الاوبترا و النوبيرا

[SamehKholif]

السلام عليكم ورحمة الله
لو سمحت يا أستاذ/محمد ممدوح
هل الأوبترا أفضل من النوبيرا فى العفشة والفرامل والارتفاع عن الأرض
وأيه أخبار قطع غيارها من حيث السعر والتوافر
وهل هناك فروق جوهرية بين النوبيرا والأوبترا لصالح الأوبترا تستاهل فرق السعر ده.
واذا كنت مقبل على الشراء بالتقسيط فأيهما أختار ولماذا؟؟؟؟؟؟؟؟؟؟؟
وهل يجب أن أصبر قليلا حيث أن هناك انخفاض فى الأسعار الفترة المقبلة أم أن هذا لن يحدث فى بلدنا الحبيب؟
ولسيادتكم جزيل الشكر

[MaZaGAngeE]

ايه رأيكم يا شباب في الموضوع ده ؟

[zocor742]

انا شايف ان الاوبترا افضل من النوبيرا وعفشتها انعم من النوبيرا وفراملها طبعا كويسة عشان فيهاabs ودة ممش موجود فى النوبيرا المصرى بس بالنسبة لقطع الغيار معرفش عنها حاجة ممكن حد معاة العربية يفيدك وممكن طلب لو حضرتك ممكن تصبر شوية على العربية وتنضم لحملة خليها تصدى وهتجيب نتيجة فى ارتفاع الاسعار وعلى فكرة والله فى ناس كانوا هيشتروا خلاص لاكن فكروا يصبروا لحد ما الاسعار تتظبت

[MMamdouh]

السلام عليكم ورحمة الله
لو سمحت يا أستاذ/محمد ممدوح

هل الأوبترا أفضل من النوبيرا فى العفشة والفرامل والارتفاع عن الأرض

انا لما بصيت على عفشة الاوبترا الامامية لقيت فيها مقصات مختلفة عن بتاعت النوبيرا و اشبة بمقصات الافيو... و دى بتتحمل الاجهاد و الاستخدام اكتر بكتير من بتاعت النوبيرا اللى بتتقطع فيها الجلب بمعدل كبير... انا مفحصتش العفشة الخلفية زى الناس بس من اللى شوفتة ملقيتش اى فرق جوهرى

بالنسبة للفرامل انا مسوقتش العربية بس شايف ان فيها سيرفو و ماستر فرامل مختلف عن النوبيرا... بس معرفش هل فيه فرق فى الاداء ولا لا لانى مسوقتهاش الصراحة

انا مقيستش ارتفاع ايا من العربيتين عن الارض لعمل مقارنة بينهم

وأيه أخبار قطع غيارها من حيث السعر والتوافر

مش عارف الاوبترا اوى لكن من خلال معرفتى بالافيو اقدر اقولك ان لو القطعة مشتركة مع الدايو حتلاقيها موجودة و رخيصة... و لو مش مشتركة حتلاقيها غالية

الاكصدام الخلفى الاصلى للافيو ب 800 جنية و تيل الافيو الجولد ب 60 جنية

وهل هناك فروق جوهرية بين النوبيرا والأوبترا لصالح الأوبترا تستاهل فرق السعر ده.

بخلاف طبعا الشكل الخارجى و الداخلى فا الاوبترا عفشتها الامامية مختلفة زى ماوضحنا و بتستحمل عن عفشة النوبيرا... و وضحنا ان الفرامل مختلفة بس مش عارف الفرق فى الاداء شكلة ايه... دا غير انى بشوف من الاوبترا بسكاكسن ورا فى حين ان كل النوبيرا بفرامل طبلة ورا

كذلك الmanagment بتاع الموتور... و غالبا الرشاشات اللى فيها غير بتوع النوبيرا.. انا بقول غالبا لانى مشوفتهاش بس بما ان العربية شيفروليه فا غالبا حيبقى فيها management ماركة دلفى و دة بيبقى شغال بالرشاشات الرفيعة اللى مبتسيلش

تستاهل او متستاهلش فرق السعر دى ترجع للى بيشترى العربية و مدى استعدادة لدفع مبلغ اضافى مقابل الزيادات المذكورة (و ان كنت شايف ان المبلغ الزيادة له مبرارت منطقية جدا)

واذا كنت مقبل على الشراء بالتقسيط فأيهما أختار ولماذا؟؟؟؟؟؟؟؟؟؟؟

الشراء بالتقسيط او كاش ملوش علاقة بالعربية... ات كدة كدة حتدفع فلوس... و فرق السعر ثابت سواء اشتريت كاش او قسط... اجابة السؤال ترجع لامكانياتك المادية اكتر من العربية نفسها

وهل يجب أن أصبر قليلا حيث أن هناك انخفاض فى الأسعار الفترة المقبلة أم أن هذا لن يحدث فى بلدنا الحبيب؟

انا سمعت القصة دى من 7000 سنة ان الاسعار حتنزل و مفيش حاجة بتنزل... لو انت محتاج عربية اشتريها... هو انت حتعي كام مرة عشان تستنى بعد سنة و لا اتنين لما الاسعار تنزل... و حتى لو نزلت حتكون دفعت الفرق دة تاكسيات... اشترى النهاردة و استمتع بعربيتك الجديدة

ولسيادتكم جزيل الشكر

لا شكر على واجب و مبروك مقدما

MMamdouh

[meller]

