معروض عليا نوبيرا بالمواصفات دى...

[kareem_Ashmawy]

السلام عليكم يا أهل المنتدى الكرام...

معلش يا جماعة استحملونى كل شوية أقول معروض عليا كذا ايه رأيكم...

بس هعمل ايه محتاسين على الأخر فى اختيار عربية..

المهم..

معروض عليا نوبيرا بالمواصفات الأتية..
1600سى سى
فول أوبشنز ( بس مش عارف سى دى و لا سى دى اكس)
رشة برة نضافة فقط
العداد 95000كيلو ( و دا اللى قالقنى)
صاحبها بيقول انها مواصفات خليجى و تقفيل بره
و اللى بيخلينى مصدق كلامه ان طارة الدريسيون فيها شوية زراير كده مش عارف بتاعت ايه
و انا مشفتش الحكاية دى فى اى نوبيرا قبل كده
و كمان غطاء تانك البنزين محطوط عليه البادج بتاع
دايو موتورز ايجيبت
هو كان طالب 55 الف و نزلنا معاه لغاية 53000
بس الكلام ده بعد ما نوديها التوكيل

فايه رأيكم بيأه يا جماعة
و هل هى كده قربت تفتح بؤها علما بأن الكاوتش الأصلى بتاعها و الفرش حالتهم جيدة جدا
و الموتور بعد بعد ما سديت الشكمان بايدى طلع فى ايدى مياة مش زيت
مما يدل على حسن استعمالها و الله أعلم طبعا


أفيدونى فى هذا الموضوع لو سمحتم..
و شكرا مقدما..

[Karim_Monir]

موديل كام يا كريم
وازاي تقفيل خليجي وغطاء التانك مكتوب دايو موتورز ايجبت

[kareem_Ashmawy]

شكرا يا أ.كريم على ردك

هى موديل 2001
و حكاية ازاى خليجى و التانك مكتوب عليه دايو موتورز ايجيبت
مش عارف ايه تفسيرها بس برده زراير التحكم اللى فى تارة الدريكسيون دى مش موجودة فى المصرى
مش عارف ألاقيلها تفسير الحقيقة
على فكرة هى نفس شكل المصرة دون اى اختلاف

[hazem_khidr]

حكاية ازاى خليجى و التانك مكتوب عليه دايو موتورز ايجيبت
مش عارف ايه تفسيرها بس برده زراير التحكم اللى فى تارة الدريكسيون دى مش موجودة فى المصرى
مش عارف ألاقيلها تفسير الحقيقة

انا اقولك تفسيرها.
العربيه دي اكيد عامله حادثه و مغير نص امامي كامل و دا تابلوه النص الللي هو اشتراه و اخد الطاره بتاع الدركسيون ام زراير كمان معاه و بدأ يقول دي تقفيل بره و خليجي و الكلام دا.
عاوز تتاكد من كلامي بص علي الزجاج الجانبي لو لقيت ماركه الاتنين اللي ورا مصري و الاتنين الامامي مش مصري يبقي كلامي كده صح ميه ميه.
لو لقيتهم كلهم بتوع بره يبقي ممكن يكون مغير الاربع ابواب علشان الاوبواب القديمه اتبدهدلت و شوف الزجاج الخلفي عامل ازاي..

[kareem_Ashmawy]

يا نهار أبيض...
طيب احنا لو ودناها التوكيل ممكن يكتشف اذا كان كلام حضرتك صح يا حازم
و لا أبعد عن العربية دى أساسا

[hazem_khidr]

بص التوكيل ممكن يعرف طبعا و غير كده وريها لسمكري شاطر و بعدين بص علي الحاجات اللي قولتلك عليها و يمكن يكون مغير الطاره بس ما عملش الفيلم دا كله بس طالما التانك مكتور عليه دايو ايجيبت يبقي في حاجه غلط طب ازاي؟؟
يا اما الغطا بتاعه باظ مثلا و جاب واحد من التوكيل؟؟برضه مش حيبقي مكتوب عليه الكلمه دي..
عموما بص في العربيه كويس اوي و علشان كمان سعرها متهيالي اعلي من كده..هيا موديل كام؟

[kareem_Ashmawy]

شكرا يا حازم معلش تعبك معايا...

هى مو 2001 و العداد عامل 95 ألف كيلو

[hazem_khidr]

طيب هيا نوبيرا 1 ولا نوبيرا 2؟؟؟؟
و طالما 2001 يبقي اكيد نوبيرا 1 و بكده تبقي متقفله بره و اللي مكتوب علي التانك ممكن يكون ملزوق في التوكيل و هو بيعمل صيانه مثلا

[kareem_Ashmawy]

هو لو قصدك الشكل...
هى نفس شكل النوبيرا الزيرو اللى بلاقيها قدام المعرض
أما لو مفيش فرق فى الشكل
فلو تقدر تقولى الفروقات بين ال 1-و -2
و انا اقولك هى كانت ايه

و شكرا لاهتمامك يا حازم باشا
:D


اه بالمناسبة
هو ايه افضل رقم للعداد اقدر أشترى عنده النوبيرا
لأن حكاية انها عاملة 95000كيلو دى مضايقانى...

