طرمبة مياه اللانوس

[Hossam_Hassan]

تانى يوم العيد لقيت العربية مصفية المياه اللى فيها و بتنقط بعيد عن الرادياتير، لفيت كتير مالقتش ميكانيكى فاتح غير فى بنزينة التعاون فى المقطم، و لأنى كنت رايح فرح فى اخر الهرم و قلقان ان العربية تعطل فكنت مصر اصلحها، المهم الباشمهندس قالى ان الطرمبة محتاجة تتغير و ان عنده طرمبة أصلى ب 85 جنيه - تبع البنزينة محل قطع غيار - ولما شفتها لقيت مكتوب عليها نوبيرا بس هو أكدلى انها واحد و غيرناه و جبت زيت باور ب 15 و ميه خضرا ب 35 جنيه و المصنعية 80 و الأكرامية 20 يعنى كله 235.

فى نفس اليوم ابتديت اسمع صوت تكة متقطعة بتروح و تيجى ناحية السيور بس العربية ماشية، رحتله بعد يومين قالى السيور بتريح و الصوت هيروح.

الصوت مارحش و محدش عارف يحدد السبب، لغاية ما قررت انزل الحرفيين و كلمت اخويا كريم منير و دلنى على ورشة الأسطى عبده البنهاوى و بعد فحص دقيق و فك كل حاجة اتضح ان الطرمبة هى السبب لأن الترس بتاعها على قد سير كاتينة النوبيرا الأعرض من سير اللانوس و علشان كده السير مش محكوم و عمال يحدف يمين و شمال، المهم جبت طرمبة تانية ب 135 يابانى و غيرناها.

اتمنى ان محدش يغلط غلطتى علشان انا شفت كام يوم قلق مالهومش لازمة و بجد بجد مش عارف اشكر كريم اخويا ازاى مش علشان النصيحة بس، علشان جالى مخصوص و فضل قاعد معايا لغاية الساعة 12:30 بالليل و الله انا كل يوم باتأكد ان معرفتنا كلنا ببعض عن طريق المنتدى معرفة خير و لازم كلنا ننميها و نحافظ عليها.

[MMamdouh]

قدر الله و ما شاء فعل... لو كنت قولتلى على حوار الطلمبة انها نوبيرا كنت قولتلك انها مش هى هى... هما نفس الشكل لكن الترس مختلف

MMamdouh

[Hossam_Hassan]

والله يا ممدوح انا مااديتش خوانة خصوصا ان الراجل فى الأول قالى ممكن تمشى بيها و تزود ميه - شكله كان مكسل يشتغل - بس قلتله انى رايح مشوار بالليل و معايا مراتى و بنتى و عاوز ابقى مطمن 100% و مكنتش اتصور انه ممكن يغشنى بالطريقة دى.

[MMamdouh]

الدنيا مفيهاش امااااااااااااااااااااااان

MMamdouh

[Hossam_Hassan]

يا ريت تقولى على الأضرار اللى كانت ممكن تحصل علشان ابقى باتكلم على نور لما اروح ابهدله النهاردة.

[MMamdouh]

ابسط شىء كان ممكن السير يتقطع... طبعا انت عارف اضرار سير الكاتينة المقطوع فى الدايو

MMamdouh

[badblood]

انا دايما بقول كلمه كلمه والله لو كل واحد فكر فيها ثانيه مش هيعمل الاخ العزيز حسام واكيد محدش بيتعلم ببلاش
الخواجه مش بيهز يعني سير لانوس يعني لانوس نوبيرا يعني نوبيرا عمر ده ما يركب على ده لو الميكانيكي بليه النجم الباشمهندس عمل قرد
وزي ما انا متعود اقول ربنا يخلي الخواجه

[sokasoon]

• قدر الله وما شاء فعل
  
  ماحدش بيتعلم ببلاش يا استاذ حسام
  
  لازم تمر بالتجربة علشان تتعلم منها كلنا كده

[ahmedsrs]

احنا هنا بنحب الفهلوة وتفتيح المخ عشان البلية تلعب وكله بيمشى كله :shock: :shock: :shock: :shock: :shock: :shock: :shock: :shock:

[Hossam_Hassan]

الحمد لله على كل شىء و انا اتعلمت بس بحرقة الأعصاب لأنى رجعت كل مليم صرفته يومها من عينيه، حتى تمن زيت الباور و الميه الخضرا و المصنعية، أول ما رجعتله و كلمته بالزوق لقيته عملى الفيلم المعتاد (لا تركب با بيه، هو بس الميكانيكى التانى اللى اقنعك) و كلام خايب تانى و أخر كلامه قال (خلاص خليلنا الطرمبة و لما نبقى نبيعها نبقى نرجعلك تمنها) المهم بمنتهى الهدوء مشيت علشان الأشكال دى ماينفعش معاها غير العين الحمرا بس بطريقة صح لأنى لو عليت صوتى أو مديت ايدى انا اللى هضيع حقى و احترامى، رحت جبت اسم صاحب المحطة علشان اعمل محضر خصوصا ان معايا فاتورة بس طلع صاحب المحطة هو برضوا صاحب محطة شل المقطم اللى انا زبون معروف فيها و طريقة تعامل الناس فيها بتقول انى ادارتها محترمة، سبتله الفاتورة فى المحطة و جبت تليفونه و كلمته و كان فى منتهى الذوق و فى خلال ساعة كلمنى و طلب انه يبعتلى حد بالفلوس البيت و شكرته و رحت اخدت الفلوس من المحطة.

[Karim_Monir]

يا حسام دي اقل حاجة الواحد يعملهامع شخصية محترمة جدا زيك وماكنتش هاعمل اقل منه مع اي حد في منتدانا الجميل
كلنا ايد واحدة واي حد محتاج مساعدة انا تحت امرة
وكويس قوي انك رجعت حقك بالذوق لانك عارف صاحب المحطة لو للاسف لو كان ميكانيكي عادي لا كنت طولت منه حق ولا باطل وكان قعد يديك درس في الميكانيكا المهلبية بتاعة

قدر الله وما شاء فعل

[MMamdouh]

انا دايما بقول كلمه كلمه والله لو كل واحد فكر فيها ثانيه مش هيعمل الاخ العزيز حسام واكيد محدش بيتعلم ببلاش
الخواجه مش بيهز يعني سير لانوس يعني لانوس نوبيرا يعني نوبيرا عمر ده ما يركب على ده لو الميكانيكي بليه النجم الباشمهندس عمل قرد
وزي ما انا متعود اقول ربنا يخلي الخواجه

كلام صح بس ليا تعليق

فى حاجات كتير مشتركة بين العربيات الدايو... يعنى البوبينة و الTPS و الMAP و حساس الايدل زى بعض فى العربيات التلاتة... صحيح حساس الايدل بتاع الليجانزا رقمة مختلف عن النوبيرا و اللانوس بس هو بيركب و يشتغل عادى

القصد هنا ان فيه فعلا حاجات مشتركة مبتفرقش انت حتركبها فى عربية ايه بس القصة مش بالشبة... لازم تتم بمقارنة الPart Numbers قبل ما اى حاجة تركب... طبعا صاحبنا الميكانيكى اخدها بالشبة و ركب و خلاص و مشيت العملية و دة غلط

MMamdouh

[amgada7555]

ماحدش بيتعلم ببلاش فعلا