مشكله في دايو ليجانزا 2002

[do0om]

السلام عليكم ورحمه الله وبركاته اتمني تكونوا في اتم صحه وعافيه
عندي مشكله معايا دايو ليجانزا 2002 لما اشتريتها كنت بسيبها لحد ما توصل الشرطه الحمرا وبعديها افول التانك بعد حوالي 6 شهور بدات المشكلات تظهر
العربيه بتسخن لما اوصل 150 ومشيت بيها قبل كده 210 ومكانتش بتعلي بالشكل ده
العربيه مخنوقه وعزمها وحش جدا مش زي اول ما اشتريتها خصوصا في اول ما ابدأ اتحرك بيها وكمان بتنتش بتاع دقيقه كده وتسلك بعدها
ريحه مش كويسه بتخرج من الشكمان لما بتدور واسيبها واقفه شويه
(الار بي ام RBM) يعلي وينزل لوحده ولما اقفل المكيف يعلها لحد 2 وينزل بالتدريج ببطئ
استهلاك البنزين بقي عالي مثلا كنت بمشي بالتانك حوالي 600 او 650 دلوقتي حوالي 500
بقي في برجله في الماكينه وكمان صوت العربيه بقي عالي شويه

اللي غيرته في السياره
غيرت البطاريه
الكويل بتاع الكهرباء اللي بيدي كهرباء للبوجيهات غيرته
حساس الهوا اللي راكب علي البوابه غيرته
اسلاك بوجيهات وبوجيهات غيرتهم مرتين

طبعا حصل فرق بتغيير الحاجات دي بس العربيه مش زي ما كانت الاول كانت الاستجابه للدوسه حلوه وسريعه ولازم الصبح لما اشغل العربيه استني تسخن ولازم لازم ادوس بنزين لحد ما (ار بي ام )يوصل 4 او 5 ساعتها العربيه بتستجيب للدوسه يعني صوت الماكينه نفس ضغط رجلي علي الدواسه ولما بتتطلع حتي لو علي الاول بتبقي مخنوقه شويه وبعدها بتسلك وتبقي حلاوه من غير قشطه دلوقتي سالت ميكانيكيه كتير طبعا هنا مفيش عندهم غير اشتري كذا ويجرب فيا مفيش خبره في العربيات الدايو هنا خالص المهم اخر ميكانيكي قال لي غير البخاخات قولت تمام بس مش لاقيهم هنا ولقيت استاذ ممدوح بيقول الافضل اني اغير البخاخات ببخاخات بي ام دبليو m40 بس هنا بيتعاملوا بالموديل وانا مش عارف موديل السياره البي ام اللي المفروض اشتري البخاخات بتاعتها ومش عارف هل هم فعلا المسئولين عن البرجله دي ولا في حاجه تانيه فارجوا المساعده




تم تعديل العنوان
م.ع 7

[Mohamed Desoky]

حضرتك غيرت فلتر بنزين وفلتر هواء اونظفته ونظف حساس البوابه ولو العيب فى الرشاشات ممكن تتصلح او تشترى الاصلى بلاش بتاع البى ام ده خليك فى حجتها لانه اكيد اغلى من الكورى حاول تنظف انتى بنفسك لان معظم الصنيعيه حرميه والتوكيلات حرميه واغلب الشعب المصرى حرميه

[mora_f]

غير فلتر بنزين وهواء و نظف البوابة وحط سائل تنظيف دورة البنزين stp الرصاصي على نصف تانك و اطلع جرب واحرق على الغيارات و بعدها غير بوجيهات ان شاء الله هترجع العربية لطبيعتها و ماتنساش تغير زيت و فلتر

[دعبدالرحيم]

طالما الاستهلاك حلو متغيرش رشاشات يعني 250 كم في الصفيحه دا كويس ..ذي ما قال الاخوه حط منظف دورة بنزين ومتخليش التنك ينزل عن التلت مثلا .

