قصتي مع دبرياج الدايو

[جولييت]

السلام عليكم ورحمة الله وبركاته
اعضاء المنتدى الكرام عضوة جديدة محتاجة للمساعدة معلش هطول عليكم شوية انا معايا دايو جولييت موديل97
عام 2009 الدبرياج سقط مني وبالكشف على زيت الباكم لاقيته ناقص روحت للميكانيكي زود الزيت وخلاص ولما سرب تاني ورجعتله غير جلد الماستر ولما حصلت المشكلة للمرة التالتة راح مغير المسترين السفلي والعلوي والعملية مشيت تمام
عام 2012 لاقيت الدبرياج لما بدوس عليه كاني بدوس على طوبة تقيييييييل والعربية في المطلع بتعاني وسحبها ضعيف روحت لميكانيكي تاني راح مغير طقم الدبرياج والعربية بعدها مشيت تمام
عام 2013 كنت ماشية في طريق زحمة لاقيت الدبرياج فصل اطلعه بايدي وادوس عليه ينزل تاني ولما العربية هديت شوية راح اشتغل عادي روحت لميكانيكي قالي مفهاش حاجه روحت لواحد تاني غير الجلد ومشيت كويس بعدها بشهرين حصل نفس العيب رجعتله تاني راح مغير المستر السفلي وبعدها مشيت كويس
عام 2015 دلوقتي بقى برضه حصل نفس العيب الاخير وروحت لميكانيكي قالي المسترين عايزين يتغيروا روحت يوميها لواحد تاني جرب الدبرياج وقالي الديسك عايز يتغير لقاني تنحت وقولته انا مغيرها من 3سنين مع العلم اني مش بمشي بالعربية كتير راح الراجل نزل معرفش عمل ايه وقالي جربيها لاقيتها مش وحشة وقالي لو حصلت معاكي تاني هنفتح ونشوف هنغير الماسترين والديسك غالبا
طبعا انا خلاص مش فاهمه ايه الوضع بالضبط ولفيت علي ميكانيكية كتييير ياريت من اهل الخيرة يفيدوني في الموضوع ده
ومعلش سؤال تاني في السريع هو زيت الفيتيس بتغير كله ولا بيتزود انا عملته قبل كده بس نسيت

[kaza]

للاسف المشكلة في مساتر الدبيراج الباكم عامة مش عندك بس وبرضة بسبب قطع الغيار المضروبة ونوعية زيت الباكم السيئة
طيب هنتعايش ازاي مع المشكلة دي باني باغير مساتر الدبرياج مع بعض الاثنين وباحاول اجيب قطع الغيار من مكان مضمون زي التوكيل او وكيل بيع معتمد منه واجيب زيت غالي شوية واغير الزيت كل سنة علشان الباكم شرة جدا لامتصاص الرطوبة من الجو ولما بتتواجد فية بنسب كبيرة بيصداء المساتر من الداخل ويجرح سطوح الجلد ويتلف الماستر ونخش في دورة الاصلاح
برضه عامل تاني استخدام الدبرياج بكثرة وبالاخص داخل المدن بيقلل عمره كتير عن الطرق السريعة وافضل شيئ الهدوء في القيادة والتسارع وعدم النقل بدون داعي زي الشد والجري ونفرمل وندي نقلات ورا بعض ......يعني ممكن انقل من الاول للتالت دون التاني ومن التاني للرابع دون التالت بس بسواقة هادية

[جولييت]

شكرا اخي على مرورك الكريم
لكن هل هذه الاعراض تستدعي تغيير الديسك ولا الميكانيكي بيشتغلني

[eng_amg]

شكرا اخي على مرورك الكريم
لكن هل هذه الاعراض تستدعي تغيير الديسك ولا الميكانيكي بيشتغلني

أعتقد محتاج تغيير طالما الدواسة بتسقط لتحت. ولو عزم العربية ضعيف او صوتها عالي او بتشمي شياط عند المطالع الحادة يبقى غيري الاسطوانة كمان.
حاولي تجيبي قطع غيار اصلية فيما يتعلق بالميكانيكا والات الاجر. باقى القطع مش لازم تكون اصلية.
عمر طاقم الدبرياج اكبر من كدا بكتير الا لو عيب استخدام.