تجربتى مع رولمان بللى العجل

[HishamShafai]

الإخوة الكرام, أنقل إليكم هذه التجربة و محتاجين رأى الخبراء لتعم الفائدة, سيارتى لانوس 2006 و كنت جايبها زيرو و لم أغير بللى العجل من قبل كما إننى مازلت أتعامل مع التوكيل فى بعض الأشياء و أقوم بزيارات دورية لتغيير الزيت و عمل بعض الصيانات, منذ أسبوعين بدأت أسمع صوت للعربية بعد سرعة 100 كم فتوقعت أن يكون السبب من البللى و قلت أجرب الحرفيين و لم يكن هدفى ميكانيكى معين فتوقفت أمام ميكانيكى "الباشا" و قابلت الفنى و إسمه "كمال" و وصفت له المشكلة و ركبنا العربية نجرب و وصلنا المحل قال العيب بلية خلفية يمين و لكن يفضل تغيير كل البللى , ففهمت إنه بدأ يشتغلنى و لكننى وافقت عل أساس إن البللى لم يتغير من قبل و يفضل تغييره كله حتى أحس بالفرق, المهم بعتنى أشترى كل البللى أمامى و خلفى و لم أجد gm أصلى فاشتريت بليتين أمامى كورى (سعر الواحدة 110ج) و بليتين خلفى ألمانى (سعر الواحدة 60ج) و بدأ يشتغل , البللى الأمامى تم كبسه عند الخراط (30ج للجوز) أما البللى الخلفى فقام هو بتركيبه عن طريق الدق عليه بإستخدام حلقة معدنية , المهم خلص و جربنا و حسابك كام قال 300ج و من هنا لهنا دفعت 250ج , روحت البيت ماشى كويس , بالليل نزلت و الأسرة مشوار و أسمع صوت تصفيير و تزييق جاى من الخلف بس العربية كانت ماشية الكلام ده كان يوم السبت الماضى و الورش مغلقة الأحد , يوم الإثنين عديت عليه فك العجلة لقينا البلية و قد دمرت فتافيت , قاللى البلية مضروبة قلت له إزاى يعنى على الأقل لو مضروبة ممكن تبوظ بعد شهر أو إثنين , المهم قولت له إيه الحل قاللى الأكس كمان إحترق و لازم تجيب صرة كاملة إستيراد رحت لفيت حتى إشتريت واحدة ب 250ج (أثناء اللف عديت على إللى إشتريت منه البللى و حكيت له قاللى الميكانيكى هو إللى ركبها غلط علشان كدة إنكسرت) , المهم ركبنا الصرة و مشيت و على المساء سمعت صوت أعلى من الصوت الأولانى و بيظهر على سرعة 50كم و ظنيت إنها خشونة من الصرة الجديدة و صبرت على ذلك يوم تجربة و لاحظت أن الصوت بيزيد فعديت على الميكانيكى صباح اليوم الخميس و جربنا قاللى ده بللى الناحية التانية خلفى و نصحنى بعدم شراء بللى لأنة حينكسر برضة و قاللى هات صرة تانية نركبها رحت إشتريت أخت الصرة الأولى ب 250 برضه و هو لم يتنازل عن مصنعية 100ج أخرى بالإضافة لل250ج الأولانيين, يعنى كدة أنا صرفت فى الليلة دى حوالى 1300ج , الحمد لله العربية كويسة و لكن أريد تعليقاتكم القيمة على هذة القصة و هل فعلا البللى مضروب أم الميكانيكى مش عارف يركبه و رأيكم فى المصنعية و أسعار المشتريات و الموضوع ده كان يتكلف كام فى التوكيل. شكرا لحسن متابعتكم و فى إنتظار التعليقات.

[moamen84]

حسبنا الله ونعم الوكيل
متزعلش نفسك محدش بيتعلم ببلاش
الميكانيكي ده حرامي رسمي ومعندوش ريحه الضمير
بص يا كبير عمر البلي مايفرط بعد يومين حتي لو جايبه من تحت السلم
البلي متركب غلط (ملووووح) بمعني ان الحلقه الدائريه للبليه مش مشحوطه صح وده بيؤدي الي تركيز الحمل في نقطه واحده وبالتالي حراره عاليه ثم كسر قفص البلي الداخلي
المفروض اصلا البلي ده بيتسخن عليه قبل ما يركب عشان خلوصه عالي
بمعني ان الشحط بتاع البليه مع العمود عالي جدا ومفيش بينهم اي خلوص عشان كده البليه لازم تتسخن عشان متركبش علي حمل او بمعني اخر عشان الخلوص الداخلي للبليه ميتعصرش من الدق وبالتالي تلف البليه قبل ما تشتغل.
و ٣٠٠ جنيه ده رقم عالي بالنسبه للشغلانه دي انا عملتهم ب ١٥٠ جنيه
الخلاصه ده راجل حرامي ومعندوش ريحه الضمير
وياريت متروحش لحد تاني غير لما تكون عارفه او سالت عليه
وربنا يعوض عليك

[Mecha]

صرة اللانوس الخلفيه المفروض علي بليتين مخروطي
مش بتحتاج تسخين , هو تنطر الظرف القديم وتشحط الجديد دق
وتشحم البلي كويس جدا وتملا الصره شحم وتشحط السيل
المهم في التركيب ترجلش تحميل البلي ,تربط جامد هيتحرق ,تحل هيلعب
اعتقد فيه خطا في الرجلاش