كيا سيراتو السعودى - بمبه؟!!!!!!!!

[eggroup]

علمت من مصادر موثوق بها بالسعودية أنه لا يوجد فرق فى العربيات السيراتو التى تنزل لهم من اللى بتنزل فى أى حته و أنما هم عندهم قانون يلزم أى مستورد سيارات أن يكتب عليها عبارة "مطابقة للمواصفات السعودية" علشان يدخلها البلد و ده كل الموضوع يعنى أجراءات أدارية ليس الا و الدليل أيضا أن الصاجه اللى على القايم مكتوب عليها "مطابق للمواصفات الخليجيه و السعودية" و القصة كلها أنه زمان كانت كل السيارات مطابقة للمواصفه الخليجيه فقط اللى هى فى النهاية تكييف قوى يتحمل الحرارة و كانت الماركات الكورية لا تحظى بأقبال لدى السعوديين اللى كانوا كلهم بيركبوا الأمريكانى و لكن بعد الأزمة العالمية و نقص السيولة أبيتدوا يفكروا فى الكورى و طبقا للقانون عندهم لازم موضوع المطابقة دى علشان كده كوريا زودت كلمة السعودية علشات تعرف تدخلها البلد هناك.

بس خلاص و هى دى كل القصة اللى أستغلها المستوردين علشان يعملوا فروق أسعار و يضحكوا على الناس.


ملحوظة: هذه أفتكاسه من عندى و لكن فكروا فيها كويس لو أنا ما كتبتش الملحوظة دى، كان الخبر أنتشر و دخلت أنا نفسى بأكثر من أسم للمنتدى و أكدت المعلومة و دى طريقة نشر أى أشاعة فى الدنيا، يا جماعه شغلوا عقلكم شوية دى لعبة مستوردين ليس الا.
سؤال برىء: هل يوجد لدينا كمبيوترات مواصفه سعودى و لا تلاجات و لا غسالات و لا حتى مكانس علشان يبقى فيه عربيات بالمنظر ده. مطلوب شوية عقل و تدبر.

[hobiko]

مشكور فعلاً على الملحوظة و كلامك منطقي و صح فعلاً

[hossam_elwani]

اعتقد ان الاختلاف الحقيقى بيكون فى حاجتين فقط التكييف والدهان وده عشان الحرارة الرهيبة الى هناك فى دول الخليج والمطلوب مهندسين متخصصين يحسمو الموضوع ده بالتدقيق فى تفاصيل المكيف بين الخليجى والوكيل لبيان الفرق على الواقع

[ahmed_su]

كلام سليم.........

[د.محمود صلاح]

فكرة ليه لأ ؟

[Ahmed_Gadalah]

كلام منطقى

[horas3000]

معلش انا مش فاهم قصدك من الموضوع

لو قصدك ان المواصفات الخليجية مش مختلفة عن المصرية يبقي اسمحلي حضرتك غلطان.
الموضوع مش فوضة لدرجة ان يتضحك عليهم بالسهولة دة لان موضوع زي ده مش من السهل اخفائة بسهولة. درجات الحرارة في الصيف بتوصل ل 50 و 60 درجة مئوية و العربية الغير مجهزة للطقس ده مصيرها غير سار بالمرة. و عشان كده نوعية الخامات المستخدمة في الدهان و في الفرش الداخلي مختلفة عشان تستحمل و في بعض الاحيان الزجاج بيكون مختلف و الاهم من ده كله العجل المستخدم.

اما لو عايز توضح ان المواصفات السعودية مختلفة عن الخليجية فكلامك في جزء كبير من الصحة. المواصفات السعودية تختلف قليلا عن المواصفات الخليجية فعلا بس اغلب الاختلاف بيكون في الكماليات و هي بتختلف من بلد خليجي للتاني و الاتنين مسموح بدخولهم و ليس شرط وجود كلمة السعودية. و عموما الكويت معروفة بانها اعلي مواصفات

و مين قال ان السيارات الكورية ملهاش اقبال في السعودية. الهيونداي عاملة مبيعات عاليه هناك و السوناتا تعتبر المنافس الاول للكامري معشوقتهم هناك و الكيا ابتدت تنتشر هناك و ناس كتير مستنين ال k7 الجديدة بديلة الاوبريوس اللي ليها شعبية هناك برضة.

اتمني وجهة نظري تكون وصلتك

[eggroup]

آخي حورس 3000

ما قصدته هو اننا نبالغ كثيرا في تقدير المواصفه السعودي و انها آحسن من المواصفات الاخري حتي و ان كان الموضوع تحمل حراره 50 او 60 درجه فهذه الحراره اخي يحدث مثلها في الكويت مثلا و بافتراض صحه نظريه المواصفه فمن المفروض ان الكويتي يكون مثل السعودي هذه واحدة اما الاخري فهي انه اذا كانت هذه المواصفه ملائمه لمصر كان الوكيل هو اول واحد يجيبها علشان يحافظ علي سوقه بين المنافسين و لكن لاننا لا تصل لدينا الحراره لمثل هذه الدرجات فلا حاجه بنا لتضخيم مثل هذه المواصفه و دفع مبالغ اكبر فيها لا نحتاجها.

