متى يمكنك البدء في سمكرة ورش العربية

[amrzedan]

عايزاعرف امتي الواحد يبتدي يعمل سمكرة ودوكو للعربيه يعني انا مثلا كل يوم والتاني يحصل حاجة للعربية واقول خليها دلوقت ومعملهاش حاجة واسيبها واقول خليها دلوقت لحد لاقدر الله لو حصل حاجة اكبر ابقي اعملها معاها واخرها مثلا النهاردة الصبح اتخبطت بالراحه في عربية نص نقل لكن الخبطة جرحتلي الاكصدام من ادام وجرحتلي الشبكة الفضى اللي في غطا الكبوت وعملت ( نقرة ) صغير في صاج الكبوت تحت الشبكة علي طول ونزلت وقعدت احاول بالبوليش اصلاح اللي اقدر عليه بس انا زعلان ومش عارف اعمل ايه لان كل يوم والتاني يحصل حاجة للعربية منها اللي ابقي غلطان فيه ومنها اللي ابقي مش غلطان فيه واضطر اسيب واسيب واسيب لحد مانا حاسس ان العربية هايبقي شكلها مشوه مع العلم ان انا لو وريتكوا صورة العربية تحسوا انها مافيهاش غلطة لكن انا لما باشوفها وعارف الخبطات والتجريحات فين بابقي متضايق
ونسيت اقولكم كمان ان العربية الاسبوع اللي فات روحت الجراج لقيت فيه كلاب مبهدله لي السقف من طلوعها عليه وبقي فيه تمويجات مش باينه أوي بس انا عارفها وشايفها
معلهش طولت عليكم بس فعلا انا متضايق ومتنرفز ومش عارف اعمل ايه وخصوصا ان العربيه بتاعتي موديل 2002 وبالبويه الفابريكة بتاعتها

[Dr_Mido]

علشان جديدة هتاخد بالك من اى خبطه صغيرة شويه ومش هتاخد فى بالك
متقلقش

[Samir Elshahawy]

أستاذ / عمرو

صباح الخير .....

كل اللي قولته ده عادي جدا في بلدنا و طبيعي أنك تلاقي 90% من العربيات اللي ماشية مجرحة و منقرة و مخبطة شوف العربيات التانية و قارنها بعربيتك و أنت تحس بالفرق

عارف أن الكلام اللي بقوله ده يمكن مايجيش علي هواك لأن أنا نفسي مابحبش أي حاجة صغيرة في عربيتي تشوه منظرها و لكن لو هاترش العربية و توديها لسمكري علشان الحاجات دي يبقي من الافضل تعمل عنده أشتراك شهري و تبقي عملية الرش و السمكرة من أساسيات الصيانة الدورية زيها زي تغيير الزيت و الفلاتر لان ده للأسف واقع السيارات المرير في مصر

خليها و لو لاقدر الله فيه خبطة جامدة أبقي صلحها و روشها كلها مرة واحدة زي ما أنا عملت

و ربنا يبعد عنك كل شر و أذي أصحاب الفن المسماري

[MMamdouh]

welcome to Egypt

سيبها لحد ما تزهق بجد من شكل العربية لان لو حتصلح كل خبطة فى العربية يبقى تبيعها للسمكرى و بتاع الدوكو اسهل

MMamdouh

[amrzedan]

المشكله ان انا بازعل اوي من الحاجات اللي بتيجي في الكبوت والشنطة والسقف علشان انا عارف ان دول بيفرقوا اوي في حالة العربية وثمنها لو قررت تبيعها بس في نفس الوقت ماينفعش انك لما تيجي تظبط العربية تسيبهم لانك هايبقي كانك غسلت كمام القميص وسيبت الباقي من غير غسيل فكانك معملتش حاجة يعني انا النهاردة مازعلتش اوي علي الاكصدام لان انا عارف ان امره سهل شويه لمن زعلت علي النقرة اللي حصلت في غطا الكبوت من تحت الشبكة علي طول وزعلت علي الشبكة برضة علشان اتجرحت لكن هانعمل ايه دنياااااااااااااا
والحمد لله علي كل حال
وقضا اخف من قضا
واللي يشوف بلوت غيره تهون عليه بلوته
وسلمولي علي بلدنا الحبيبه

