Tweet
تقرير مفصل عن حادثة كيا ريو 2009
بسم الله الرحمن الرحيم
المشهد الأول
المشهد الثانى
3 ثوانى بعد لحظة الإصطدام واصبحت السيارة راشقة فالرصيف ومتصدرة الشارع بالعرض ثم فجأة ترجع السيارة للخلف وتقف موازية للرصيف ويفتح قائد السيارة الباب ليخرج ليكتشف انه يفتح بصعوبة شديدة ويلمح الكابوت وقد فتح من تلقاء نفسه ويخرج منه دخان خفيف جداً واسفل السيارة كمية مرعبة من الزيت وفنفس اللحظة عدد وفير من الناس تجرى فاتجاه السيارة وكلو يهجم عالكابوت واحدهم صارخاً "أفصل البطارية بسرعة!!" "أفصل بسرعة قبل متولع!!!!" وصاحب السيارة يشاهد كمية من الأيادى تمتد للكابوت وكأنو فاحد لقطات غرفة الإنعاش لمسلسل er.
ملحوظة ((الشهود أكدت فيما بعد أنهم شاهدو السيارة ترتطم بالرصيف ومن ثم ارتدت للوراء من قوة الصدمة حتى وقفت بجانب الرصيف......سبحان الله!!))
المشهد الثالث
الساعة 9:45 السيارة منطلقة على الونش لتوكيل كيا بأبو رواش ويفيد مهندس الإستقبال بأن المقايسة ستتكلف 550 جنيه ويتم دفعها فحالة عدم الرغبة فالإصلاح داخل التوكيل وبعد الموافقة وتسليم السيارة افاد بأنها ستجهز خلال أسبوعين وبالفعل بدأت الإتصال بعد اسبوعين ولم تكن اكتملت المقايسة لعدم وجود كافة الأسعار وانتظاره ايميلات من الشركة الأم لبعض القطع فسألته فالتوقيت ده طيب وصلت كده لحد كام وكان رده "15 ألف جنيه بس لسه في بنود كتيرررررررررررررر"
المشهد الرابع
بعد مرور شهر تقريباً كانت المقايسة اكتملت فتوجهت للتوكيل لمعرفة تفاصيلها وفعلاً استلمت ورق المقايسة ورحت بيه لقسم الحوادث عشان ابقى شايف اللى مكتوب فالورق على الواقع وبدأ المهندس يشرح بند بند قطع محتاجة تتغير وطبعاً بدأت اشوف انه كلو كلام غير الواقع تماماً وابقى شايف قطع سليمة 100% ومفهاش خدش زى الفوانيس مثلاً والاقى اصرار لازم تتغير لإن احتمال لما هيفك يلاقي مسامير تثبيتها مكسورة!! وبدأ شرح المقايسة كلو يتضح انو عبارة عن احتمالات وتخمينات مبنية عالخبرة فقط وعلى الشكل العام للسيارة وانه طالما القطعة دى بازت يبقى هنغير كذا وكذا وكذا وكذا مع ابتسامة عريضة من المهندس فكل قطعة هتتغير المقايسة وصلت فالوقت ده لإجمالى 33 ألف جنيه بخلاف ما سيتم اكتشافه بعد الفك!! وفاليوم ده كان لازم اقرر وفعلاً كان قرار صعب لأن الأمور غير واضحة فعلياً بدون فك حقيقي لأجزاء السيارة وخلال الوقت ده فقسم الحوادث كان فى كمية رهيبة من السيارت اللى عاملة حوادث وبدأت الاحظ ازاى المهندس بيتعامل مع السيارات دى فمثلاً واقف جنبى سيراتو جديدة عاملة حادثة خلت الكابوت معوج من قدام ومش ممكن فتحو بسهولة فالمهندس بكل بساطة جاب خشبة من عالأرض وفضل يحشرها جامد عشان يفتح الكابوت وطبعاً الكابوت مرحل من ورا فأول مفتحو بدأت اطرافه الحلفية تغرس فالزجاج الأمامى وفضل المهندس بفتح أكتر وأكتر لغاية مدمر الزجاج الأمامى بالكامل رغم أنه كان سليم 100% وطبعاً هيتضاف على مقايسة العربية دى وبعدين راح لعربية تانية سيراتو بردو وتالتة ورابعة وبالملى نفس السيناريو كل واحدة يفتح كابوتها ويدمر زجاجها الأمامى عشان يفتحو!!...للأسف ده مثلاً مش فنى أو عامل لكن أحد المهندسين بالتوكيل وبالتالى فالقرار كان وضح بالنسبة لى أنو الموضوع مش بس التكلفة الرهيبة الغير متناسبة مع الحادث لأ انا مش هعرف انام فالبيت وانا عارف ان فى واحد بيدمرلى عربيتى اكتر ما هى مدمرة تحت بند انو بيصلحهالى وكلو هيتضاف فالأخر عالفيزيتا مع نفس الإبتسامة العريضة...فوراً قررت ان السيارة تتنقل حالاً تحت البيت بونش أى كان ايه اللى هيحصل ودفعت بعد الفصال مقايسة 275 جنيه.
