تأخير دوارة النوبيرا

[Morieno]

طبعا عشان أنا بتلكك ..... فعاوز كل حاجه تبقى بإذن الله فى أفضل حاله .... ولو فى اى بوادر مشكله تتحل بدرى بدرى

العربيه فى بعض الأحيان بتتأخر فى الدواره ..... يعنى تحتاج حوالى 2 - 3 ثانيه ذياده عشان تدور
بيحصل لما تكون العربيه مركونه من شويه وسعات ما بيحصلش
لكن لما بتبقى لسه طافيها قريب وتيجى تشغلها ما بيحصلش خالص

العربيه نوبيرا 1600 ... موتور 78% ... البنزين 92 ... البطاريه جافه من شهر ... البوجيهات "مش عارف"

لو فى إحتمال غير البوجيهات ياريت أعرفه

وشكرا مقدما لكل الردود

[hossam_elwani]

العيب ده متعارف علية فى النوبيرا من زمان انا كان عندى 2001 وظهر العيب ده بعد تقريبا 3 شهور وساعات تتظبط وساعات ترجع تانى وعلى ما اتذكر الاخوة هنا فى المنتدى قالو ان العيب ده عيب رشاشات وبيتم تغيرهم برشاشات bmw من الحرفيين.

[Morieno]

شكرا لرد الأستاذ حسام

أول الغيث قطره .... مين كمان قال انا جاى "بهزر اوعى حد يزعل"

[samirayad]

طبعا عشان أنا بتلكك ..... فعاوز كل حاجه تبقى بإذن الله فى أفضل حاله .... ولو فى اى بوادر مشكله تتحل بدرى بدرى

لا ده مش تلكيك
دا ده الصح .....ووجهة نظرك دى ....فى لغة الهندسه
أسمها ( الصيانه الوقائيه ).......

العربيه نوبيرا 1600 ... موتور 78% ... البنزين 92 ... البطاريه جافه من شهر ... البوجيهات "مش عارف"

لو فى إحتمال غير البوجيهات ياريت أعرفه

وبما أن عربيتك بالمواصفات دى ....وعربيتك

car: Nubira 2005 m/t

أكشف على البوجيهات ......ولو مكنتش غيرتها من زمان
توكل على الله وغيرها
لأن فعلا

أول الغيث قطره

مين كمان قال انا جاى "بهزر اوعى حد يزعل"

أنا جايلك أهو .............ههههههههههههه
وهو فيه حد بيزعل من الكلام التلقائى الصح ....
وخد راحتك .....طالما فى حدود قوانين التخاطب

العيب ده متعارف علية فى النوبيرا من زمان انا كان عندى 2001 وظهر العيب ده بعد تقريبا 3 شهور وساعات تتظبط وساعات ترجع تانى

وعاوز أقول لأخونا ( حسام )
مش كل النوبيرا ولا الانوس كده
ده فعلا بدايه لخلل فى دورة الأشعال ( بوجيهات - كابلات - بوبينا )
أو بداية خلل رشاشات مثلا
بس حنختار الأسهل الأول ( البوجيهات )
بناءا على ملابسات القضيه
وأنا أتوقع أن الشك موجه بصوره قويه نحو البوجيهات
ودى أول حاجه أن أشك فيها ....قبل مانفتح ملف تانى
فالأولى أختيار الأسهل ....ثم ثم ثم
فقد يقع الطائر من على الشجره ....من أول قذيفه
الطائر (تأخير الدواره ) ....أول قذيفه ( البوجيهات )

[souzoran]

نفسى المشكله عندى برده وكنت شاكك فى البوجيهات وغيرتها وكانت مهببه ولما ركبت البوجيهات الجديده هببت برده بسرعه من اول يومين انا دلوقتى شاكك فى الرشاشات لان العربيه موديل 99

[samirayad]

نفسى المشكله عندى برده وكنت شاكك فى البوجيهات وغيرتها وكانت مهببه ولما ركبت البوجيهات الجديده هببت برده بسرعه من اول يومين انا دلوقتى شاكك فى الرشاشات لان العربيه موديل 99

لا أنت وضعك مختلف لأسباب كتير
1- عربيتك موديل 99 أما صاحب الموضوع موديل 2005 .....يعنى الرشاشات عنده لسه بخيرها
2- ممكن برضه تكون البوجيهات اللى أنت لسه شاريها مرطبه .....أو الجاب بتاعتها مش مظبوطه
3- وممكن يكون عندك عيب كابلات بوجيهات أو ضعف بوبينا
4- وطبعا لا ننكر أحتمال بداية خلل فى الرشاشات برضه

[souzoran]

شكرا يا بشمهندس سمير على ردك بس انا غيرت البوجيهات مرتين وساعات كتير بشم ريحه بنزين نى وهل حساس الشكمان يعمل نفس الاعراض ديه وازاى اعرف ان البوبينا هيه السبب او سلك البوجيهات

[samirayad]

