تقطيع علي السرعات البطيئة(cruising speed) من 40 الي 60 و نزول حاد في عداد الrpm و احيانا تبطيل (stalling)..العربية مظبط بتتخنق كده علي اول التاني و لازم ازودلها بنزين و الا عداد الrpm يوطي و يrecover تاني لوحدة و سعات ممبيلحقش تقوم العربية تبطل..و لو اديت بنزين بسيط الاقيها بتاخد و تدي كده زي ميكون حد بشدها و يسبها ..و طبعا لما ادوس بنزين جامد مفيش سحب خالص لحد ما تعدي ال60 الاقيها بتطير .. ملحوظة العربية و هي بارده بدور من اول مرة .. و لكن لما بتسخن السخونية الطبيعية و ابطل بدور من تلات او رابع مرة مش عارف ليه مع انو المفروض العكس
انا دكتور و يعني معلوماتي خفيفة في الميكانيكا.. روحت خادتها علي ميكانيكي ..
قالي غير الاتي :
بوجيهات و فلتر هواء و فلتر زيت و سلوك بوجيهات و جوان غطا تاكيهات عشان كان في تسريب زيتو فلتر بنزين و بعدين نشوف
غيرتهم و لقيت العربية زي ما هيا .. قالي يبقي علي طول حساس tps و طبعا بوابتي كهرباء مبتتنضفش قالي هات واحدة استيراد
روحت جبت بوابة ب 400 جنيه لاقيتها اوحش من الاول روحت بدلتها لاقيت برضو مفيش تحسن
المهم رجعتها و ركبت القديمة و روحت عاملت سكان عند واحد لقيت مفيش حاجة
روحت لواحد بيفهم شوبة و عملت سكان قالي بص حساس ال الماس اير ضعيف ..غيره روحت مغيره لقيت برضو مفيش تحسن
روحت لواحد تالت قالي بص زمن فتح الرشاشات 3.2 ملي ثانية.. طويييييييييل جدا ... غير حساس شكمان.. غيرته بواحد استيراد ..مفيش تحسن برضو ..قالي بص راجع علي خراطيم الفاكيوم.. راجعت برضو لاقيتها تمام..
سيبته روحت لواحد خامس..قالي من غير ما يكشف : الرشاشات ..النوبيرا كلها كده.. روحت جبت رشاشات اوبترا .. برضو مفيش تحسن..شوية لقيت البطارية ماتت ..روحت لكهربائي قالي هات بطارية ..مع ان البطارية جديدة
المهم جبتلها بطارية و قرفت منها روحت راميها في الجراج و باخد تاكسيات حاليا بعد ما ياست من معرفة السبب
قرات موضوعات كتير للاعضاء عن عيوب مشابهة ..لكن محدش بيكمل الموضوع لاخرة و يقول ايه الحل ..المهم بعد القراءة في المنتدي و المنتديات الاجنبية مفبش غير حاجة من ثلاثة :يا اما الموبينة يا حساس الكامة او الكرنك او طرمبة بنزين
و في برضو واحد عبقري قالي ممكن يكون سلوك الارضي هي الي بتعمل المشكلة دي كلها و تهرب كهرباء
فياريت حد من الاعضاء كات عندو مشكلة مشابهة يقولي العيب فين لاني خلاص رميت طوبتها و راميها زي الكلبة في الجراش

و شكرا مقدما

[ahmed.zahra]

طرمبة البنزين دي معروفة في النوبيرا ان اعطالها كتير. موضوع تأخير التدوير لما العربية تسخن ده حساس كرنك خلفي على طول.

[Sameh samy]

كل الاعراض اللي بتقول عليها اعراض رشاش بيسيل بنزين والرشاشات ميتلعبش فيها ورشاشت النوبيراة موش حلوة غير طقم رشاشات النترا او فيرنا لان عيب الدوارة اللي بتقول علية والعربية سخنة دة عيب رشاش وبرضو الخنقة علي التسارع عيب رشاش غيرهم بطقم استيراد هايعمل 200 جنية وطمنا يا باشا

[Sameh samy]

علي فكرة الرشاشات موش بتبان علي الجهاز
وكل اللي عندك دة كان عندي ولما غيرت الرشاشات راح

[zoma_zin]

يا جماعة اتا بالفعل غيرت الرشاشات..جبت رشاشات اوبترا سن رفيع ..و العربية زيي ما هي .. روحت برضو لبتاع شكمانات ..قالي علبة البيئة مسدودة ..غيرتها لقيتها برضو زي ماهي انا خلاص مش عارف اعمل ايه و الله..طرمبة البنزين لو بايظة العربية مش هتاكل بنزين ..انا عندي العربية سفاحة بنزين يعني البنزين واصل للرشاشات بزيادة اوي

[asas630]

حضرتك ديه احتمال كبير طرمبة بنزين وطول بالك علي النوبيرا شوية ديه عربية جميلة

[zoma_zin]

معلش سؤال هي الطرمبة لما تكون ضعيفة تدي بنزين زيادة ولا قليل

[Mohamed ELOoL]

حاجة من اتنين : طرمبة بنزين _ رشاشات

[ahmedsehimy]

انا كان عندي مشكلة شبيهة بمشكلتك و جربت كل حاجة من اول الموبينة و الرشاشات و طرمبة و بوجيهات و كشفت كمبيوتر مفيش امل
ولكن بعد مجهود طويل اكتشفنا ان في ترس من اللي الكاتينة بتلف عليه فيه بوش وهوة ده اللي كان عامل المشكلة دي و مضيع سحب العربية و بنزين بالهبل...اسمه ترس الكرنك
هوة ترس صغير ...انصحك راجع على تقسيمة سير الكاتينة و ان شاء الله خير

[fetoo_2007]

وديها لتوكيل ابو غالي اللي في حلمية الزيتون .. وخليه يعملك total check و شوف حيكتبلك ايه
انا عملت كده و بطلع بره اصلح اللي فيه المشكلة ... هو تمن ال check كان 240 جنيه تقريبا و سيبتها يوم