وجود مياه في دواسة الكرسي اللي جنب السائق

[Mohamed A S]

الأخوة الكرام .. كل عام وأنتم بخير
كنت أمس في مشوار حوالي نصف ساعة وبعد كده ركنت وبعد ما خلصت المشوار ركبت العربية لاقيت آثار لمياه على الدواسة الكاوتش للكرسي اللي جنب السائق شلتها لاقيت برده ميه في الموكيت بتاع الدواسة .. حطيت ايدي تحت التابلوه وجدت آثار لميه بس بصراحة أن معرفش المكان دا بتاع إيه. يا ترى الواحد يكشف على العربية عند مين بالضبط .. يمكن يكون حاجة في التكييف .. يا ريت حد يدلني .. جزاكم الله كل خير

[Nader]

ممكن تكون الرطوبة المكثقة الناتجة عن التكيف. بس دة لو انت كنت مشغل التكيف اصلاً.

[Mohamed A S]

فعلاً أن كنت مشغل التكييف .. بس دا المفروض يكون عادي يعني والا فيه حاجة غلط ولازم أظبطها

[Mohamed A S]

فعلاً أن كنت مشغل التكييف .. بس دا المفروض يكون عادي يعني والا فيه حاجة غلط ولازم أظبطها .. هيه مش مياه التكثيف دي لازم يكون ليها مصرف ثاني بره العربية والا ايه.

[Nader]

ممكن يكون في انسداد في خرطوم التسريب

[modux]

الموضوع ده حصلي قبل كده
بتبقي سربنتينة التكييف السخن اتخرمت و نتحيب ميه الرادياتير عندك جوه

شييك علي مياه الرادياتير هتلاقيها بتنقص و المياه بتجي جوه

الحل
تفصل السربنتية الداخلية خالص و كده التكييف السخن وقف عن العمل

[Kisho]

الموضوع ده اكيد بسبب خرم فى سربنتينه التكييف السخن و الميه دى بتبقى ميه الرادياتير و لو حضرتك حاطط فى الرادياتير ميه ملونه هتلاحظ ان الميه الى فى الدواسه نفس اللون و كمان لاحظ و خد بالك بشده من مؤشر الحراره لا ميه الرادياتير اكيد اكيد بتنقص اكشف عليها فى اسرع وقت ضرورى
بالنسبه للحل فا اما تغير السربنتيه و ده حل مكلف جدا و متعب لان فيه احتمال تحتاج تفك التابلوه الى جانب ان ثمن السربنتينه بتاعت الاكسنت مثلا فى التوكيل 1200 جنيه
الحل السهل و السريع و الغير مكلف روح حضرتك لاى واحد بتاع تكييف سيارات و خليه يلغى خراطيم دايره السخن فى 10 دقائق و بكده الميه الى فى الدواسه هتروح و الرادياتير هيتظبط بس هتلغى التكييف السخن نهائيا

و شكرا

[Mohamed A S]

يعني اروح للراجل بتاع تكيف سيارات والا تتفصل منين دي

[Kisho]

روح لبتاع تكييف فى اسرع وقت علشان ميه الردياتير ماتعملكش مشكله اكبر بكتير و عينك دايما على مؤشر الحراره لحد ما تحل المشكله و بعد ما تخلص زود ميه الرادياتير الناقصه

[MMamdouh]

ماسورة الفايظ مسدودة و محتاجة تتنضف... فكها و نضف ورق الشجر اللى فيها و ركبها تانى حتلاقى الحياه ظريفة:



MMamdouh

[Mohamed A S]

يعني السربنتيه دي متتلحمش وملهاش حل غير إلغاء دائرة التكييف السخن .. لله الأمر من قبل ومن بعد

[Mohamed A S]

طبعاً أن امش هشغل التكييف لحد ما اشوف ايه الحكاية
وسواء الموضوع انسداد في ماسورة الفايظ أو خرم في سربنتينة التكييف السخن (ملحوظة .. فعلاً أنا عندي ميه الردياتير بتنقص من القربة) .. إن شاء الله هروح لبتاع التكييف والتبريد وأشوف إيه الحكاية وارجع اقولكم عملت ايه.
ومتشكر ليكم جميعاً على ردودكم السريعة القيمة.

[Abdallah]

اسمع كلام ممدوح وجرب قبل ما تروح لحد, ارفع العربية فى المشحمة وخلى العامل يفك الخرطوم وينضفه وان شاء الله هتبقى تمام.

[Mohamed A S]

من بقك لباب السما

[MMamdouh]

هنا فى فرق كبير... هى الميه دى بتبقى ساقعة و ملهاش ريحة ولا سخنة و ريحتها زى ريحة الميه الخضراء بتاعت الرادياتير؟؟

لو ساقعة و لهاش ريحة و لون يبقى زى ما قلت خرطوم الفايظ

اما لو سخنة و ريحتها ميه خضراء تبقى فعلا الكويل بتاع السخن و الاسهل انك تلغية اما تشترى واحد ب 375 جنية تقريبا و حتحتاج تفك كل التابلوة عشان تخغيرة و دى مش مصنعية قليلة

MMamdouh