بس انا غيرت البوجيهات مرتين

طالما مرتين ....يبقى البوجيهات بريئه من الفيلم ده الى حد كبير

وساعات كتير بشم ريحه بنزين نى

ماهو ده بسبب أخفاق فى دورة الأشعال أو دورة البنزين

وهل حساس الشكمان يعمل نفس الاعراض ديه

لا حساس الشكمان ....ملوش دخل بعملية بدأ الدواره ...اللى هى موضوعنا الحالى

وازاى اعرف ان البوبينا هيه السبب

من عند البوبينا ...حتفصل كبل كبل ....والعربيه شغاله ...وتقرب نتاية الكبل فى أتجاه التركيب تماما ....حيحصل شراره
لو لقيت الأربعه فى نفس القوه تقريبا .....يبقى البوبينا تمام

او سلك البوجيهات

ده ليه أختبار مقاومات ....وليه أختبارنا البلدى اللى معروف لدى الصنايعيه
حتعمل نفس طريقة فصل كابلات البوجيهات واحد واحد
المره دى من عند البوجيهات .....زى طريقة البوبينا ....ولكن من الجانب التانى عند البوجيهات

[souzoran]

هاعمل الاول اختبار للبوبينه وسلك البوجيهات واتأكد منهم ولو طلعوا تمام هاغير رشاشات ان شاء الله واجرب بس عربيتى 1500 cc اجيبلها بتوع ال bmw برده ولا اكسنت

[samirayad]

أنت عندك أفوميتر ....وبتعرف تستخدمه متهيألى لأنك شغال فى التبريد والتكييف
ممكن تبقى تقيس مقاومة الرشاشات بتاعتك واحد واحد لو تحب تطمن عليها برضه
المفروض مقاومة الرشاش تكون فى الحدود من 11.6 الى 12.4 أوم
لو المقاومه طلعت معاك أكبر من 12.4 أوم يبقى الرشاشات بايظه
وبالنسبه لموضوع ال1500 أو ال1600 مفيش مشاكل
ما الزملاء معاهم لانوس 1500 سى سى ....وبيغيروا بالرشاشات ال bmw 1600 cc ( دا لو الرشاشات عندك كانت فعلا مش كويسه )
بعد ماتعمل أختبار المقاومات
وعاوز أفكرك برضه بموضوع حق أو وعاء البنزين اللى كنا أتكلمنا فيه
ممكن يكون بيخللى الضغط فى التنك كبير
يعنى سحب الطلمبه كبير ....وبالتالى ضغطها كبير ....وبالتالى ضغط البنزين حيزيد زياده عن الازم .....وده يعمل مشكله تسييل برضه
عموما ....أنا مش عاوز أكبر الأمور عن كده .....علشان الأمور متهوش منك ......وخدها واحده واحده
وفى الآخر حتوصل أن شاء الله

[MMamdouh]

دى مشكلة رشاشات

MMamdouh

[souzoran]

الله ينور عليك يا بشمهندس سمير انا فاكر مشكله وعاء بخار البنزين لما كان بيعمل فاكيوم فى تانك البنزين بس ماكنش بيعمل ضغط فى التانك ده كان بيعمل فاكيوم بس كده فى نقطه حضرتك فكرتنى بيها ان عمليه الفاكيوم ديه كانت عمليه عكسيه على طلمبه البنزين لان المفروض ان الطلمبه بتاخد البنزين من التانك وتوديه بضغط معين على الرشاشات وعمليه الفاكيوم بتقلل الضغط ده فهل لو قل ضغط البنزين على الرشاشات له تأثير على عمليه الاحتراق

[samirayad]

فهل لو قل ضغط البنزين على الرشاشات له تأثير على عمليه الاحتراق

طبعا ياباشا
زيادة الضغط على الرشاشات تخليها تسيل لأن بلف منظم ضغط الوقود اللى فى آخر المسطره ليه حدود فى الفتح بناء على الفاكيوم اللى بياخده من البوابه
ونقص الضغط يخللى البنزين قليل اللى داخل غرف الحريق والحريق يبقى هزيل وسحب العربيه يبقى مش قد كده

[souzoran]

هاتأكدالاول من الخراطيم ووعاء بخار البنزين وعمليه الفاكيوم اللى فى التانك لو كله تمام هتوكل على الله واغير الرشاشات وشكرا يا بشمهندس سمير والاستاذ محمد ممدوح على الرد

[SBkr]

أنا معايا نوبيرا 99 وفيها نفس العيب دة البوجيهات بتهبب بسرعة و العادم ريحتة بنزين و السحب ضعيف وتأخير في الدوران لازم ادور مرة ثم ادور ثاني مرة علشان تدور ولا يمكن تدور من اول مرة حتي لوقعدت ادور نص ساعة وكشفت عليها قالي حساس الأكسجين بتاع الشكمان Pre Catalizer عاوز يتغير وناس تانية قالت لي الرشاشات كاوزة تتغير بتدخل بنزين كتير مع ملاحظة ان استهلاك العربية عادي حوالي 230 كم في الصفيحة هوة أية الحكاية بالضبط فين العيب وبعدين فين وعاء بخار البنزين هوة الأسفل من خرطوم تموين التانك العلبة الصغيرة و لو هية تتفك ازاي