مشكلة تزبزب الrpm

[zocor742]

روحت اغسل العربية النهاردة وبعد ما غسلتها بدور العربية لقيت حاجة غريبة الrbm بيزيد كأنى بزود بنزين لحد مايوصل ل2 ولمبة الشيك تنور ويفضل ينزل لحد 1,5 ويعلى لل2وينزل تانى فضلت على كدة شوية ابطل وادور هيا هيا ازود بنزين بردو نفس المشكلة كل دة على السلانسية حتى لما بسيب دبرياج مش بحتاج ادوس بنزين طبعا لحد ماروحت وانا بركن لقيت الrbm اتعدل تانى
تفتكروا اية الى حصل اروح للميكانيكى اكشف على العربية ولا ممكن يكون جت مية على اى حاجة بس الكبوت مفتحش اة على فكرة لمبة الشيك اتقفلت لما الموضوع اتظبت



يرجى من العضو اختيار عنوان معبر عن محتوى الموضوع

مشرف القسم

[ahmedsrs]

فى خرطوم رفيع كده بيجى من صدر العربية وبيخش فى المنافول اتاكد انه مش واقع

[zocor742]

معلش ياباشا هو فى مكان المنافول وشكلة اية

[samirayad]

حساس الماب راكب فى سدر العربيه من الداخل (فوق فلتر البنزين ).......وتحت الحساس زور ....راكب فيه خرطوم رفيع .....

_ وفيه وراء بكرة الأكسراتير ....حتلاقى الزور التانى اللى بيركب عليه طرف الخرطوم التانى.......

_ أكد على تركيب الخرطوم من الجنبين وشوف النتيجه................

[MMamdouh]

مشكلة تزبزب الRPM بتبقى من الTPS... غالبا جت عليه مية و هو اللى عمل كدة

عموما طالما لمبة التشك نورت يبقى الكونترول سجل كود العطل... حط العربية على سكانر و شوف كود العطل ايه للتاكيد

MMamdouh

[Samah AbdAllah]

مشكلة تزبزب الRPM بتبقى من الTPS... غالبا جت عليه مية و هو اللى عمل كدة

عموما طالما لمبة التشك نورت يبقى الكونترول سجل كود العطل... حط العربية على سكانر و شوف كود العطل ايه للتاكيد

MMamdouh

[zocor742]

متشكر يا جماعة على الردود
انا فعلا اتأكد من كل الخراطيم فى حوض المتور وكان كل حاجة مظبوطة هو الموضوع اتظبت لوحدة لحد ماروحت البيت وانا بركن العربية معنى كدة ان ممكن تكون المية وصلت لجزء معين هو الى عمل الخلل دة بس تتخيلوا كدة المشكلة الحمد لله اتحلت ولا لسة الموضوع محتاج انى اعمل حاجة تانية

[samirayad]

كده فعلا الكلام اللى حصل معاك زى ما أخونا محمد .....توقعه ....ماء من الغسيل تخلل فيشة حساس الtps وبكده حصل أتصال أرضى مؤقت بسبب الميه المتسربه لفيشة الحساس.....وبقى الحساس كأن الفيشه مفصوله لحظيا ( يعنى الكهربا اللى رايحاله من وحدة التحكم بتهرب فى اللحظه دى للأرضى ) هيا وخرج أشارته فى نفس اللحظه ونشف بعد كده مع السخونه بتاعة الغرفه ......لأننى تعجلت فعلا وفكرت فقط فى سؤالك عن مكان الخرطوم .....وطالما الأمور بقت تمام فلاداعى من عمل شىء .....الا أن وجد جديد .......قولنا عليه .........

[abzoabzo]

متشكر يا جماعة على الردود
انا فعلا اتأكد من كل الخراطيم فى حوض المتور وكان كل حاجة مظبوطة هو الموضوع اتظبت لوحدة لحد ماروحت البيت وانا بركن العربية معنى كدة ان ممكن تكون المية وصلت لجزء معين هو الى عمل الخلل دة بس تتخيلوا كدة المشكلة الحمد للة اتحلت ولا لسة الموضوع محتاج انى اعمل حاجة تانية

ممكن فى مياه وصلت للضفيرة الحوار ده بيقعد حوالى 6 ايام حتى تختفى اثار الغسيل وبعد كده بفك فيش الضفيرة عندنا فى الانوس شمال فوق لما تفتح الكبوت وبرش عليها w40 الموضوع بيرجع تمام

[samirayad]

كده فعلا الكلام اللى حصل معاك زى ما أخونا محمد .....توقعه ....ماء من الغسيل تخلل فيشة حساس الtps وبكده حصل أتصال أرضى مؤقت بسبب الميه المتسربه لفيشة الحساس.....وبقى الحساس كأن الفيشه مفصوله لحظيا ( يعنى الكهربا اللى رايحاله من وحدة التحكم بتهرب فى اللحظه دى للأرضى ) هيا وخرج أشارته فى نفس اللحظه ونشف بعد كده مع السخونه بتاعة الغرفه ......لأننى تعجلت فعلا وفكرت فقط فى سؤالك عن مكان الخرطوم .....وطالما الأمور بقت تمام فلاداعى من عمل شىء .....الا أن وجد جديد .......قولنا عليه .........

_ عاوز أعدل التحليل ده لأن أنا راجعت نفسى تانى واللى حصل كالآتى ..........