[waleedrahmy]

لكن انا لما باشوفها وعارف الخبطات والتجريحات فين بابقي متضايق

أخيرا لقيت واحد قريني بالضبط

[MMamdouh]

كلنا هذا الرجل

MMamdouh

[samirayad]

أنا طبعا مع الرأى القائل....مش علىكل صغيره الواحد يرش المكان اللى مش عاجبه الا لو كان التجريح غائر وجايب الصاج.....أما لو كان التجريح غير غائر ماتعملش حاجه فى العربيه.....غيراستخدام البولش والكمباوند.....لأن عملية الرش فى حد ذاتها لها مردود مش كويس فى حالة الرغبه فى بيع السياره

[knightmido]

اقول لحضرتك عن تجربة اول ما شتريت العربية كنت متحمس جدا زى حضرتك تمام لكل حاجة ومع اول تريحة من عربية شرطة على الرفرف ... على طول السمكرى والدوكو اشتغلو وبعد كدة الحمد لله .. الظاهر واحد عجبيته العربية !!! فراح مديها نجمة بمسمار .. اه والله نجمة ومن يوميها قولت اسيبها اى حد يحب يحط اضافة او يكتب ذكرى ... اهم شيء غسيلها فى الجراج والنظافة الداخلية وربنا يعديلك الفترة الاولنية الحرجة دى على خير وتتعود على شكل العربية

[NaderNabil]

الحمد لله جالي مناعة من الموضوع ده :)

العربية مليانة نقر في كل حتة...ال 4 رفارف و الأربع أبواب :)
ده غير ان لونها مبقاش اسود من كتر ما بهت و بقي مطفي :(

بس خلاص قلت مش طالباها أوديها تترش و ترجع تتخبط تاني...هي كده زي الفل...علي الأقل مش هامشي أحسس و أتفزع من خدشة 1 سم :)

[kaboo4]

انا شوفت الموضوع فقلت دة وقت النصيحة
اولا طبعا النضافة من الايمان بدون شك بس انا حقولك حاجة فى مصر العربيه من جوة بتعتك من برة بتاعت الشعب فنضف حجتك و سيب الشعب يحط بصمتة
اول حاجة نصيحة متنضفش عربيتك من برة كل يوم و دة عن تجربه لما تكون مش نضيفة من برة محدش حيقعد عليها لان البشوات الى بيقعدوا على العربيات بيستنضفوا
عايز اقولك انى اول ما جبت العربيه رحت غسلتها غسله حلوة اوى و بصراحة كانت عروسة مفيهاش خربوش المهم عملت مشوارى و رجعت بليل ركنتها ادام البيت صحيت الصبح لقيت ورقة جرنان على كبوت العربيه و العربيه متزينه ببواقى العيش و طمامط و خيار و جبنه يظهر كان فيه حد فكرها طربيزة و فطر عليها و كسل يشيل الحاجة فسبها يمكن اكون مفطرتش فانزل الاقى الفطار مع العلم انى ساكن فى الدقى و المفروض انها حتة رقيه و طبعا اختاروا عربيتى علشان نضيفة تخيل لو كان الكبوت مطرب كانوا شافوا عربيه تانيه تجريح الاكصدام فى مصر حاجة طبيعيه جدا انا كان فبريكة و عملت غلطة عمرى انى جرحتوا شويه الت اروح اروشوا النتيجة اسبوعين بظبط و شكله باظ اكتر ما كان اصلا و السبب طبعا المعجون الى قشر ووقع بالدهان و منظروا دلوقتى محتاج يتغير دة غير انى خبطوا بعد كدة :k30:حلفت من سعتها انى معملش حاجة حتى الفنوسين ادام محتجين يتغيروا جيبهم و حططتهم فى البيت لغايت ما الى فيها ما يقعوا خالص اهم حاجة الحتة الى انا قاعد فيها و خلاص و ربنا يسترها معانا