[do0om]

حضرتك غيرت فلتر بنزين وفلتر هواء اونظفته ونظف حساس البوابه ولو العيب فى الرشاشات ممكن تتصلح او تشترى الاصلى بلاش بتاع البى ام ده خليك فى حجتها لانه اكيد اغلى من الكورى حاول تنظف انتى بنفسك لان معظم الصنيعيه حرميه والتوكيلات حرميه واغلب الشعب المصرى حرميه

اشكر حضرتك علي الرد انا غيرت الفلتر قبل كده بس هغيره تاني مفيش مانع وفلتر الهوا كمان كنت غيرته بس اغيره تاني اهو كله فايده للعربيه وبالنسبه لحساس الهوا هنظفه تاني مفيش مشكله ده سهل جدا اما بالنسبه للرشاشات انا حاولت انظفها بنفسي وفعلا عملتها بعد ما شوفت اكتر من فيدويو علي النت وعرفت فكرت التنظيف وعملتها بالامكانيات المتاحه عندي لقيت واحد منهم متغير عن ال3 التانين ضعيف جدا عنهم فقولت يمكن يكون هو السبب بس لما بفصل الفيشه عنه والعربيه شغاله بيحصل فرق في الصوت وتيجي رجه في الماكينه فمش عارف وبعدين الرشاشات اللي عندي النوع التخين وشوفت موضوع عنهم انه بيضربوا بسرعه المفروض يتغيروا يا اما البي ام دبليو او النترا 2004 علي ما اعتقد وبالنسبه للاصلي مش لاقيهم هنا خالص العربيات دي انقرضت بالنسبه لهم هنا دا انا لما غيرت الشكمان ملقيتش الغويشه اللي بتبقي بين القطع الشكمان وبعضها حطيت القديمه وحطيت عليها سيلكون وده اللي قدرت اعمله علشان اخلص من الصوت العالي بتاع الشكمان

[do0om]

غير فلتر بنزين وهواء و نظف البوابة وحط سائل تنظيف دورة البنزين stp الرصاصي على نصف تانك و اطلع جرب واحرق على الغيارات و بعدها غير بوجيهات ان شاء الله هترجع العربية لطبيعتها و ماتنساش تغير زيت و فلتر

متشكر جدا علي الاهتمام والرد انا عملت كل اللي حضرتك بتقول عليه قبل كده بس هعمله النهارده تاني لاني لقيت ان الكل بياكد علي تغيير الفلاتر دي وبالنسبه لموضوع السائل التنظيف انا بقالي اكتر من اسبوع بحطه مع نص تانك علبه مكتوب عليها صنع في الولايات المتحده الامريكيه هي علبه لونها اسود هحاول اجيب اسمها لما اجي احطها تاني وان شاء الله النهارده فرصه حلوه لاني اعمل ده لاني مسافر لحائل ودي مسافه حوالي 800 كيلو بينها وبين الرياض فدي فرصه حلوه لاني برضه لسه مغير زيت وفلتر زيت ومغير زيت فتيس كمان من يومين

[do0om]

طالما الاستهلاك حلو متغيرش رشاشات يعني 250 كم في الصفيحه دا كويس ..ذي ما قال الاخوه حط منظف دورة بنزين ومتخليش التنك ينزل عن التلت مثلا .

اشكر حضرتك علي الرد بس احب اوضح صوره انا التانك بتاع العربيه عندي بياخد 56 لتر بنزين او 60 اعتقد ان دي سعته الحقيقيه فكده الصفيحه اللي اعتقد انها تساوي 20 ليتر يعني كده بتمشي اقل من 165 كيلو هي (الاول) كانت بتمشي 650 كيلو دلوقتي 500 كيلو بالعافيه وفعلا هعمل الحاجات اللي حضرتك والاخوه الكرام قالوا عنها وارد لكم خبر ان شاء الله اول ما ارجع بالسلامه

[دعبدالرحيم]

