ناوي اشتري لانوس بس خايف

[MMamdouh]

قاللي ان العربية حريقة بنزين

استهلاك اللانوس للبنزين فى حدود 9 الى 10 كيلو للتر... لو دة حريقة يبقى ارجو منك تسال صاحبك عن الاستهلاك الامثل لعربية 1500 سى سى و اى عربية بتحقق الاستهلاك اللى حيقول علية؟؟

و فيها عيب صناعة في رمان البلي بتاع العجل بتاعها

انا عندى لانوس ووالدى عندة لانوس و حمايا عندة لانوس و طبعا ثلاث ارباع اصحابى معاهم لانوس و محدش اشتكى ان العربية فيها عيب صناعة فيما يخص البلى

عيب الصناعة الوحيد كان فى اللانوس 99 و كان فى طلمبة البنزين... انا غيرت طلمبة بنزين فى عربية والدى تبع الضمان و مدفعتش حاجة

و انها بتاكل تيل الفرامل بتاعها بسرعة

اول مرة اسمع ان فيه عربية بتاكل تيل اصلا... استهلاك التيل مرتبط بطبيعة السواقة و استخدام الفرامل... بالتالى لو فيه عربية فعلا بتاكل تيل يبقى اما اللى سايق رجلة تقيلة على الفرامل و اما الطنابير بتاعت العربية وحشة

فهل الكلام ده صحيح ولا ايه لاني بجد عاوز احجزها في خلال اليومين دول علشان استلمها قبل العيد
شكرا مقدما

بص كدة على المواضيع اللى فى القسم و شوف شكوى ملاك اللانوس ايه و من خلال البحث دة حتعرف ميزات و عيوب العربية

على جانب اخر: اكيد صاحبك دة مركبش اللانوس ولا امتلكها قبل كدة اساسا... و لولا الملامة كنت قلت انة ملوش فى العربيات اصلا

MMamdouh

[swimmer25]

انا هديلك معلومة بالنسبة لاستهلاك البنزين
انا اعرف واحد دخل في مشروع احلال التاكسي وجاب لانوس وبيقولي العربية بتعمل 220 كم في الصفيحة
يعني اللتر بيعمل 11 كم (ده في داخل البلد)

انا عندي موديل 2008 وتقريبا نفس معدل استهلاك البنزين من 10 الي 11 كم للتر داخل البلد حسب طبيعة الشوارع والسواقة

[Morieno]

بعد كلام أبو يوسف مافيش كلام

اللانوس "الدايوا" لا غبار عليها يكفيك انك لو قلبت فى ذاكرتك كدا مش هتلاقى انك تفتكر انك شفت عربيه دايوا واقفه عطلانه فى الطريق

انا سمعت كلام فارغ كتير عن اللانوس لكن اول مره اسمع موضوع التيل والرولمان بلى دا

بالنسبه للإسبرانزا والفيرنا
اعتقد ان الاسبرانزا هيبقالها مستقبل كويس .... لكن امتى .... الله اعلم
أما الفيرنا مع احترامى ليه (ديقه - بتاكل بنزين اكتر من اللانوس - الموتور عفى قوى على جسم العربيه)

برجاء الملاحظه ان الكلام دا كله على لانوس الدايو مش الشفروليه
الكلام عن تجربه عربيات نسايبي كلها لانوس
وكنت بستعمل عربيه منهم لمدة تلات شهور بصفه مستمر (منذ بيع الاكسنت حتى شراء النوبيرا)

المهم ربنا يوفقك للى فيه الخير

[ahm_ess]

اتكل علي الله
مع ملاحظة ان اغلب سواقين التاكسي في مشروع الاحلال اختارو اللانوس بكثرة علي الفرنا والاسبرنزا والناس دي بتدور علي عربية خدمة شاقة ولف طول النهار واستهلاك بنزين معقول وقطع غيار رخيصة ومتوفرة وسهلة في الصيانة

[ahmad--ezzat]

اللي بيخوفني من اللانوس ده معندوش لانوس هو فعلا بس عندو نوبيرا
:)

على فكرة النوبيرا عيوبها اكتر من الانوس...الانوس صلبه شوبه عن النوبيرا

[waleedrahmy]

اشتري اي عربية ملئ بيها الشوارع اي كانت نوعها وانت مغمض.........أنظر حولك

[MAHMAHMOUD]

سيارة المصريين ( لانوس )

يا با شا
نقول مبروك عليك اللانوس
لانها بجد عربية جامدة حسب سعرها وقطع غيارها
وظروف بلدنا وشوارعنا
وكفاية انه تصميم المانى لانها كلها شاسية وموتور ونظام تعليق
بتاع الاوبل الاسترا وطبعا اللى عارف تاريخ الدايو يؤكد صحة كلامى
الصفيحة بتعمل 225 كيلو بالزحمة ومشغل التكييف
روحت للمكانيكى مرتين عشان اغير التيل ويفك وميرضاش يغيرة
يقولى لسة نصة وانا بشوف بعينى طبعا
وبسافر طبعا ومحمل الشنطة (واسعة جدا ) واربعة ورا وكلهم تبع نادى المائة
قول ما شاء الله لا قوة الا بالله
التكييف حلو جدا كتبريد بس توزيع الهوايات مش اوى
ممكن نقول العفشة مع الوقت تحتاج بصة ودة بعتبرة مش عيب لان شوارعنا طبعا زى الفل
توكل على الله

[waleedrahmy]

لانوس تاكسي ؟؟؟؟؟؟؟ فسر ذالك؟؟؟؟؟

[Eslam.Elrefaey]

