استفسار عن مؤشر البنزين

[lionhero16]

مساء الخير و رمضان كريم,
كان عندي تساؤلين 1) عن مؤشر البنزين , فجأة كده من اسبوعين لقيت المؤشر كل لما أفول التانك مابيوصلش
للآخر قلت يمكن مفولتش المرة دى , جربت أفول تانى للآخر و برضه المؤشر يقف قبل الشرطة الأخيرة بحاجة
بسيطة بعد ماكان بيطلع علي الآخر , فهل كده في عيب في العوامة ؟؟
2 ) فيه صوت زنة غريب خصوصا و السيارة باردة و الصوت تقريبا جاى من سير الكاتينة أو من حواليه بس صوت
مضايقنى أوي , ساعات بحس ان بيصل مع المطبات .. رأيكم أكشف علي إيه ؟؟
وشكرا جدا ليكم , وكل سنة و انتم طيبين.

[Mosmafa]

بص يا باشا
بالنسبة للمؤشر
ده حصل معايا بعد ما غيرت موتور الطرمبة
وعرفت انه من العوامة عليت عشان الطرمبة اللي رقبتها ااقصر سنة من الاصلية

بالنسبة للزنة اللي من عند سير الكاتينة
فهتغيرله البلي بتاع الشدادات عشان شكلها جابت اخرها
ولو كلامي مش صح الناس الجامدة تصححهولي

[samirayad]

1- موضوع مؤشر البنزين
حتحتاج تغير حساس العداد اللى على الطلمبه
ويمكن مع نظافته تتحل المشكله
لأن العربيه 2005
2- بالنسبه لموضوع الزنه اللى عند الكاتينه
من رأيى مدورش العربيه حتى وأنت رايح للميكانيكى
للكشف على سبب الزنه
هل هو بسبب بلية الشداد ولا بلية طلمبة الميه
وياريت برضه تنزل سير الدينامو وتجرب كده
لو الصوت راح يبقى دى بلية الدينامو
وياريت تقولنا على كيلومترات العربيه وموقف تغيير سير الكاتينه
وربنا يستر برضه ميكونش بسبب بلية طلمبة الباور أو كمبروسور التكييف

[lionhero16]

شكرا علي الردود وشكرا للمهندس سمير,
العربية عاملة 65000 كم والسيور كلها متغيرة عند 45000 كم
والصوت ده مش منتظم و مش مرتبط بالتكييف
بس أنا أصلا من زمان و انا عندي مشكلة في الدركسيون انه بيزيق مع الملفات ( مش عارف عيب ايه؟ )
و لما قولت حضرتك عيب في بلية الباورشكيت ممكن يكون ليه علاقة ولا لأ..؟؟

[samirayad]

بس أنا أصلا من زمان و انا عندي مشكلة في الدركسيون انه بيزيق مع الملفات ( مش عارف عيب ايه؟ )
و لما قولت حضرتك عيب في بلية الباورشكيت ممكن يكون ليه علاقة ولا لأ..؟؟

أولا كل سنه وأنت طيب ورمضان كريم
- عاوز أقولك على حاجه بسيطه ومش حتكلفك حاجه على أساس نجرب الحاجه دى يمكن تخلصك من الزنه اللى عند الكاتينه والزنه اللى مع الملفات .......
1- ربط كل خطوط الباور كويس جدا وبالذات الخرطوم اللى تحت تنك الزيت واللى على سحب الطلمبه ( الخرطوم التخين )
2- ظبط مقاس الزيت على العلامه max
3- وأنت فاتح غطاء التنك بتاع الباور حرك الدركسيون العديد من المرات
الى أقصى الشمال وأقصى اليمين وأنت فى مكانك
قول يجىء عشر مرات تقريبا ( بالبركه كده )
4- غطى التنك وتوكل على الله وجرب الوضع ده

من رأيى مدورش العربيه حتى وأنت رايح للميكانيكى
للكشف على سبب الزنه

وبالنسبه للأقتباس ده
سوق براحتك وتوكل على الله
لأنك بتقول

والسيور كلها متغيرة عند 45000 كم

[wookiee]

بالنسبة ل موضوع ماشر البنزين ,
أنا حصلي نفس الموضوع بالضبط
بص يا سيد أنا رحت ل واحد وشافه قال لي يا باشا لازم يتغير العوامة بايظة ولازم تغير النظام كله

رحت لواحد تاني وفكناه و فحصنا لقينا الاتي :

العوامة وهي بتعمل مشوار بتاعها رايح جاي في كده حاسس وصل بيها اخره فيه ماشر بيمشي على مشط في بوردة الكترونية لونها اخضر كده .

المشط ده عبارة عن (Electronic Contacts ) غالبا بتكون عريانة ومش متغطية , وال بنزين بيأثر فيها وبالتالي بنزرناخ ,
هات صنفرة وفك المؤشر ونضاف البوردة والمشط كويس قوي قوي ...

بعد كده راكب كل حاجة وجرب تاني
المفروض إن شاء الله إن شاء الله كله حيكون تمام يا باشا .

يا رت تطمنا كده


أحمد الشناوي

[lionhero16]

أشكركم علي الردود جدا
أنا بجد سعيد جدا لوجودي في المنتدي الجميل ده وطبعا وجودي وسط اسرة الدايو الظريفة دي .

وكل عام وانتم بخير