بصراحة الاستهلاك كدا كتير خالص.. قبل ما تغير رشاشات ( بتوع الهيونداي حلوين )..اكشف علي الشكمان وعلبة البيئه والغي بلف الegr وواكشف ع حساس الماب

[do0om]

بصراحة الاستهلاك كدا كتير خالص.. قبل ما تغير رشاشات ( بتوع الهيونداي حلوين )..اكشف علي الشكمان وعلبة البيئه والغي بلف الegr وواكشف ع حساس الماب

السلام عليكم
اسأل الله العلي القدير ان يجعل مساعداتكم لي في ميزان حسناتكم
انا غيرت علبه البيئه (العلبه الكبيره اللي في الاخر دي اللي اقصدها لو كنت غلط قولولي
اي بقي علبه الشكمان دي عمتا انا غيرت الجزء اللي في النص بتاع الشكمان والعلبه اللي في الاخر فاضل الفرن والوصله اللي فيها حساس الشكمان بس اللي مغيرتهاش
مش عارف بلف (egr) ده لو توضح لي اكتر اكون شاكر لحضرتك جدا
حساس الماب ده كنت شاكك فيه بس قولت استني اما اتاكد لانه هنا ب 150 ريال
لو في طريقه اكشف بيها عنه اوك انا لما بفصله اللمبه التشييك بتنور في التابلوه

[do0om]

الحمد لله يوم الخميس انا عملت اللي حضراتكم قولتولي عليه بس مش بالظبط لانه المبلغ كان عالي شويه لان (فلتر الهوا 50 ريال + فلتر البنزين 50 ريال + بواجي 60 ريال) فانا قولت اجرب الاول تجربه كده ونشوف عمتا انا خرجت فلتر البنزين ونظفته كويس والبنزين اللي خرج منه مكنش وحش للدرجه اللي كنت متصور اني الاقيها
وكمان البوجيهات طلعتها ونظفتها تنظيفه حلوه لانهم الماني و انا جبت الواحد منهم اتنين شراره
نظف فلتر الهوا وطبعا كنت مغير زيت وزيت جير من حوالي 3 او 4 ايام المهم توكلت علي الله وحطيت علبتين منظف بخاخات في التانك ومشيت بالعربيه حوالي 700 كيلو متواصل بس سرعتي مزادتش عن 120 علشان الساهر مخالفاته عاليه الغريب ان التفويله كملت معايا المسافه دي وده مش طبيعي بس بقول يمكن علشان اتجاه الريح كانت في نفس اتجاهي ويمكن علشان ماشي تحت ال 120 مش متاكد حضراتكم تعرفوا عني
بس السياره بقت بتمسك حراره اول ما اوصل 120 تبدا تعلي معايا الحراره وده كان بيحصل من قريب بس لما كنت بعدي 150
العربيه بقت احيانا تبقي طبيعيه واحيانا ترجع تبرجل تاني وتقعد تعلي وتنزل صوت الماكينه و الريحه بقت ضعيفه
وطبعا لما جيت راجع حطيت تاني علبه في نص تانك بس معرفتش امشي غير 80 لان المطر كان سيول في حائل والقصيم المهم برضه لما وصل المؤشر تحت الربع بشويه كنت وصلت القصيم دخلت البنزينه وفولت وكملت طريقي راجع للرياض بس برضه الحراره اول ما اوصل 120 توصل النص ولما ازود هي تعلي شكلي هروح اجيب ترموستات النهارده لاني لقيت الماسوره اللي جايه من الردياتر للماكينه كانت منفوخه ومحجره يا تري صح ولا غلط

[do0om]

السلام عليكم ورحمه الله وبركاته
اتمني تكونوا في اتم الصحه والعافيه اخواني الكرام ولكل اعضاء المنتدي الجميل
انا منتظر رد من حضراتكم اغير الترموستات بتاعه الحراره ولا في حاجه تانيه السبب