والله الاستاذ محمد اضاف كتير قوي بس انا من وجهة نظري شايف ان الاوبترا شكلها احلي من النوبيرا والا اعرفة ان الاختلافات مش كتير بس انا لو مكانك هشتري اوبترا وانت ورايك

[merosss]

انا كنت محتار زيك كدة بالضبط وجبت نوبيرا 2008 بس انا بنصحك انك تجيب الاوبترا فرق السعر دة يستاهل عشان فرق التقفيل النوبيرا تقفلها مش حلو ذى الاوبترا وطبعا الفروق الى قال عليها الاستاذ محمد ممدوح فى العفشة و الموتور و فرق شكل العربية الاوبترا اشيك وغيران يقال ان منصور احسن من ابو الفتوح وفى موزع معتمد لمنصور على الاتوستراد اسمة العوض جروب وعندة مركز خدمة معتمد بردة واحد صاحبى جايب افيو منهم وبيعمل صيانة عندهم وبيشكر فيهم جدا جدا

[SamehKholif]

أولا ألف شكر على اهتمام الأعضاء و جزاكم الله عنا خيرا
ثانيا شكر خاص لأهتمام أستاذ /محمد ممدوح
ثالثا لقد حاولت بالفعل شراء سيارة أوبترا بالقسط من خلال شركة المصرية فرع جرين بلازا - اسكندرية وذلك بعد استخارة الله عز وجل ولكن كنت سأتعرض للنصب والحمد لله ربنا ستر.
الحكاية بأختصار أنهم فرجونى على عربية سماوى فاتح مانيوال ولما قلتلهم تمام على بركة الله . قالولى خلاص ادفع مقدم حجز وبكدة العربية تكون على اسمك لغاية ماتيجى موافقة البنك بكره و نخلص بكره باقى المبلغ قلتلهم تمام ودفعت وأخذت ايصال وكتبنا أبليكيشن .المهم جت موافقة البنك .ولقيتهم بيتصلوا بيا وبيقولولى الموافقة جت بس العربية اتباعت ؟؟؟؟؟؟؟؟؟؟؟
ومش كدة وبس ده احنا كمان بعتنا نجيب لحضرتك العربية الوحيدة الأوبترا الموجودة فى الشركة وهى فى فرع الغردقة.
وسبحان الله وبقدرة قادر كل العبيات اللى فى الفرع كتبوا عليها مباعة؟؟؟؟؟؟؟؟؟؟؟ظ
المهم بعد يومين تلاتة من التسويف جابولى عربية لونها فيرانى والبربيز الأمامى منقور والفرش الداخلى متسخ للغاية ويقولولى خدها والتأمين حيغطيها
بالله عليكم ده كلام ناس عاقلين.
وقالولي خلاص لو مش عاجباك خلاص العربية سعرها زاد 3 الاف جنيه ادفعهم فرق واحنا نجيبهالك. طبعا رفضت وتوجهت للبنك المحترم الأهلى سوسيتيه جنرال (كريدى نيل) استاذ /أحمد نبيل و أستاذ/ ابراهيم علاء (فرع الداون تاون) لتحويل موافقة البنك على أى معرض آخر يتعامل مع البنك وذلك فى وجود عروض أسعار بالسعر القديم واللون المطلوب طبعا رفضوا رفضا باتا مع الكثير من المماطلة فى البداية (تواطؤ تام مع المصرية)
المهم العربية بعد 7 أيام ذادت فعلا بعد ما عقدونى منهم لله وحسبنا الله ونعم الوكيل
وشكلى كدة حشترى مستعمل تنصحونى بأيه
وآسف للأطالة

[SamehKholif]

هل النوبيرا المستعملة استعمال خفيف 2004 مثلا تكون فلوسها فيها
ولا زى مابيقولوا ان الكورى خيره لأول ايد بس
والموديل ده يعمل كام النهاردة

[merosss]

المصرية اساسا دول اكبر نصابين ممكن حضرتك تشوف الموضوع دة http://nilemotors.net/Nile/showthread.php?t=74743 وممكن تشوف اى معرض تانى صغير بس مضمون وتشترى من عندة و هنا فى القاهرة فى موزعين معتمدين كتير جدا ممكن تجيب من عندهم والتسليم فورى

[SamehKholif]

شكرا على اهتمامك

[zocor742]

بجد انا سمعت ان عربيات المصرية بيكون فيها عيوب والتعامل بتعهم مش تمام معندهمش ضمير من الاخر اهم حاجة يبيع انصحك شوف معرض نظيف وياريت تجيب العربية من الوكيل بتعها افضلك وفية معارض كتير نظيفة فى الاسكنرية
ولو عايز عربية نوبيرا استعمال نظيف هقولك على مكان معرض فى سيدى بشر محمد نجيب بيجيب عربيات استعمال خارج نظيفة جدا جدا وبخيرها بجد وعندة كذا عربية نوبيرا 2 بريميوم كورى ممتازين ولسة جايب عربيات جديدة جولف وهوندا اوروبى بردو وبصراحة الجولف موديل 2000 بس بشوقها وجنط اسبور لو عايز تشوف المعرض دة كلمنى على الخاص وانا اوصفلك مكانة فين وعلى فكرة انا معرفش صاحب المعرض ولا ليا اى علاقة بية بس انا بتابع العربيات الى عندة بأستمرار وعربياتة مش بتفضل عندة كتير ما شاء اللة شوف ولو عايز حاجة كلمنى وتحت امرك ياباشا

[Samah AbdAllah]

فى اكتر من موضوع واعضاء كتير قالوا بلاش المصرية