المشهد الخامس
رجعت البيت وأول حاجة علطول دخلت نايل موتورز اجيب مواضيع الحوادث لاستشاؤة اصحابها بس ملحقتش الحقيقة لأن لفت نظرى اعلان فأول الصفحة "العقيد..لسمكرة ودهان السيارات..الحرفيين" فتحت الإعلان فلقيت صاحب الموضوع العقيد خالد فكلمتو فوراً وأخد منى عنوان البيت مع وعد انو هيعدى عليا اول ميخلص شغل فالورشة وفعلا الساعة 11 مساءاً كان العقيد خالد موجود والأسطى محمد من الورشة واتفقنا يعدى تانى يوم فالنهار عشان تبقى السيارة واضحة ونقلناها فاليوم ده للورشة فالحرفيين وعلطول بدأ العمل فيها بفك الأجزاء الخارجية ثم بمساعدة عم حسن الميكانيكي فك المحرك لتبدأ شغل السمكرة.
حالة السيارة فالوقت ده (العجل الأمامى فحالة دوران لأقصى اليمين – العجلة الأمامية شمال مرحلة للخلف – الدركسيون بيلف عالفاضى – رفرف شمال داخل حروفه تحت الباب - بطارية ميتة).
المشهد السادس
تانى يوم بمجرد فك المحرك اتضحت الصورة تماماً (( صدر متكسر – رادياتير وسربنتينة تدمير كامل من تحت واعوجاج - قنطرة المحرك معصورة من الشمال - فردة الشاسية الشمال متنية لتحت بالركبة – علبة دركسيون مشروخة – مقص شمال معووج – قاعدة موتور خلفية مشروخة – ودن التعليق الشمال المحرك والفتيس فضلت فمكانها بس المحرك والفتيس سابوها))
المشهد السابع
ده أشق جزء فعملية الإصلاح وهى مهمة البحث عن القطع دى سواء جديدة أو استيراد وهنا تظهر شهامة العقيد خالد الغير عادية وتسخيره لكامل وقته وسيارته للمهمة دى رغم أنها خارج نطاق عمل ورشته وفعلاً الموضوع ده أخد ساعات رهيبة يومياً للوصول لكل قطعة ومفاجأت التجار وخداعهم فعملية البيع...للأسف تجار قطع الغيار بيستغل عاملين هو جهلك التام بسعر القطعة المطلوبة وعدم معرفتك بتماثل القطعة دى مع سيارة تانية وبالفعل مراراً وتكراراً أرهقت العقيد خالد بأنى ارجع قطعة واجبها من مكان تانى لفرق السعر اللى كان بيوصل ل 200 جنيه مثلاً من تاجر لأخر واحياناً لـ 500 جنيه!! اهم نصيحة فموضوع قطع الغيار انو فعلاً دى اللحظة اللى تحتاج فيها دراية تامة بكافة ارقام تجار قطع غيار سيارتك وأماكنهم وأن فكل قطعة لازم تلف عليهم كلهم ومهما وثقت فواحد منهم فهما شغالين بنفس نظرية كارفور بيبعلك قطعة رخيصة ويمص دمك فالتانية فمهما جبت قطعة رخيصة من تاجر بردو اتأكد القطعة التانية عند الباقيين بكام..تانى نصيحة اوعى تسيب نفسك لتاجر قطع غيار لأنو عندو القدرة انو يركنك جنبو اكتر من ساعتين بحجة ان القطعة موجودة فالمخزن وبفضل يبعت فصبيان رايحة جاية قدامك على أنهم بيدوروا عالقطعة ويقسملك انو متأكد انها موجودة وبعد الانتظار الرهيب والملل ترجع بخفى حنين ههههه....طبعا انا والعقيد خالد حالياُ أى تاجر قطع غياراخره معانا نص دقيقة مظهرتش القطعة فوراً سيبو وامشى.