[mummy_47]

انا متفق مع كلام كل الاخوة ...وعن تحربه في عربيتي الحالية والسابقة..انا بسيب العربية لما بيبقى عليها كوم تراب والتراب يكون لازق وبعدين اروح اغسلها في البنزينة..وكمان اول ما جبتها كنت حاطط ايدي على قلبي وبقول امتى هتتخبط لاني عارف ان اي عربية جديدة لازم تأخذ خبطة كده ولا كده على الماشي عشان تأخذ العين .فطبعا بدل خبطة واحدة ، كانت خبطات متعددة..مره من قدام ومره ميكروباص يخبطك من ورا..ومره عجلة تحك في الكبوت او الشنطة او الرفارف وغير الناس اللي بيقعدو على الشنطة والكبوت ويطبقهوهم.ولو نجيت من كل ده فلن تنجو من الناس المتسولين اللي بيفتكروها مائدة الرحمن ويقعدوا ياكلو عليها كما قال الاخ السابق او الحيوانات تقضي عليها حاجتها..فمتشغلش بالك خالص والا هتتعب جدا وهتحتاج انك تاخذ العربية معاك اوضة النوم...لكن انا ملاحظ حاجة غريبة جدا..العربيات الغالية مثل المرسيدس والب ام مش بلاقي فيها خربوش واحد..نقريبا الناس بتخاف تقربلها.

[amrzedan]

تصدق فعلا انا لاحظت ان العربيات الغالية دي كلها قليل جدا جدا جدااااااااا انك تلاقي فيهم حاجة وانا برضه استغربت وقلت اشمعني بس قلت يمكن الناس دي عندها فيلا بيركنوا فيها أو جراجات مخصوصة
طب وهما ماشيين في الشارع محدش بيحب يمسي عليهم من الربيات والميكروباصات والموتوسيكلات ذينا ليه
حاجة فعلا غريبة
ياريت حد يعرفلنا الموضوع ده ويرد علينا وممكن احنا بعد كده نمشي نخبط قيهم ذي ما بيحصل فينا

[kaboo4]

مين قال ان العربيات الغاليه محدش بيقرب منها او مبتتبهدلش هو بس يمكن احنا مش بنشوف عربيه غليه مبهدله الا نادرا جدا و دة لسبب ان اغلب ان مكنش كل العربيات الغليه فى البلد دى متأمن عليها تأمين شامل انا واحد صحبى معاة بى ام 320 موديل 2008 اول ما جبها كان فرحان بيها و خايف عليها حطها فى جراج و غطاها صحى تانى يوم علشان يروح الشغل بيشيل الخطه لاقى ظهر العربيه مخبوط و الفوس الى ورة مكسور طبعا كان بيعيط بس حظة انه كان مأمن عليها و التوكيل قام بكل حاجة و ظبطهالوا عايزين تعرفوا العربيات الغليه بيحصل فيها ايه روحوا اى تأمين و اتفرجوا على العربيات او عربيات الحوادث الى التأمين عوض اصحبها

[maka]

لكن لو هاترش العربية و توديها لسمكري علشان الحاجات دي يبقي من الافضل تعمل عنده أشتراك شهري و تبقي عملية الرش و السمكرة من أساسيات الصيانة الدورية زيها زي تغيير الزيت و الفلاتر لان ده للأسف واقع السيارات المرير في مصر

انا اول ما جبت العربية الصغيرة كنت بعمل كده لحد ما زهقت من

السمكرى والسمكرى زهق منى.

وفى الاول كان دمى بتحرق اوى من كل خبطة وكنت

انزل اعمل فضيحة للى لمس العربية دلوقتى مبحطش فى بالى

علشان اعرف اعيش لحد ما بقت العربية من بره لوحة سيريالية

وربنا يستر طريقنا جميعا