عندى مشكله فى الفتيس ياريت تساعدونى

[احمد الصباغ]

بسم الله الرحمن الرحيم

الاخوه الكرام
عندى لانوس 2005 وفيه مشكله فى الفتيس وهى كألاتى
العربيه وهيا دايره وواقفه الغيارات كلها بتعشق كويس
لما ابدأ امشى الغيارات تمام معايا من الاول لحد الخامس
لكن المشكله لما اجى انزل من الرابع الى التالت ميرضاش يعشق نهائى الا لما انزل السرعة كتير ويعشق بالعافيه وبقوه
ونفس الكلام مع التانى ولو وقفت الغيرات كلها تشتغل تمام تانى وانا واقف
الميكانيكى بيقولى نغير فتيس بس انا لسه مغيره من ستة اشهر فقط
ياريت تنصحونى ياجماعة علشان الموضوع ده مزهقنى وخصوصا انى مش عارف الحل ايه
وشكرا للجميع
سلام

[ahmedelza3]

بص انا من رأي مضايقش نفسك وروح عند واحد متخصص فتيس وهوا ممكن يحلها ان شاء الله
وماتسمعش للميكانيكية خالص دول بيريحوا نفسيهم او بيبرروا عدم معرفتهم بالعيب ويقولك هات فتيس جديد

[احمد الصباغ]

انا برده كنت شوفت واحد كاتب مره ان فتيس الانوس لما بيتصلح بيغيب حوالى 4 اشهر وبيرجع العيب اللى فيه تانى

[hardmind_doc]

الدبرياج اخباره ايه ؟ لو سلك او زيت ممكن العيب يبقى منه

[احمد الصباغ]

لا كله تمام حتى النهارده زودت الفتيس زيت علشان لو العيب منه اما الدبرياج سليم وكله تمام

[Abo_Mazen]

يعني بإختصار المشكلة عندك في تسقيط الغيارات ..

[pepo2011]

مشكلتك في الفتيس من الداخل الحدافة لازم ميكانيكي بيفهم او بتاع فتيسات متخصص

[احمد الصباغ]

جاري البحث
بس هيا المشكله تتعدل بالتصليح ولا اشترى غيره استعمال
وشكرا للجميع

[gadoo30]

انا مرة عمرت فتيس دوجان وقعد معايا 3 سنين وبعت العربية وهوة شغال زى الفل
عمرتة عند واحد في شبرا اسمة صليب سمعت عنة انة ملك الفتيسات

[احمد الصباغ]

مشكلتك في الفتيس من الداخل الحدافة لازم ميكانيكي بيفهم او بتاع فتيسات متخصص

ممكن توضحلى ايه هيا الحدافه دى ومهمتها ايه

[pepo2011]

ممكن توضحلى ايه هيا الحدافه دى ومهمتها ايه

الجزء المسؤول عن نقل الغيارات من ترس لترس اي من غيار لغيار
بعد حركة العصايا للعقربة
اتاكد الاول ان المشكلة في الفتيس نفسة وبعدين فكة وودية لصليب في شبرا وهاتركبة فعلا هاتلاقي كبير

[احمد الصباغ]

الف شكر وفيه واحد دلنى على واحد جنبى لانى من دسوق كفرالشيخ مش من القاهره وان شاء الله رايح بكره
بس هو فيه سؤال هو ايه الفرق بين الحدافه وبين الغويشة لان كله بيقولى دى غويشة
وشكرا على المجهود
سلام

[احمد الصباغ]

اخر الاخبار
روحت عند الميكانيكى امس وقالى هافكه واظبطه لكن والعربيه عنده اكتشف عيب فى الاسطوانه ولما فتح وجد الاسطوانه ناحية منها سايحة ولزقه فى الديسك وقالى هات اسطوانه وديسك تانيين واحنا نركبهم الاول ونجرب وبالفعل ركبنا وجربنا كل حاجه تمام والمشكله كانت من الاسطوانه والديسك وانتهت المشكله بس هيا الصراحة كان فيه حاجه هو قالى عليها الاول عصاية الفتيس مش مريحة وهو ريحها ومحدش يقولى عمل ايه علشان مش عارف
ثانيا قالى على الوصله بتاعت عصاية الفتيس فى الفتيس عايزه حشو وتقريبا هو عمله وقالى تعالى بعد يومين علشان اريحهملك اكتر
والحمد لله انتهت المشكله
وشكرا للجميع
سلام