استشارة فى الموبينة

[A.samy]

النهاردة كان معاية واحد صاحبى بيفهم فى الكهرباء شوية بصلى على العربية وشد سلوك البوجيهات وكشف على الشرارة الخارجة من السلك لقى تلات سلوك الشرارة بتعتهم كويسة والرابعة بتخرج شرارة ضعيفة قوى قالى كدة فى مشكلة يا فى السلك يا اما الموبينة الحقيقة مش عارف هى الموبينة لو بايظة مش المفروض تقطع كهرباء خالص ولا ممكن كابل واحد تبقى الشرارة فية ضعيفة قلولى عشان انا رايح للكهربائى بكرة ومش عايز حد يشتغلنى .

[samirayad]

لا هى البوبينا عندك كويسه .....وأنت محتاج تغير السلك اللى شرارته تعبانه ......وياريت لو تجيب طقم جديد وخلاص (حيكون أفضل ).........ولو عاوز برضه تطمن لصحة تحليلى أنقل السلك التعبان لمكان تانى (مكان واحد من الثلاثه الكويسين .....حتلاقى اللى بأقولك عليه مضبوط مائه بالمائه )...طبعا بعد ماتعمل نفس الأختبار اللى عمله صاحبك بعد نقل وضع السلك...................** لا ولاحظ أن ممكن يكون السلك برضه سليم والنتايه أو البنه اللى راكبه على السلك مش محكمه عليه كويس وفيه عدم اتصال جيد برضه بينهم ولاتقوم بنقل الشراره لخارج السلك كويس......وحشوفلك موضوع عن الكابلات حتلاقى فيه اللى بأقولك عليه بخصوص حتة النتايه دى اللى فى آخر السلك ....http://www.nilemotors.net/Nile/showthread.php?t=60028

[Sherif Khalifa]

جرب نفس الكشف من ناحية الموبينة

[A.samy]

عملت نفس الكشف من ناحية الموبينة ونفس السلك طلع شرارة ضعيفة

[samirayad]

طيب قولنا عملته أزاى من جنب البوبينا (لأن كده حيكون العيب من البوبينا )

[A.samy]

فكيت السلك من جانب الموبينة مش من ناحية البوجيهات .
بس لما روحت للكهربائى قالى دة سلك روح هات سلك بوجيهات وتعالى الحقيقة انا روحت ومرجعتش عشان هو كل اللى عملة نفس اللى انا عملتة حتى مجربش بسلك تانى من عندة بيريح دماغة وقالى هات السلك ولما السلك يطلع العيب مش منة يبقى نجيب موبينة هى مش فارقة معاة وزبون ولما قلتلونجرب بسلك تانى قالى انا متاكد انة اللى بايظ هو السلك

[samirayad]

ولما السلك يطلع العيب مش منة يبقى نجيب موبينة

هى مش فارقة معاة وزبون ولما قلتلونجرب بسلك تانى قالى انا متاكد انة اللى بايظ هو السلك

هو خسران ولا حيدفع حاجه من جيبه.......................أنا مقتنع اللى بايظ عندك السلك مش البوبينا

[samirayad]

خد أقرأ الموضوع ده ...وأنت حتعرف ليه البوبينا بتكون سليمه لما يكون فيه شراره واحده من الأربعه هى اللى ضعيفه والتلاته التانين كويسين وتقريبا زى بعض............................................... ........http://www.nilemotors.net/Nile/showthread.php?t=63221

[A.samy]

روحت لكهربائى تانى قالى روح لميكانيكى هو اللى يكشف على السلك والموبينة ولو قالك روح لكهربائى تعالى المهم روحت للميكانيكى كشف والغريبة السلك طلع كويس والشرارة زى الفل وقالى العربية مفهاش حاجة والموبينة مفهاش حاجة المهم سبتة وعديت على ميكانيكى تانى وبردة كشف على الشرارة الخارجة من الموبينة وطلعت كويسة وقالى العربية مفهاش حاجة
سبتة ورحت لواحد تالت وقال نفس الكلام ان مفيش حاجة وبعدين قالى احتياطى غير السلك قولت ماشى بس لما اسأل الرجالة الاول وعشان هو اجراء احتياطى يبقى ممكن يستنى
بس مش عارف هى كدة العربية بحلات لان الكلام كلة حصل قدامى وفعلا كان فى كابل مبيطلعش شرارة وفجأة بقى يطلع لما روحت للميكانيكى نفسى اعرف اية السبب لو حد يعرف يقلى.
على فكرة انا شوفت ماركة الموبينة ولقيت مكتوب عليها gm والكبلات مكتوب عليها دايو .

[samirayad]

بص يا أستاذ/ احمد.....واضح أن معندكش مشكله.......وتلاقى الكبل اللى كانت شرارته ضعيفه ده (ماكانش واصل كويس على مخرج البوبينا نفسها ساعة ماكان زميلك أو الكهربائى بيجرب الشراره أول مره.....وده الأحتمال الأرجح ).....وكده كويس والحمد لله

[A.samy]

انت لسة فاكرنى يا باشا يا سيدى ربنا مايحرمنا منك ويخليك لاعضاء المنتدى اللى عمرك ماقصرت ولا اتاخرت على حد بمعلوماتك المفيدة .
ياريت ياباشا ترد عليا فى موضوع العفشة اللى لسة كاتبة.

[samirayad]

انت لسة فاكرنى يا باشا يا سيدى ربنا مايحرمنا منك ويخليك لاعضاء المنتدى

الله يخليك يا أبوحميد......دا أنا بفضل الله فاكر موضوع الحراره كمان والتفويت اللى كان من وش السلندر تقريبا.......ياعنى الأمور طشاش

اللى عمرك ماقصرت ولا اتاخرت على حد بمعلوماتك المفيدة .

الله يخليك وأنا بأعتبر الجميع أخواتى وكفايه الواحد بيتعلم ويستفيد مع الجميع

ياريت ياباشا ترد عليا فى موضوع العفشة اللى لسة كاتبة

رديت عليك فور كتابتك له......أن أصلا بأفرح والله يا أحمد لما بأفكر مع أى زميل........