السيارة مش بتدور نهائى

[lionhero16]

عربيتى دايو لانوس عطلت منى قبل البيت,
كنت واقف جيت ادوّر لقيت التابلوه نوره ضعيف وصوته مخنوق والمارش مش بيدور اصلا
حاولت تانى وفتحت الكبوت في صوت تكتكة طالع من علبة الفيوزات,
ولمبة التشيك بترعش.. ارجو مساعدتى وشكرا

[samirayad]

أكشف على كتاوت الأمداد الرئيسى فى علبة الفيوزات وجميع الفيوزات...........دى أول خطوه .......وممكن تكون فيها كل المطلوب أن شاء الله

[lionhero16]

شكرا على الرد السريع,
بس فين كتاوت الامداد ده, وبعدين الصوت طالع من العلبة اللى في الكبوت امام الدركسيون, صوت تكتكة على اوى . بس هى كل اللى فيها شكله سليم ومفيش ريحة شياط او حاجة.

[samirayad]

هو أنت ماتعرفش علبة الفيوزات عندك .......حتلاقى الكتاوت مش متصل كويس ....وهو اللى بيعمل صوت التكتكه بتاع التلقيط دى ...........وعلبة الفيوزات دى علبه بلاستيك سوداء قدامك وانت فاتح الكبوت.............وممكن تستعين بصديق أو كهربائى..............................على فكره الكتاوت ده تقريبا قدرته 80 أمبير

[lionhero16]

شكرا جدا, هنزل اشوفه وربنا يسهل,متشكر جدا على اهتمامك
طب غير كده في حاجة تانى ابص عليها..

[samirayad]

شكرا جدا, هنزل اشوفه وربنا يسهل,متشكر جدا على اهتمامك
طب غير كده في حاجة تانى ابص عليها..

أنزل شوفه حالا وأنا قاعد منتظرك لأنه ممكن يبوظ قاعدته طالما فيه كهرباء رايحاله من البطاريه ومش ملمس كويس (وحتلاقى العمليه بسيطه ....مجرد التأكيد على تركيبه بأحكام فى مكانه ...لأن ممكن مع الهزة والرجرجه وأنت جاى بالعربيه هوى شويه )....وأن شاء الله خير ......بس ياريت على طول دلوقتى ...لأن أنت أكيد سايب البطاريه موصله وأنا خايق قاعدة الكتاوت ده تبوظ من الشرر وخلافه وتبقى مشكله لاقدر الله........يا أما تفصل البطاريه لو معرفتش تعمل حاجه على ماتشوف كهربائى.........

[ahmed322]

يا باشا ممكن تعمل فحص للبطاريه لانها هى اكيد مش موصله كهرباء كويس علشان كده بتعمل الصوت دا ..ولو عايز تتأكد حاول تجيب اى بطريه من اى حد صحبك وجربها هتلاقى العربيه بتدور عادى خالص

[samirayad]

يا باشا ممكن تعمل فحص للبطاريه لانها هى اكيد مش موصله كهرباء كويس علشان كده بتعمل الصوت دا ..ولو عايز تتأكد حاول تجيب اى بطريه من اى حد صحبك وجربها هتلاقى العربيه بتدور عادى خالص

الراجل بيقول تكتكه ( وبالتحديد من علبة الفيوزات ).......وطبعا هو اللى شايف لا أنا ولا أنت

وفتحت الكبوت في صوت تكتكة طالع من علبة الفيوزات

وأدى الدليـــــــــــــــــــــــــل

[lionhero16]

مفيش فايدة و كل الوصلات تمام والفيوزات في مكانها ,
السنتر بيعلق, والانوار مش شغالة و لما بأدوّر صوت التكتكة مستمر و الزنة بتاعة التشيك كمان والموتور مبينطقش

[samirayad]

طيب وأتأكدت برضه من توصيلات البطاريه زى مالباشمهندس اللى علق على الموضوع قال ونبه لكده...............

[lionhero16]

ايوه واضح جدا مفيش حاجة مفكوكة و انا مخدتش مطبات طب ممكن يكون
اى حاجة تانية زى الدينامو او البطارية ولا أكيد في علبة الفيوزات عشان الصوت اللى طالع منها.
المشكلة بكره الأحد وكله قافل .. طمنى بس توقعاتك ايه ؟؟

[samirayad]

لا الدينامو مفيهوش حاجه (لأنه كان شغال معاك لحد ما بطلت )............وأنا شاكك أن الكتاوت ده ودع خلاص ولازم يتغير ......علشان أنت بتأكد أن التكتكه منه لما قولت أن الصوت بتاع التكتكه ده صادر من علبة الفيوزات..........ومش عارف ليه مش مقتنع أن العيب من البطاريه.......وبالذات لما أنت بتقول أن توصيلاتها تمام ومفيش حاجه مفكوكه.......

السنتر بيعلق, والانوار مش شغالة و لما بأدوّر صوت التكتكة مستمر و الزنة بتاعة التشيك

عارف الحته دى لو حتى البطاريه ضعيفه والأتصال مش قد كده وكابلات مهويه حتى (على الرغم من أنك بتقول الكابلات تمام )......كان السنتر حيشتغل والتغذيه اللى رايحه لوحدة التحكم كمان ومكانش حيبقى فيه زنه (الزنه دى تقريبا أنذار خاص بوحدة التحكم وبتقول الكهرباء مش واصلالى )..........وكل اللى كان حيحصل أن المارش مش حيدور العربيه.........................وأنت ممكن تطلع الكتاوت ده وتبص عليه (وممكن حتلاقى أرجله محروقه لو كان كلامى صحيح ).......هو الكتاوت بدون شك.....................

[fakoussa]

البطارية و الصوت اللى طالع دا من المارش لانه الكترونى .
انا حصلى كده من قبل و طلعت البطارية .

[lionhero16]

أشكرك بشدة , على العموم تصبح على خير وبكره ربنا يدبرها
بس انا اجيب أى كهربائى ولا لازم حد بتاع كورى والكتاوت ده في حدود كام .. وشكرا

[lol656]

البطارييييييييييييية

اعمل تشيك علي وصلات البطارية ولو تقدر تجرب بطارية تانية احسن