أنا عن نفسى العربية عندى بتاكل البنزين أكل

[ENG\AHMED]

توضيح صغير بس علشان حاسس ان فى ناس بتمدح فى العربية بطريقة ممكن حد مش عارف العربية تتكون فكرة فى دماغة عن العربية ولما يشترى يلاقى الكلام مختلف
انا معايا لانوس يعنى كلام عن تجربة مش فى الهوا وخلاص
بالنسبة للعيوب اللى كاتبها صاحب الموضوع
- استهلاك البنزين : هى استهلاكها عالى حاجة بسيطة عن فئتها وبالذات جو البلد والتكييف بس فى نفس الوقت لو حسبتها بالورقة والقلم هيطلع كلام فارغ انت مش بتقارن بين عربية 1000 سى سى وعربية 3000 سى سى وبردة موضوع استهلاك البنزين نسبى يعنى هيختلف من سواق للتانى لنفس العربية حسب طبيعة السواقة
- بلى العجل : معظم البلى اللى فى السوق مضروب وطبيعى لو جبت بلى مضروب هيبوظ بسرعة .. دة عيب قطع غيار زى الزفت مش عيب فى العربية
- تيل الفرامل : اول مرة اسمع العيب دة فى اى عربية مش فى اللانوس بس !! انا اعرف تيل نوعة تعبان يتاكل بسرعة كدة انما عربية بتاكل تيل كتير !!! يبقى دة عيب سواق واتخدامة للفرامل سئ او الطنابير بايظة ويبقى بردة عيب سواق لو مش عارف انها بايظة !!

- بالنسبة للوسع صالونها معقول لكن الشنطة ضيقة نوعا ما على حساب الكابوت كبير!!
- بالنسبة للتحميل هى بتستحمل بهدلة بس طبعا الموتور هيعانى فى السحب
- التكييف : كويس ولو ان ساعات بحسة بيشتغل بمزاجة وطبيعى جدا بيأثر على السحب ( زى اى عربية مفيش حاجة اسمها تكييف مبياخدش من باور الموتور ومش بيأثر على السحب)
- اكبر عيوبها الفرامل ضعيفة عليها (ليها حل ومحمد ممدوح عدلها) , الثبات سئ (ركبتلها كاوتش ميشلان ومساعدين مونرو الموضوع اتحسن شوية وطبعا لو جنوط هيحسن اكتر.. نوعا ما لية حل) , الصاج خفيف جدا ومعظم الكورى واليابانى كدة .. لما تبقى عربية اضعاف تمن اللانوس وصاجها زى اللانوس او اسوأ يبقى مش عيب فى اللانوس

باختصار عربية عملية على قد فلوسها وصيانتها سهلة وحركتها خفيفة فى الزحمة .. متستناش منها كتير هى مش مرسيدس وفى نفس الوقت مش 128 واحسن من عربيات تانية كتير فى نفس فئتها

[MMamdouh]

طول عمرك بتجيب المفيد و من اخر الاخر

very nice post man

MMamdouh

[gebreel]

و الله العظيم بجد انا مش عارف اقولوكم ايه والله
من ساعة معملت الموضوع ده و انا شايف ناس فعلا بتدي النصيحة الصح عن تجربة و كلام مش فتي و خلاص، ربنا يكرمكم كللللللللللللللكم و الحمد لله انتو كدة حسمتو اختياري مع الاستخارة على اللانوس و ان شاء الله انا احتمال انز احجزها في خلال الاسبوع ده بس مقلق شوية علشان لسة مبعتش العربية بتاتي القديمة بس ان شاء الله ربنا يكرمني فيها

شكرا ليكو كلكو فعلا انا مش عارف اقولكم ايه و خصوصا الاستاذ الكبير محمد ممدوح نفسي اتعرف عليك يا باشا قوي والله و المهندس احمد و كل اللي ردو واحد واحد
رمضان كريم

[Samir Elshahawy]

اللانوس إستهلاكها للبنزين أعلى من مثيلاتها
ولكن مش مصيبة يعني
وهذا عن تجربة شخصية

وطالما إنت لسه مش مستقر حاول تفتح موضوع وتشاور الأعضاء على نوع السيارة

تصدق أول مرة أعرف المعلومة دي , مع أن الناس كلها هنا بالمنتدي بتقول عكس كلامك

ياسيدي الفاضل :
أنا كانت معايا العربية و عمرها 3 سنوات و معدل أستهلاكها كان ثابت الي أن بعتها الاسبوع الماضي
الاستهلاك كالاتي:
- في الطرق المفتوحة :
1 لتر = (12.5 - 15.0 ) كم , السرعة (90 - 140) كم/ساعة مع التكييف

- داخل القاهرة :
1 لتر = (10.5 - 11.5) كم , السرعة (40 - 80 ) كم/ساعة مع التكييف

[Samir Elshahawy]

, الصاج خفيف جدا ومعظم الكورى واليابانى كدة

صاج اللانوس و شكلها بيديه قوة أكثر من عربيات تانية كتير ياباني و كوري و ده عن تجربة من خلال الحادثة اللي كنت عملتها , لو عربية تانية كانت أتبهدلت أكتر من كده

[MMamdouh]

شكرا ليكو كلكو فعلا انا مش عارف اقولكم ايه و خصوصا الاستاذ الكبير محمد ممدوح نفسي اتعرف عليك يا باشا قوي والله و المهندس احمد و كل اللي ردو واحد واحد
رمضان كريم

ربنا يخليك يا باشا

MMamdouh