باركولى وساعدونى ( لسه شارى لانوس 99 جديد )

[abmoo]

السلام عليكم
ان لسه شارى لانوس جديدة موديل 99
اولا عايز رايكم فيها كسيارة انا اشتريتها 38 الف هل السعر مناسب ام لا
ومحتاج اعملها تشيك على كل حاجة فيها ياريت لو تقوللى مكان كويس اقدر اعمل فيه صيانة محترمة ومدفعش كتير
وكمان لو عايز اقلبها اتوماتيك ياترى تتكلف كام
شكرا للجميع وخصوصا الى حيرده عليه

[MMamdouh]

مبروك

MMamdouh

[nasroo]

الف مبروك
لو حالتها كويسة يبقى السعر ده كده كويس
طبعا اول حاجة تعملها تغير فلاتر وسيور وبوجيهات عشان تبدأ على مية بيضا ودي تتعمل عند اي حد مش محتاجة واحد معين يعني

[zeka127]

الف مبروووووك

[samirayad]

الف مبروك.......وعلى طول غير سير الكاتينه والزيت والفلتر بتاعه.........حتى لو اللى بايعلك قالك أنا لسه عامل الحاجات دى أمبارح

[saifsaadmohamed]

مبروووووووووووك
ربنا يكتبلك خيرها و يبعد عنك شرها

[abouzaid555]

وكمان لو عايز اقلبها اتوماتيك ياترى تتكلف كام

الف مبروك بس انا اعرف ان الاوتوماتيك فى الكورى مش كويس و الله اعلم و خد راى خبراء المنتدى

[mokhtar]

الف مبروك على اللانوس ةحاول تعمل زى ما الزملاء قالوا وتغير الحاجات دى عشات تبقى فى السليم
بالنسبه للاتوماتيك مانصحكش بيه فى اللانوس مش عشان كورى بس انما عشان كمان مستعمله يعنى لانوس كورى مستعمل اتوماتيك مش هايبقى تمام وده على كلام معظم الناس اللى ركبوا دايو اتوماتيك مع انها عربيه جامده جدا ده غير وجع الدماغ بتاع التحويل من مانيوال لاتوماتيك

[Drift_Lover]

الف مبروك...
وربنا يديك خيرها ويكفيك شرها.

1- تغيير الزيت... واكد علي زيت الباور انه مش ناقص.
2- تغيير الفلاتر. فلتر البنزين بالاخص. وتنظيف فلتر الهوا او تغييره.
3- تغيير السيور ( سير الكاتينة وسير الدينامو وسير التكييف ) ,وبالمرة وانت بتغير سير الكاتينة اكشف علي الميكانيكي يكشف لك علي دورة المية (طلمبة الميه بالاخص علشان انت كده كده حليت.)
4- اتأكد ان العدادات ولمبات البيان كلها شغالة (لمبة التشيك-لمبة الزيت-لمبة البنزين- لمبة الدينامو(البطارية) - لمبة حزام الامان - لمبة الباب )
هما 6 لمبات اساسيين ولمبة البنزين في حالة التنك قرب يفضي.
5- خللي بالك من المراوح واـاكد انها شغاله تمام. وخللي عينك علي أمبير الحراره وشوف المرواح بتشتغل لما العربيه تسخن ولا لأ.
6- اكشف علي البوجيهات ولو مرطبة غيرها.

7- شيك علي التيل فقط و لو العافشة تمام ماتعملش فيها ماتعملش فيها شغل دلوقتي... لكن لو فيها مشكلة لازم تعملها وبعد ماتخلص اظبط زوايا.

8- بعد ما تخلص الليلة دي وعلشان يطمئن قلبك. اكشف علي العربيه اسكانر علشان تتأكد ان كل حاجه تمام... وخللي المهندس وهو بيكشف سكانر يقولك آخر 3 اخطاء متخزنين في الكنترولر. وخليك فاكرهم وحط تحتهم خط (من باب العلم بالشئ. والاحتياط لمعرفة ايه اللي كان في العربيه واتعمل ولا لأ قبل كده )


الموضوع ده حياخد منك يومين تلاته.
بس بعدها ركب العربيه وانت متطمن وان شاء الله ماتفكرش غير انك تستمتع بقيادتها.

والف مبروك للمرة التانية.

[ahmedsrs]

الف مبروك العربية

[abmoo]

الف شكر

الف شكر لكل اللى رد عليه واللى مردش كمان وانا سعيد بالتعاون اللى لمسته فى المنتدى
رغم انى عضو جديد جدا
وارجو ان اقوم بخدمتكم بس للاسف انا خبريتى فى السيارات ضعيفة شوى بس لو حد حب اى خدمة من مهندس كهرباء اللى هو انا انا عيونى ليكم جميعا بدون استثناء
وانا فى المنتدى قريت كتير عن ورشة محمد عبده فى الجيزة بس ياترى مفيش ورشة محترمة قريبة من مدينة نصر ومن مصر لاجديدة
الله يديم علينا هذا التعاون المثمر وجعله الله فى ميزان حسناتنا
شكرا