_ مية الغسيل لما دخلت فيشة الحساس حصل تلامس بين سلك دخول ال 5 فولت اللى جايين للحساس من وحدة التحكم .......وبين سلك الأشاره اللى خارج من نفس الحساس برضه لأن الماء موصل للكهرباء........وكده حصل خلل مؤقت فى عملية التحكم ........وبكده اللمبه نورت لحظيا ........

_ ولما نشفت الميه أنفصل سلك الباور عن سلك الأشاره وكده طفت اللمبه .........وعادت ريمـــــــــــا لعادتها القديمه .........أى الوضع الطبيعى .....

[محمد فضالي]

طيب يا جماعة مش ممكن كده يكون الكنترول يونت بتاع العربية سجل خطأ معين مثلا انه حس ان الفيشة اتشالت علشان التلامس اللي حصل فكده اللمبة نورت و لما طفت اللمبة حس ان الفيشة رجعت مكانها بعد انتهاء التلامس ( المية نشفت )
بس مش ممكن يكون الكنترول يونت قرأ الحساس غلط لاني سمعت ان في بعض الأوقات عند فصل أي فيشة لأي حساس الكنترول بيسجل خطأ و لما توضع الفيشة يزول الخطأ ( تطفي اللمبة ) ولكن قراءة الحساس بتكون مش مضبوطة

فهل فعلا ده بيحصل والأفضل وضع السيارة على سكانر و لا ايه؟
لان في رأي في العربيات اللي فيها حساسات التعامل معاها بحذر و أهمية أحسن

[samirayad]

طيب يا جماعة مش ممكن كده يكون الكنترول يونت بتاع العربية سجل خطأ معين مثلا انه حس ان الفيشة اتشالت علشان التلامس اللي حصل فكده اللمبة نورت

هو فعلا سجل خطأ .....وأحتفظ بيه فى ذاكرته .....والخطأ مش أن الحساس أنفصل ....ولكن أعتقد خطأ فى عملية التحكم نفسها .....وتحليلى اللى جاى

بس مش ممكن يكون الكنترول يونت قرأ الحساس غلط

الكنترول قرأ فعلا أن الحساس شغال ....وزى ماتكون البوابه على أقصى وضع فتح (لأن الميه لما وصلت الطرفين ببعض بقوا 5 فولت اللى رايحين كأشاره لوحدة التحكم .......هما مش 5 بالظبط أأقل شويه ....يعنى أربعه وكسور ).......والوضع ده بتاع أقصى وضع فتح للبوابه............وكده حصل خلل فى عملية التحكم وأعتقد ده العيب ( خطأ فى عملية التحكم )..............أزاى

_ وحدة التحكم الأشاره راحتلها بتاعة أقصى فتح للبوابه .......وأدت بنزين كتير .............

_ مع العلم أن الهواء اللى داخل شويه على البنزين (لأنه داخل من بلف الأيدل فقط مش من البوابه )...........وبكده كان الخليط غنى جدا ......وعلشان كده السرعه كانت مش مظبوطه .......تعلى وتوطى ....لحد ما الميه نشفت بالتتابع......وتلاقى درجة التوصيل بين السلكين كانت بتقل كل شويه ( مع نشفان الميه ) طبعا الفيلم ده جوه الفيشه بتاعة الحساس......علشان السرعه كانت بتقل.....................

لاني سمعت ان في بعض الأوقات عند فصل أي فيشة لأي حساس الكنترول بيسجل خطأ

ده صح

و لما توضع الفيشة يزول الخطأ ( تطفي اللمبة ) ولكن قراءة الحساس بتكون مش مضبوطة

ده نص ونص .......لما بتحط الفيشه اللمبه بتطفى فعلا........ولكن الخطأ بيتم تسجيله فى ذاكرة وحدة التحكم ......لحد مانطلعه بالأسكانر........وحتة قراءة الحساس بتتوقف على أن الحساس كان شغال كويس ولا لا .....

_ لو كان شغال تمام ......فمفيش مشكله وأشارته حترجع طبيعيه عادى جدا ولكن عيب فصله مسجل زى ماقولنا بسبب فصله السابق......

_ ولكن لو كانت أشارته ماكنتش مظبوطه أساسا .....حتفضل مش مظبوطه .....لحد مانغير الحساس نفسه

[محمد فضالي]

طيب ده معناه ان احنا لازم نحط العربية على سكانر علشلن نمسح الخطأ
؟؟؟؟؟؟؟؟؟؟؟؟؟؟؟؟؟؟؟

[samirayad]

_ العربيه لا توضع تحت الأسكانر الا مع العيوب المستمره ( اللى فيها لمبة الأعطال منوره بأستمرار وغير معروف سبب العيب وعاوزين نطفيها مثلا ...بعد معرفة العيب وعلاجه).......ولكن هذا عيب مؤقت ( والعيوب المؤقته فى عملية التحكم وارده جدا ).......... ....ولا تؤثر فى الآداء طالما تم التعرف على سبب العيب وحدث أنطفاء للمبة الأعطال.........فيجب تكبير الدماغ معاه ( طالما مفيش مشكله أساسا )................ولا داعى من مصاريف على الفاضى مثلا .........

[zocor742]

متشكر جدا على مروركم وشكر خاص للمهندس سمير للتوضيح الوافى للمشكلة والاستاذ ممدوح على تشخيص العيب والحمدلله العربية النهاردة طبيعية جدا مفيش اى خلل ما فيها واعتقد ان الاسكانر ملوش لازمة بما ان المشكلة اتحلت ولا اية رأيكم