زيت فى قربة المياه_نوبيرا 2

[محمد فريد]

السلام عليكم

فى مشكلة فى عربية خالى وهى وجود زيت فى قربة المياه نوبيرا 2005 اتوماتيك

أرجو ابداء الأراء حول الاسباب وشكرا مقدما

[samirayad]

دى مشكله فى الردياتير ......والزيت اللى فى القربه زيت الفتيس الأوتوماتيك......وخليه برضه يكشف على زيت الفتيس على طول للأطمئنان

[A.samy]

ممكن يكون جوان وش السلندر ضرب:k4:

[samirayad]

خبره بقه ياسيدى..................بس كان قال عن أرتفاع الحراره أو تفويت من الرأس بسبب أن مسامير الرأس هوت شويه

[محمد فريد]

شكرا يا استاذ سمير
لو جوان وش السلندر بايظ الميه هى اللى هتدخل على الزيت وليس العكس

طيب حضرتك المشكلة دى تتحل بلحام الريداتير ام ماذا؟

بالمرة كده حضرتك تعرف حد كويس بتاع ريداتير؟

[samirayad]

شكرا يا استاذ سمير

ياباشا تحت أمرك

طيب حضرتك المشكلة دى تتحل بلحام الريداتير ام ماذا؟

طبعا أنا لم أحتك بردياتير الأوتوماتيك....وبلاشك حيكون زيت الفتيس ليه دورة تبريد مستقله (بحيث الزيت خارج المراسير والميه هى داخل المواسير طبعا ) طالما مية التبريد هى اللى بتبرد زيت الفتيس مش الهواء زى الدوره بتاعة مية التبريد فى السيارات........وده اللى مطبق مع أى دورة تبريد بيكون المائعين من النوع السائل (السخن خارج سربنتينه ...البارد داخلها ) ودى حتكون دورة تبريد الفتيس........ومن هنا ممكن نستنتج أن المشكله حتكون فى سربنتينة زيت الفتيس فقط ........ودى أعتقد ممكن تفصل عن الردياتير الكبير وتنكبس ويعاد لحام الخرم الموجود وتسيخ كمان وكده ممكن تكون سربنتينة دورة الميه كويسه ومفيش فيها مشاكل والمشكله بس فى سربنتينة الفتيس ...........وياريت يأبو حميد تبقى برضه تقوللى على الشكل العام لما تحضر المناوره دى....

بالمرة كده حضرتك تعرف حد كويس بتاع ريداتير؟

من قال لا أعلم فقد أفتى.......أى تاكسجى كويس ياريس يجيبلك من الآخر ( وأسماعيليه مش كبيره ).............بالتوفيق أن شاء الله

[محمد فريد]

شكرا يا استاذ سمير على التحليل العلمى السليم 100/100
خالى راح النهارده لواحد فى شارع الاهرام بجوار حلوانى طيبه اللى فى المحطة الجديدة وقاله هنغير الريداتير كله بالسربنتينه وزمانه غيره

[samirayad]

أنا سألتك ......فيه واحد بيلحم ردياتير كويس جدا عند تقاطع الثلاثينى مع البحرى ( قدام شركة مسمار ) بيقولوا عليه عشره على عشره ...........شوف كده الخال الفاضل غير ولا لسه .......وأهى محاوله برضه

[محمد فريد]

هعرف منه ان شا ء الله وأقول لحضرتك