علي فكره انا لا افهم في السيارات مطلقا و اكيد هناك من هو اقدر مني بالمنتدي و لكني اناقش الموضوع عقليا فقط.

مع تحياتي و شكري للجميع.

[ghazy12]

انت كتبت سطرين في آخر الموضوع بخط صغير جدااا, لكن انا مش فاهم معناه بالظبط, فلو ممكن تشرحهم بعد اذنك..
و دول السطرين في الاقتباس.......

ملحوظة: هذه أفتكاسه من عندى و لكن فكروا فيها كويس لو أنا ما كتبتش الملحوظة دى، كان الخبر أنتشر و دخلت أنا نفسى بأكثر من أسم للمنتدى و أكدت المعلومة و دى طريقة نشر أى أشاعة فى الدنيا، يا جماعه شغلوا عقلكم شوية دى لعبة مستوردين ليس الا.
سؤال برىء: هل يوجد لدينا كمبيوترات مواصفه سعودى و لا تلاجات و لا غسالات و لا حتى مكانس علشان يبقى فيه عربيات بالمنظر ده. مطلوب شوية عقل و تدبر.

-----------------------------------------------------------------

انا رديت على استفسارك ده قبل كده لكن تقريبا انت ماخدتش بالك منه...

و لو تقصد ان كله مواصفات واحده و الفرق الحديده بس بتاعه المواصفات اللي بيتكتب عليها سعودي او غيره...

اسمحلي اقولك انت غلطان تماما و بكل المعايير و المقاييس و مع كامل احترامي لوجهة نظرك طبعا...

لو حبيت اشرحلك الموضوع كمان مره... انا ماعنديش مانع

[M.ABDEEN]

كلام سليم وكلام معقول

[horas3000]

آخي حورس 3000

ما قصدته هو اننا نبالغ كثيرا في تقدير المواصفه السعودي و انها آحسن من المواصفات الاخري حتي و ان كان الموضوع تحمل حراره 50 او 60 درجه فهذه الحراره اخي يحدث مثلها في الكويت مثلا و بافتراض صحه نظريه المواصفه فمن المفروض ان الكويتي يكون مثل السعودي هذه واحدة اما الاخري فهي انه اذا كانت هذه المواصفه ملائمه لمصر كان الوكيل هو اول واحد يجيبها علشان يحافظ علي سوقه بين المنافسين و لكن لاننا لا تصل لدينا الحراره لمثل هذه الدرجات فلا حاجه بنا لتضخيم مثل هذه المواصفه و دفع مبالغ اكبر فيها لا نحتاجها.

علي فكره انا لا افهم في السيارات مطلقا و اكيد هناك من هو اقدر مني بالمنتدي و لكني اناقش الموضوع عقليا فقط.

مع تحياتي و شكري للجميع.

بص يا زعيم
لازم تفرق بين المواصفات و الكماليات

المواصفات الخليجية و السعودية تكاد تتطابق من حيث تحمل الحرارة زي و القدرة علي السير بسرعات عالية و الي ما ذلك بما يناسب طبيعة البلدان دي و طريقة القيادية و نمط استخدام المستهلكين للعربيات. و من الناحية دي انت عندك حق الكلام ده مش مهم قوي في مصر لاننا معندناش درجات الحرارة العالية دي ده و بالعكس السيارات اللي بالمواصفات الخليجي عفشتها متستحملش الطرق المصرية لان الطرق في الخليج نظيفة و متسفلته كويس علي عكس مصر.

اللي بيميز العربيات الخليجي بقي هي الكماليات و هو دي اللي بيفرق من بلد للتانية حسب ميول اهلها. و بما ان دول الخليج دخل الفرد فيها يعتبر مرتفع فالناس هناك يحبوا العربيات تبقي مليانة اوبشنز و كماليات حتي لو مش هيستخدموها بس علي الاقل هيتفشخر بيها زي فتحة السقف, ستارة خلفية, كراسي مكيفة,دخول بدون مفتاح الخ. اما في مصر و حيث ان الجمارك بتحاسب علي كل اوبشن من دول فالتوكيلات بيجيبوا العربيات من غيرها بما فيها مواصفات الامان عشان السعر و عشان يعظم مكاسبة فلما تلاقي عربية خليجي و فيها اوبشنز و مواصفات امان اكتر من التوكيل و تقف ارخص يبقي ده معناه ايه ؟؟؟؟

ان التوكيلات في مصر حرامية و همهم مكسبهم و بس و يغور المستهلك في ستين داهية ما هو في منهم كتير. و هو ده اللي بيخلي الناس تجيب الخليجي لا لعبة مستوردين و لا هم يحزنون و ان كان دول برضة مش ملايكة برضوا بس اهو قضي اخف من قضي و ربنا يتوب علينا من الناس دي بقي

