مشكلة محيراني في الدركسيون

[Mosmafa]

عندي لما يبقى الدركسيون في النص بالظبط
واجيبه سنة يمين او شمال
بسمع طقة غريبة الموضوع دع في نص الدورة بالظبط
واقعد اهزه يمين وشمال اسمع نفس الطقة
لكن لما اجيبه لاخر اليمين او اخر الشمال مفيش اي حاجة
دي سببها ايه دي؟؟؟؟؟؟؟؟؟؟؟؟؟

[eng_oss]

نفس الموضوع ده بيحصل معايا ومش عارف ايه السبب .... ياريت المستشار والمهندس سمير يفيدونا .... انا عربيتى لانوس 2007 عاملة 55 الف

[MMamdouh]

ممكن يكون الجلب بتاعت السكترة فيها بوش

المشكلة دى كات عندى و لما تنتش الدركسيون و هو فى النص تيمع طقة مكتومة من ناحية صدر العربية و نفس الصوت بيتطلع فى المطبات الصغيرة المتتالية

الجلب دى مش موجودة فى السوق و حلها عمل تخشينة كاوتش تحت الجلبة باستخدام شمبر كاوتش قديم

MMamdouh

[samirayad]

أسباب الحاله دى كتير
1- وجود هواء فى دايرة الباور
2- تلف فى بلى العجل الأمامى مثلا ....بيلعب جوه الصره بتاعة الركبه
3- دعامات تثبيت الأسكترا على صدر الغرفه عاوزه يتشيك على رباطها
4- الكشف على صامولة و كنترة بارة الطرف ( يمكن تكون فيه حاجه عاوزه تتربط ) من الجانبين
5 - الكشف على جودة تثبيت ورباط مسامير بيض الدركسيون للجانبين مع صوانى الركب الأماميه
( اللى فوق الشمعدان بتاع كل ركبه )

6- فيه بأه موضوع أكثر تعقيدا
وهو مراجعة توصيلات عمود الطاره بالوصله الصليبه حتى الوصول لعلبة الدركسيون نفسها
بس رقم 6 ده حنسيبه آخر حاجه من حقيبة التوقعات

[megosoft]

الله ينور يا ابو أحمد

[Mosmafa]

ان شاء الله كمان اسبوع هروح افك العلبة عند واحد تمام
هيشيكلي عالعلبة لان في تسريب زيت من الناحية الشمال
كاوتشة على علبة الدركسيون شبه كاوتش الكبالن كده (( غير الكوبرلن،))
بتسرب زيت الباور فقالي ربنا يستر و ميكونش العيب اكتر من اولسيهات

[samirayad]

الله ينور يا ابو أحمد

الله يخليك
وكل سنه وأنت طيب
ورمضان كريم

[mahmoudysf]

فى احتمال ان يكون الصوت من البطاحات لان ده كان بيحصل عندى والسبب كانت البطاحات وغيرتها وراحت الطقطقة

[samirayad]

ان شاء الله كمان اسبوع هروح افك العلبة عند واحد تمام
هيشيكلي عالعلبة لان في تسريب زيت من الناحية الشمال
كاوتشة على علبة الدركسيون شبه كاوتش الكبالن كده (( غير الكوبرلن،))
بتسرب زيت الباور فقالي ربنا يستر و ميكونش العيب اكتر من اولسيهات

هو ده العيب اللى عندك فى الدركسيون ودايرة التوجيه
وده عامل زى السبب الأولانى فى تحليلى السابق
لأن حدوث تسريب فى زيت الباور يعنى الضغط بيقل على بستم الأسكترا الداخلى من الجنب الشمال
زى مايكون فيه هواء فى الدايره بالضبط
لأن وجود هواء برضه بيقلل الضغط وبيأثر على قوة زق الزيت للبستم وبالتالى جريدة الأسكترا
اللى متوصل بيها أتياش الأسكترا اللى بتتحكم فى عملية التوجيه

[Mosmafa]

متشكر جدا لاهتمامك
وادعيلي انها متفتحش معايا
عشان سمعت ان علبة الدركسيون دي
ماركة فتح ونصب عشان شغلها غالي

[samirayad]

أن شاء الله خير
وخد أقرأ الأقتباس ده
دى وجهة نظرى المبسطه عن معنى الباور ببساطه شديده

الباور ده مساعد فى عملية التوجيه بتاعة العربيه.......

_ طبعا أكيد تعرف أن الأسكترا العاديه عباره عن جريده مسننه وبنيون صغير (اللى راكب على عمود أو قطمة الدريكسيون )....بحيث لما تلف يمين أو شمال البنيون اللى فى نهاية عمود الدريكسيون بيحرك الجريده بتاعة الأسكترا يمين وشمال (على حسب الأتجاه اللى بتلف اليه )

_ الجريده اللى جوه الأسكترا دى مركب عليها زراعين أو تيشين (زى كلام الصنايعيه).....هما دول اللى متصلين ببارات الطرف حتى الشمعدان بتاع الفرد الأماميه (يمين وشمال )_ وعلشان العمليه دى بتكون تقيله وعاوزه جهد كبير ( قاموا فكروا فى حل ...علشان عملية التوجيه تبقى خفيفه ....أزاى )

_ خللوا الجريده اللى جوه الأسكترا دى ...من ضمن مكوناتها مكبس أو بستم صغير (داخل قميص الأسكترا )....بحيث لما نديله زيت مضغوط من أحد الأتجاهين ....يساعد فى تحريك البنيون (الترس الصغير اللى فى آخر الدركسيون ) بسهوله أكبر....وبالتالى تخفيف الجهد المبذول فى التوجيه...(يعنى هى هى العاديه ...بس مع ضغط الزيت من جوه الأسكترا سواء يمين أو شمال بيخفف جهد السائق المبذول أثناء التوجيه ) بسبب البستم اللى قولتلك عليه داخل الأسكترا.............

....* وطبعا علشان نودى زيت مضغوط لداخل الأسكترا.....لأزم من تصميم دايره هيدروليكيه ( من طلمبة باور - تنك - خراطيم _ بلف توجيه دوار أسفل علبة الدركسيون ..علشان نودى الزيت اللى جاى من الطلمبه شمال أو يمين بستم الأسكترا مع حركة الدركسيون فى أحد الأتجاهات)....* هو ده ببساطه معنى باور التوجيه المستخدم فى السياره

.... وممكن تقول عليه مساعد أو مؤازر للتوجيه العادى ..بسبب دايرة الزيت اللى قولنا على سبب تصميمها

....* وانا عن نفسى بشبه دور الباور فى التوجيه (علشان بيخفف حمل الدركسيون أثناء التوجيه )......زى دور سيرفو الفرامل لما بيخفف الجهد المبذول أثناء الفرامل (مع الفارق طبعا )..........وأى خدمه يا أستاذنا (وعلى فكره دى نبذه بأختصار شديد ....ولك تحياتى )

[Mosmafa]

الف الف الف الف شكر لمجهودك معايا
ربنا يجعله في ميزان حسناتك لانك
بتدي من غير ما تسال
وخليني افكرك باجر اللي عنده العلم ومبيبخلش بيه

[samirayad]

الله يخليك
وأشكرك على زوقك

[elwad_crazy]

ووممكن يوكن فى القطمه نفسه
عمود الدركسيون
البلى بتاعه مش سليم

[eng_oss]

انا شاكر جدا للردود وربنا يباركلنا فى المستشار ممدوح والهندسة سمير وكل المشاركين ..... يعنى لازم اروح اكشف على علبة الدريكسيون ودايرة الباور