المشهد الثامن
حقيقي لو فضلت أشكر فمجهود العقيد خالد يا جماعة هحتاج منتدى كامل لأنو بيتعامل مع السيارة كانها ملكه الشخصي وبيحافظ عليها زى سيارته بالزبط لكن بالإضافة لذلك ورشة العقيد خالد فيها ميزة متقدمة جداً والوحيدة فمصر اللى فيها الخدمة دى الحقيقة أنا عادة بسافر كتير جداً ووقتى لا يسمح نهائياً بمتابعة السيارة بصفة يومية ولكن الفكرة العبقرية اللى العقيد خالد بيقدمها فورشته انه بيفضل يصور عملية الإصلاح يومياً وبكل بساطة انا كنت بتابع مراحل الإصلاح من خلال المنتدى كأنى متواجد بالزبط وبصراحة التوكيل نفسو يستحيل يقدم الخدمة دى بالإضافة لأن موقع الورشة فأول الحرفيين سهل الوصول ليه وعامل الأمان موقع الورشة موجود بجوار منطقة عسكرية وفى برج مراقبة بيطل عالورشة موجود بيه عساكر جيش لتأمين الموقع 24 ساعة فالبتالى بيضيف لمكان الورشة أمان عالى جداً.
المشهد التاسع
بمرور 22 يوم تقريباً كانت عملية الإصلاح بحمد الله اكتملت بنسبة 95% والصور ابلغ من الوصف وقمت بتجربة السيارة والإنطباع العام جيد جداً وتكاد تماثل أداء السيارة قبل الحادث مع وجود رتوش لسه هحتاج ابحث ان كان فى تزبيط لها وهيتم ازاى وفين اول اختلاف فأداء السيارة ان الدركسيون وضعه بقى مختلف عن ما كنت متعود عليه فالملفات يعنى مثلا لو كنت بلف الدركسيون ربع لفة وانا داحل ملف فبقيت بلفو نص لفة فطبعا شكلو بيبقى غريب بالنسبة لى الاقى الددركسيون مقلوب لتحت فملف بسيط جداً اعتقد ده راجع لاختلاف علبة الدركسيون وانا كان الخبراء هنا يفيدونى اكتر تانى حاجة ودى اساسية لازم ازبطها بس هحتاج مشورتكم بردو ان عصاية الفتيس مبقتش مزبوطة فالمجرى بتاعها مع الوضع الحقيقي يعنى مثلاً ممكن وضع الd على الشاشة يكون شكلو الفعلى عالفتيس العصايا محطوطة على n بالتالى حالياً بسوق اعتماداً على الشاشة فقط لحين مالخبراء هنا يفيدو بتفسيرهم واقتراحاتهم ويتبقى شحن التكييف وكده يبقى ال 5% الباقية تكتمل بأمر الله.
معلومة هامة عن توكيل كيا eit:
لم تكن فقط معاملة السيارات بقسم الحوادث ولا الأسعار المبالغة سبباٌ لإتخاذ قرار بعدم الإصلاح بالتوكيل ولكن أن تحدث سرقة للسيارة اثناء فترة عمل المقايسة هى أكبر مفاجأة لى أن أترك سيارتى فى قلب التوكيل ويتم سرقة وش الكاسيت الخاص بسيارتى!!!!! لا تعليق!!!
الخلاصة:
1- لا تشترى سيارة غير مزود بأنظمة الأمان القياسية abs-esp-ebd-airbags.
2- لا تتوقع من سيارة غير مزود بأنظمة الأمان القياسية abs-esp-ebd-airbags أداء المزودة بها اعتماداً على قدراتك الشخصية مهما كانت مهاراتك فالقيادة.
3- تأمين السيارة ضرورة وليس اختيار.
4- لا تشترى كيا ريو طمعاً فالضمان 5 سنوات او 100000 كم رغم إعجابي الشديد بها وبأدائها فعلا سيارة رائعة ولكن هى مثل السيارات الصيني سيارة غير موجودة فالسوق المصرى ونادرة قطع الغيار.
فانتظار نصائحكم وخبراتكم لاستكمال ال 5% فى عملية الإصلاح
والسلام عليكم ورحمة الله
أخوكم محمد شوقى
Comment