[hossam_elwani]

بص يا زعيم
لازم تفرق بين المواصفات و الكماليات

المواصفات الخليجية و السعودية تكاد تتطابق من حيث تحمل الحرارة زي و القدرة علي السير بسرعات عالية و الي ما ذلك بما يناسب طبيعة البلدان دي و طريقة القيادية و نمط استخدام المستهلكين للعربيات. و من الناحية دي انت عندك حق الكلام ده مش مهم قوي في مصر لاننا معندناش درجات الحرارة العالية دي ده و بالعكس السيارات اللي بالمواصفات الخليجي عفشتها متستحملش الطرق المصرية لان الطرق في الخليج نظيفة و متسفلته كويس علي عكس مصر.

اللي بيميز العربيات الخليجي بقي هي الكماليات و هو دي اللي بيفرق من بلد للتانية حسب ميول اهلها. و بما ان دول الخليج دخل الفرد فيها يعتبر مرتفع فالناس هناك يحبوا العربيات تبقي مليانة اوبشنز و كماليات حتي لو مش هيستخدموها بس علي الاقل هيتفشخر بيها زي فتحة السقف, ستارة خلفية, كراسي مكيفة,دخول بدون مفتاح الخ. اما في مصر و حيث ان الجمارك بتحاسب علي كل اوبشن من دول فالتوكيلات بيجيبوا العربيات من غيرها بما فيها مواصفات الامان عشان السعر و عشان يعظم مكاسبة فلما تلاقي عربية خليجي و فيها اوبشنز و مواصفات امان اكتر من التوكيل و تقف ارخص يبقي ده معناه ايه ؟؟؟؟

ان التوكيلات في مصر حرامية و همهم مكسبهم و بس و يغور المستهلك في ستين داهية ما هو في منهم كتير. و هو ده اللي بيخلي الناس تجيب الخليجي لا لعبة مستوردين و لا هم يحزنون و ان كان دول برضة مش ملايكة برضوا بس اهو قضي اخف من قضي و ربنا يتوب علينا من الناس دي بقي

متفق معاك فى كل كلامك ما عادا جزئية العفشة حد قارن بين الاثنين على الطبيعة من حيث انواع المساعدين وارتفاع اليايات وشكل المقصات ونظام التعليق بشكل عام عشان نحكم بالفرق الاكيد بينهم؟؟

[horas3000]

متفق معاك فى كل كلامك ما عادا جزئية العفشة حد قارن بين الاثنين على الطبيعة من حيث انواع المساعدين وارتفاع اليايات وشكل المقصات ونظام التعليق بشكل عام عشان نحكم بالفرق الاكيد بينهم؟؟

انا يا زعيم بتكلم عن تجربة شخصية بالفعل

اما كان معايا كرولا 2002 خليجي و كنت بعاني منها الامرين من المطبات اللي كانت دايما ترزع في العربية من تحت لانها كانت واطية و في اكتر من موقف الاقي الناس اللي معايا يفتحوا الباب و ينزلوا تعاطفا معايا لكن ده كان مديها ثبات عالي جدا و لما جبت بيها 170 العربية كانت زي الفل و مفيش منها اي قلق.

لما سافرت بعتها و لما رجعت مصر في الاجازة اجرت كرولا برضة اول حاجة لاحظتها ارتفاعها عن الارض و بالفعل كنت بعدي علي اي مطب ولا الهوى العربية بتعدي كانها جيب لكن اوصل لل 120 و صباح المراجيح و عرفت بعد كده انها مواصفات مصرية و ده كان عيب ناس كتير اشتكت منه في الكرولا

بالنسبة للعربيات التانية معرفش ايه الظروف بس اعتقد اللانسر الشارك نفس الموضوع اللي بشوفهم في مصر حاسس انهم اعلي من اللي بشوفهم هنا علي الرغم اللي بتنزل هنا 2000 سي سي و بجنوط 18

[eggroup]

الى حورس 3000
كلامك عن الكماليات معقول و أنا مقتنع بيه. بس مش قادر أفهم موضوع المواصفات فمثلا الشاسيه هل يصنعونه للأردن مثلا من تخانات حديد أقل؟

الى gyhazy12

المكتوب تحت يقول أن هذا الكلام محض خيال منى و لم أقرأه فى الواقع و لكن من الممكن أن يكون بدايه لشائعه قويه ضد هذا أو مع ذاك، لذا أريد أن اقول كون الكلام قد كتب أو قيل من أكثر من مصدر لا يعنى مطلقا مصداقيته و أنه لابد و أن نعمل عقولنا فيما نقرأ و نسمع.

[medo_sirion]

على فكرة مش فى العربيات بس دة فى كل حاجة كمان
يعنى يجيبوا مواد غذائية بس تدخل مطابقة للمواصفات السعودية