[limo]

بس انا حصلى مشكله قبل كده فى عامود الدركسون فى عربيه لانوس وهى ان عامود الدركسون البلى بتاعه فرط
نزلت الحرفين علشان ادور على عامود فقط من غير الطاره ولا الكونتاكت ولا درعات الاشاره والانوار طبعا ملقتش العامود لواحده لازم اخذ معاه الطاره بالاشارات بكل حاجه
فكنت خلاص حطيط فى دماغى انى هاخذ العامود بالطاره بكل حاجه
وانا بدور لقيت طاره شكلها غريب مش زى الى عندى فى العربيه سألت الراجل عنها قالى انها بتاعت الانوس . قولته لا ده مش زى الى عندى فى العربيه؟ قالى لا ده بتاعك العربيات المسورده علشان بينزل فيها اير باجز
الخلاصه ان ممكن يكون الراجل حصل له مشكله فى الطاره او العامود استدعى انه يغير الطاره القديمه بالطاره المستورده الى هيه مزوده باير باجز
انت ممكن تروح التوكيل وهمه اكيد عارفين العربيات الخليجى من التجميع المصرى

[hazem_khidr]

بص يا ابو كريم النوبيرا 2 زي اللي موجوده زيرو حاليا لكن النوبيرا 1 تلاقي فوانيسها من الامام رفيعه كده زي فوانيس الكورولا 93 مثلا نفس الشكل و الفوانيس الخلفيه تلاقيها احمر في ابيض و ميكانيكيا مفيش اختلاف جامد بينهم و فلتر التكييف مثلا مختلف بس موجود لكن مشتركين في معظم الاجزاء الميكانيكيه.
بالنسبه ل 95 الف كيلو دا مش مقياس ممكن تكون عربيه عامله 30 الف كيلو و متهانه
انت ممكن تحس بالعربيه يعني مثلا تبص علي زراير الزجاج الكهربا تشوفها ممسوحه ولا لاء؟دراعات النور الكتابه عليها ولا لاء قعده الكراسي و الكنبه الخلفيه ناشفه زي الزيرو او قريبه منها ولا لاء؟ حاله طاره الدركسيو و التابلوه و فرش الكراسي الحاجات دي بتتحس لكن مالهاش مقاييس.

[kareem_Ashmawy]

أيوة يا باشا ...أنا عارف النوبيرا اللى بتقول عليها دى كويس
لأ هى مش كده هى شبه الزيرو الــ2007

بس الحق يقال العربية من جوه زى الزيرو بالضبط كل اللى اما أخذته عليها
ان القعدة البلاستيك اللى راكب عليها زراير الزجاج الكهرباء كانت ملخلخة
و النيكل اللى فى أوكرة باب السواق منحول
انما الزراير مش ممسوحة خالص
و الكراسى ناشفة مش هبطانة و مش متسخة
هو بس فى حاجة كمان انا لاحظتها..
جيت ارفع الازاز و العربية مش دايرة ( على التاكة التانية فى الكونتاكت)
كان طالع بالراحة اوى..ممكن تكون البطارية ضعيفة






المهم ....
انا بأه عايز نصيحتكم...من الأخر أروح اودى العربية التوكيل
و أكع ال 220 جنيه
و لا أشوف حاجة تانية ..
و شكرا لأستاذ ليمو و استاذ حازم

[hazem_khidr]

العفو علي ايه ياراجل انت تأمر.
مش لازم توكيل ممكن توريها لسمكري كويس يبصلك عليها و علي اساسياتها و ميكانيكي و عفشجي و حتوفر معظم المبلغ دا مش لازم توكيل

[limo]

والله انا راى انك تتأكد من كون خليجى ولا مصرى الاول وخلى بالك موضوع عطاء التانك ده ممكن يكون اتكسر منه وراح جاب واحد استيراد مش شرط
انا شايف انها لو مطلعتش خليجى يعنى تجميع محلى يبقى ابعد عنها لان شكل العربيه كده ملعوب فيها وكمان الراجل ضحك عليك فمين عارف ممكن يكون مخبى ايه تانى
لو طلعت خليجى وانت حاسس ان العربيه مش متهانه يعنى صاحبها اديه فيها فانا راى انك تروح الاول عن ميكانيكى شاطر يكشف عليها معتقدش انه هياخذ فلوس كتير وبعد كده شوف سمكرى كويس يكشف عليها
لو طلعت كوسيه يبقى روح التوكيل اكشف عليها هناك برضو امان زياده لو طلعت كويسه يبقى توكل على الله
ربنا يوفقك فى الى فيه الخير

[kareem_Ashmawy]

و الله يا جماعة انا والدى اتخذ قرار ( بما ان العربية للاسرة مش ليا)
اننا نبعد عن العربية دى
بما انها مش طبيعية
كمان هو والدى اتصل بالتوكيل و اتكلم مع مهندس من الصيانة
و قال له ابعد عنها لو خليجى لأن قطع غيارها صعبة على حد زعمهي

و بالتالى فصرفنا نظر عن العربية دى تماما

شكرا ليكم كلكم يا جماعة و يا رب دايما تتعاونوا مع الناس كده على طول

حزاكم الله كل خير...